کۊمسیۊنوو زوان، کولتوور و پەروەرڎەو کۊنگرەو نەتەوەیی کوردستانی بۊنەو ڕۊو جیهانی زوانی ئەڎاییوە پەیامێوە مەبارەکباییش وەڵا کەرڎۊ، ئینەنە:

"پارێزنای و وەڵێوەبەرڎەی زوانی کوردی و جەیۊینزیککەرڎەیۊ

 دیالێکتەکاش پاێوە یۊبییەی نەتەوەییمانە

 ڕۊو جیهانیی زوانی ئەڎایی مەبارە بۊ

زوانی کوردی شناسنامەو گەلێوە دێرینوو وەرکەوتوو دلێراسەین و ساعیبوو تایبەتمەندێتیی ڕازوانی و زوانی ڕەسەنوو وێشا. بۊنەو ئا هجووماو سەروو گەلوو کوردیوە بە درێژایی تارێخی سەبەبوو مەنەیۊ و پارێزنای جیاوازییەکاما بییەن. دماو بەشکەرڎەی و گێرتەی خاکوو کوردستانی و زاڵبییەی بێگانەکا و دماتەر ئەنجامەکاو پەیمانەو لۊزانی، دەوڵەتۍ سەرڎەسۍ (ئێران، تورکیا، سوریا و عێراق) سیاسەتوو نکۊڵیکەرڎەی و شێونای زوانی و هەوڵۍ سڕیەیوە و تاونایۊ زوانی کوردییشا پەیڕەو کەرد و تا ئیساتێچ بەرڎەوامییش هەن. بەتایبەتی تورکیا و ئێراننە مافوو بەکارئارڎەی زوانی ئەڎایی بە کوردی نەدریان و چا مافە گەردوونی و یاسایییە بێبەش کریێنێ.

چێگەوە هەرمانەو ڕێکوزیا میاندەوڵەتی و سازییەکاو مافوو ئینسانین، کە دژوو ئی ستەمەو هەردووە دەوڵەتاو تورکیا و ئێرانی بێدەنگۍ نەبا و فشار پەی بەکارئارڎەی زوانی ئەڎایی کەرا و گەل و پێکئامایەکاو دلۍ سنووروو دەسکردوو ئا دووە دەوڵەتا مافوو بەکارئارڎەی زوانیی شیرینوو ئەڎێشا بۊ.

ئا فاڕیایۍ و ورچەرخیایۍ جیهانی و شۊڕشوو پەیوەندییەکا و ئامێرە ئەلەکترۊنییەکا کاریگەریی ڕاستەوخۊشا سەروو زوانی نیانرە و یاونانشا ئاستێوە تەر. کریۊ بە لایەنی ئەرێیوە ئیسفادەش چەنە کریۊ. چا ڕووەوە زوانی کوردی سەرباروو ئانەیە پلێوە خاسە و دیارەش هەنە، پەوکای کۊنگرەی نەتەوەیی کوردستانی سپاسوو ئا گردوو هەوڵە تاکەکەسی و ئەرەمەرزیایا ئا بوارەیە کەرۊ. هاموەخت هەرمانەو حکومەتوو هەرێمی (پانیشتوو کوردستان)ی و دەسەڵاتی وێڕاوەبەروو وەرنیشتوو کوردستانیچا جە لایەنوو سیاسەتوو زوانی و پلانی زوانیوە هەرمانەو زوانی و بنەزوانەکاو زوانی کوردی پەرسەو ڕۊیشانە بۊ و ستراتیژوو هەرمانەکاشانە ڕاش کەراوە و بودجەش پەی تەرخان کەرا و ئەرەمەرزیای تایبەتمەندش پەی تایبەت کەرا.

کۊنگرەو نەتەوەیی کوردستانی – ک ن ک، سەرباروو پەشتیوانیی ئا هەوڵا ئامادەیی زیاتەروو پەشتیوانیکەرڎەی و هامکارییە و بەرڎەوام جە هەوڵۍ نزیککەرەیۊ و پارێزنای و وەڵێوستەی زوانی کوردینە هەنۍ و چالاکی و هەرمانۍ نۊعاونۊعێش کەردێنی و پەرڎەوامیچ بۊ. پێسە چەنی ئێساڵ ٢١ شوباتینە بە هەمئاهەنگی چەنی ئەکادیمیای کوردی پانیشتوو کوردستانینە دیدارێوە پەی چوار پەنەلیستاو هەر چوارپارچەو کوردستانی کەرۊ و ساڵای ویەرڎەیچ چەنی زانکۊکاو کوردستانی پا بۊنەوە چالاکیما کەرڎەن.

 ڕۊو جیهانیی زوانی ئەڎایی، وەنەو گرد کوردزوانێوە مەبارەک بۊ و هومێد کەرمۍ هەمیشە زوانەکەما سەرمەشقوو زوانەکاو جیهانینە بۊ و ئینەیچ خەباتی بەپلانش گەرەکا".

هـ . ب