دیوانوو هامسەرۆکایەتی کۆنگرەو گەلی پۍ کۆچوو دماین و دۆسوو کوردا، ئێرلینگ فۆلکڤۆرد کە جە تەمەنوو ٧٤ ساڵینە عەمرەو خوڎایش کەردە، پرسەنامێوەش وەڵا کەردۆ و چنەشەنە ئەرەیاۋناش، "تا دما ساتەکا ژیۋایش پەی ئازاڎیی گەلوو کوردی و فەلەستینی کۊشیا".
دیوانوو هامسەرۆکایەتی کۆنگرەو گەلی پۍ دۆسوو کوردا و پەرلەمانتاری وەڵینوو نەرویجی ئێرلینگ فۆلکڤۆرد کە جە تەمەنوو ٧٤ ساڵینە جە ستۆکهۆڵم عەمرەو خوڎایش کەردە، پەیامێوە پرسە و سەرەوەشیش وەڵاکەردۆ.
پەیامەکەو دیوانوو هامسەرۆکایەتی کۆنگرەو گەلی پی جۆرەنە:
"ئێمە هێزی هەواڵوو کۆچوو دماینوو دۆسوو رابەر ئاپۆی و گەلوو کوردی ئێرلینگ فۆلکڤۆردیما ئەژنی. ئانە کۆستێوە گۊرەن پۍ گەلوو کوردی و جمیەرەکەیما. سەرەوەشی جە بنەیانەو ئێرلینگ فۆلکڤۆردی، پارتەکەیش و وەشەسیایا و تەرەفڎاراش کەرمۍ و هامبەشۍ خەمەکاشانمۍ.
ئشناسای و دۆسایەتی ئەرلینگ فۆلکڤۆردی چنی گەلوو کوردی پۍ زیاتەر جە ٣٠ ساڵا وەڵۍ ئیسەی گێڵۊوە. ساڵەو ١٩٩٣ جە پارتوو سورداینە پێسە ئەنداموو پەرلەمانوو نەرویجی هۊرچنیا. چا وەختۆ جمیەروو ئازاڎیش ئشناسا و دووۍ جارۍ سەردای سەرنیشتوو کوردسانیش کەرد.
وەڵۍ گەلوو کوردینە ئەرلینگ دۆسوو گەلوو فەلەستینۍ بۍ. بە ئشناسای جمیەروو ئازاڎیی هامڕایی ئەرلینگی چنی گەلوو کوردیچ دەسشپنەکەرد، تا دما رۆ و ساتوو ژیۋایش، بەردەوامبۍ جە پەشتیوانی هەردووە گەلەکەی.
ئێرلینگ گرڎوو کار و خەباتیش پۍ ئازاڎیی ئا دووە گەلەیە تەرخان کەرد. بۊنەو وەڵینگەو کوردسانی و چارەسەری پرسوو کوردیۆ سەردای سەرنیشت، پانیشت و ۋەرنیشتوو کوردسانیش کەرد، ئەوەکۊڵیایش کەرد و چنڎین کتێبێش نویستۍ.
جە چوارچێوەو ئاخێزوو ۋەرنیشتینە، جە ۋەرکەوتوو دلێڕاسەینە سەروو چارەسەری پرسوو گەلوو کوردی و فەلەستینی کتێبۍ تازۍ نویسۍ. پۍ ئا خەباتەیچشە لووا پۍ ستۆکهۆڵمی و داخەم مەشۆ چا عەمرەو خوڎایش کەردە. واتە تا دما ڕۊو ژیۋایش پەی ئازاڎیی گەلوو کوردی و فەلەستینی کۊشیا.
پێسە گەلوو کوردسانی و جمیەروو ئازاڎیی حەجگیز دۆسوو گەلەکەیما ئێرلینگ فۆلکڤۆردی جە یاڎ مەکەرمۍ. گرڎ وەختۍ نامۍ و یاڎش جە کۊشیاو ۋێمانە بە زینڎەیی ڕاگێرمۍ.
سەروو ئا بنەمایۍ جارێوەتەر سەرەوەشی جە بنەیانە و کەسوکاریش کەرمۍ و هامبەشۍ خەم و ئێشەکەیشانمۍ. ئێرلینگ فۆلکڤۆرد بە دۆسایەتی ۋێش گرڎ وەختۍ جە دڵوو گەلوو کوردینە مژیۋۆ".
