کژار: چنی ژەنی، ژیۋای، ئازاڎیی بەرەو ئاخێزوو ژەنا ملمۍ، پی رۆح و هوشیارییۆ ٨و مارسی جە گرڎوو ژەنا موبارەک کەرمی. بەیدۍ چی بۆنەنە رۆحی شۆڕشگێڵنانەو ژەنی، ژیۋای، ئازاڎیی جە گرد لێوەنە وەڵاکەرمۍ.
گلێرگەو ژەنا ئازاڎیی ۋەرکەوتوو کوردسانی (کژار) بۊنەو ٨و ئاداری ڕۊو جەهانی ژەنا رەنجدەری و کۊششکاریۆ ئەرەیاۋنێوەش وەڵا کەردەنۆ و چنەشەنە مبارەک بایی ئا ڕووەیشە جە ڕابەر ئاپۊی کەردەن، کە "ڕانیشندەروو گرڎوو ژەنان جە رەوتوو رزگاری و ئازاڎیینە". داوایچش جە گرڎوو ژەنا بەتایبەتی ژەنا ۋەرکەوتوو کوردسانی و ئێرانی کەردەن، کە بە شێوێوە کارا بەشداری جە هەڵمەتەو میان نەتەوەیی "ئازاڎیی پۍ عەبدوڵا ئۆجالانی، چارەسەری سیاسی پۍ پرسوو کورد"ینە کەرا، کە جە ١٠/١٠/ ٢٠٢٣ ێوە جە سەرانسەروو جەهانینە دەسشپنەکەردەن.
کژار حەرپاسە مبارەکبایچش جە ژەنا ۋەرکەوتوو کوردسانی و ئێرانی کەردەن کە بە تەماشەکەردەیۍ وەڵێکۊتەی " ژەنی، ژیۋای، ئازاڎیی " دەوری کاراشا بەئاراسەو فاڕیای ریشەیی جە ۋەرکەوتوو دلێڕاسەی و جەهانی گێڵنان و ئەرەیاۋنانش: "جە ئاسۆو یاوای بە ئازاڎینە بەرەو ڕوو قۆناغێوە تەروو کۊشیاکا ٨و ئاداری ملمۍ".
جە بەشێوە ئەرەیاۋناکەینە ئامان: " بە رۆحوو ۋێڕاگری ٨و مارسوو ٢٠٢٤، جە ۋەرا ۋەروو سیاسەتوو ژەنکوشتەی رژێموو کۆلۆنیالیستی ئێرانینە، پەرە بە رێکوزیا بیەی ۋێما مڎەیمۍ و یۆ گێرتەییما بەقووەت کەرمۍ. ئێمە بە گرڎوو جمیەرەکا ژەنا جە جوگرافیاو سیاسی ئێرانینە، بە ژەنا چالاکی، فیمینیستی، ئیکۆلۆژیکی و چالاکا ئازاڎیوازی ماچمۍ، کە فەلسەفەو "ژەنی، ژیۋای، ئازاڎیی" ئێمەش جە یۊترینی نزیک کەردۆ، چێگە بە دماوە پێویسا ئی یۆگێرتەییە زیاتەر پەرەش پنە بڎریۆ.
جە دمادمایینە؛ ئێمە بە " ژەنی، ژیۋای، ئازاڎیی " بەرەو ئاخێزوو ژەنا ملمۍ. پی رۆح و هوشیاریۆ، ٨و مارسی جە گرڎوو ژەنا مبارەک کەرمۍ. داوا جە گرڎ لێوەکەرمۍ کە جە ۋەرا ۋەروو فاشیزمی، پیاسالاری هەژمونگەرای و تیرۆریزموو دەوڵەتینە، ۋۍ بەڕێکوستەی و ۋۍ پارێزنایشا پەرەپنە بڎا و جە ۋەرا ۋەروو فاشیزمی، نەتەوەپەرەسی، رەگەزپەرسی، ئایینپەرسی و پۆزیتیڤیزمینە کە کۆڵەکەکۍ سیستموو پیاسالارینۍ، کۊشیانە! بەیدۍ جە ٨و مارسینە رۆحی شۆڕشگێڵنانەو " ژەنی، ژیۋای، ئازاڎیی " جە گرڎ یاگێنە وەڵا کەرمێوە".
