سەرسەعبوو ئارۊی ئەرەیاونیێکۍ و بنەیانەو هونەرمەند جیهانبەخشی غەفووری وەرکەوتوو کوردسانیوە ئەرەیاوناشا، کە هونەرمەندی گەورە و پەڕ بەرهەموو هەورامانی، دماو ٨٧ ساڵا گۊرانیواتەی پەی عەشق و وەشەسیای و وەتەندۊسی و هەورامانی کۊچی دماینش کەرد، بەخشەی هونەرمەند جە چەمپەنەکەوتەێوەنە چەنی مامۆسا هومایۆن ساحیبی فەرماوۆ عێراقنە ئامان دنیاوە و عومرێوە فرەش عێراقنە بەردەن سەروو نەوسوودەنە ژەنیش ئاردێنە و  ناڕەحەتی و سەرەوکوو  و سەرەچێروو ژیوای ئاوارەو جبەروو ماواو وێش کەرڎەن و پی بۊنەوە شارە جوانەکەو جوانڕۊیەنە ئەرەنیشتە بیەن و تا دما هەناسەش چاگە بیەن و جە  حاجی ئیبراهیمیەنە ئەسپەرڎە کریان.

"زیادتەر جە پەنجا میلۊدییاش هەنێ"

بەخشەی هونەرمەدنە تەمەنوو دوانزە ساڵیوە خولیاو گۊرانی واتەی هەورامییانە کەوتەن سەرەش و عەشق و وەشەسیای نیشتمان وماواکەش کەرەسۍ گۊرانییەکاشنۍ بە ڕۊحۍ بەرز و عەشقۍ ئاهووراییانە چڕیێنێش، لاو کەمیوە ساعیبوو زیاتەر جە 70ساڵا خزمەتین مەیدانوو گۊرانیۍ هەورامیێنە و هامشانوو مامۊسا عۊسمان هەورامی و مامۊسا جەمیل و مامۊسا حەمەحسەین کەیمنەیی نۊعەکاو سیاوجەمانەیش چڕیێنۍ و دەنگش چە وەرکەوت چە پانیشتەنە دەنگش دانۊ، ئینە جگە ئانەیە شارەزایاو دنیاو هونەری بە ئۊسای بێوێنەو بەزموو چەپڵا منیاشرەو ماچا کە کەمتەر کەسێوە بیەن پێسەو هونەرمەند بەخشەی هازەو واتەی چەپڵاش بیەبۊ، زیاتەر جە پەنجا مێلۊدیاش بە نامۍ وێشەوە هەنۍ  پێسە  "کرمان کرمانە" و "عەجەب فەڕبەخشەن" و"ئاوەدان جوانڕۊ" و"ئەی کەڵی مل بەرز" و  دەیان ئاوازێتەرێش پێشکەشوو فەرهەنگ و نەریتوو ئی وەڵاتیە کەرڎێنۍ، چەنی هونەرمەندی گەورە فەتحوڵڵای ئەمینی چند گەورە هونەرمەندای تەری ئی ئاوازێشە دێنۍ گۊشوو عاشقاو چاندی کوردیرە و زەماونەکانە داراو زەوقێوە هونەری شادی هەورامییانەی بییەن.

"نەواناش و تاوانش وێش شێعرۍ واچۊ"

شرەزایەکاو دەنگوو هونەرمەندی و ئشناسۍ بوارەکەی بۊنەو مەرگیشۊ نویستەنشا کە، بەخشەی هونەرمەند ئەوەڵ کەس بییەن دەف و دایێرەش ئارڎەنەنە دلۍ گۊرانیۍ هەورامیۍ و بۍ ئانەی کەسی فێر کەرڎەبۊ یا مامۊساش بیەبۊ، بە شێوازێوی ڕێکوپێک شمشاڵە (لوولێ)ش ژەنێنە و حەرچن بەداخۊ وانایش نەوانان و نەلان فێرگە وەلۍ تاوانیچش پەی وێش شێعرە بواچۊ. هامڕۍ و دۊسە نزیکەکێش و یاوەرەکێش ماچا گەورەتەرین خەسڵەتوو هونەرمەندی کۊچکەرڎەی قسەزانی و شۊخیکەرڎەیش بۍ و هەمیشە بە دڵفراوانیەوە بەرەو یانەیش کریاوە بۍ ڕوەو خەڵکوو جوانڕۊی و گردوو هەورامانیرە و تا ئاخرین ساتەکاو ژیوایش ڕەسەنایەتیی وێش جە گۊرانیۍ هەورامیۍ و جلوبەرگی پارێزناش و دەرسیوی گەورەش دا بە نەوەو دماڕۊی، کە هۊنەرمەند تا مەنەن مشیۊم خزمەت کەرۊ بە خەڵکەکەیش و نامێش پەی هەمیشەی پێسەو هەسارێوی پرشنگداری  و کەڵیوە ملبەرزوو هەورامانەکەیش گەشیۊوە و بمەنۊوە.

"مەرڎەیش کەلەبەرۍ وزۊ دلۍ گۊرانییە هەورامییا"

هونەرڎۊسا و شارەزایا بارەکەی دڵتەنگێنۍ بە کۊچکەرڎەیش و جگە بەروستەی هامخەمی پەی هەورامانی و بنەیانەکەیش هەست پا کەلەبەرەیە کەرا بوارەکەنە کە بەخشەی گەورە وستەنش مەیدانەکە و شارەزێکۍ ئەرەیاونانشا کە مەرڎەی مامۊسا بەخشەی ئینا وەختیوەنە، کە چاندی کورڎەوارییانە ئینا چێروو ڕەحموو جیهانوو مادەگەرایی و سسەرمایەدارینە و چاندی بێگانە هەڕەشی گەورێنە سەروو چاندی وێمانەی و چێگەوە دەنگوو بەخشەی پارێزنەروو چاندی هەقەتینی و وێمانەی بۍ و یەکڕاس ئاوۍ ڕۊشنەو نەوسوودۍ بۍ تەژنایی راویاراو ڕاو وەڵاتپارێزنی و وەشەسیای نیشتمانی ماڕۍ و سەروو ڕاو ئینسانیەتیوە ئازێماوە، ئینە جگە ئانەی هونەرەکەش ئیسەیچەنە هونەرمەندۍ ئیسەی ئەوەخوایس کەراوە و کاریگەرییش سەروو هونەرمەنداو ئیسەیۊ ئینکاری مەکریۊ، چە هەورامیواجەکۍ و چە سۊرانیواچەکێچ.