چی چن ڕووەو دماییەینە فاڕایۆ هێزیی سەروازیی پەدەکەی بە نامۍ پاسەوانوو سنوریوە بەردەواما. سەرەڕاو ئانەی میدیاو پەدەکەی و چاپەمەنییەکۍ تورکی بانگەشەو ئانەی کەرا کە ئی ئاژە حۊڵدایۍ سوپاو عێراقیا.

چا بارۆ ئەنڎامێوە وەڵینوو دەزگاو پارێزنای شێروان سەعید یوسف پۍ ئاژانسوو هەواڵوو فورات (ANF)ی قسێش کەردۍ و ئانەش بەروست، هێزێوە نیا بە نامۍ پاێزناو سنوروو عێراقیوە، ئا هێزەیی لووان ئا مەنتیقە گرڎ سەر بە هێزوو پەدەکەینۍ.

ئێ حۊڵۍ کە جە ئاکاموو سیاسەتوو پەدەکەی و دەوڵەتوو تورکینە ڕووە مڎا، پشێویێوە گەورەش دلۍ گەلوو مەنتیقەکەینە ۋنە کۊتەنە، مەڵامەتی سەرەکیش توڕەبیەو خەڵکیا جە پەدەکەی، کە جارێوەتەر چنی دەوڵەتوو تورکی خەریکوو ڕاوەبەردەی سیاسەتوو خەتەو خیانەت کەردەیا. ئی هەڵوێسەو پەدەکەی کە پانیشتوو کوردسانینە پێسە 'خەتەو خیانەتی' مشناسیۊوە، هەرچەنڎە شارۊشۆ، بە حۊڵەکاش جە دهۆک و شیلادزێنە جارێوەتەر ئاشکرابیەن.

'ئا هێزەی لووان پۍ شیلادزۍ هێزوو پەدەکەیا'

جە دیمەن و وێنەکانە بە ئاشکرا ئانە بەرگنۆ کە ئا هێزەیی لووان پۍ مێڎانوو گەریلای، هێزەکاو سەر بە گوڵانی، دەزگاو پارێزنای و زێرەڤانی مەسرور بارزانیینۍ. میدیاو پەدەکەی جە ڕۊی یووەمۆ حۊڵوو شێونای ئی حەقەتینەیە مڎا. بەڵام ئەندامێوە وەڵینوو بەشوو هەواڵگری دەزگاو پارێزنای پەدەکەی شێروان سەعید یوسف حاجی ئانەش وست ڕووە، ئا هێزۍ کە پێسە هێزەکاو پارێزناو سنوری عێراقیوە جە میدیاکانە باسۍ کریا، سەر بە سوپاو عێراقی نیەنۍ. حاجی ئاماژەش پانەی دا هیچ هێزێوە عێراقی مەتاوۆ بە نامۍ جیاوازۆ بێنە کوردسان و واتش: "ئی هێزۍ گەر بەنامۍ پاسەوانوو سنوریوە بۆ یان هەر نامێوە تەری، کە لووێنۍ دهۆک و شیلادزێ، گرڎ پێشمەرگۍ مەسعود بارزانینۍ. هیچ هێزێوە عەرەب جە دماو کەرکوکی و موسڵیوە قبوڵ مەکەرا بەشدارۍ هەرێموو کوردسانی با. ئا هێزۍ ‌هێزوو عێراقی نیەنۍ. ڕاسا پەشتیوانی لۆجیستی و مەعاشا جە حکومەتوو دلێڕاسەیۆ مۍ. بەڵام هێزێوە سەر بە سوپاو عێراقی نیەنۍ. تەنیا بە قەراروو مەسعود بەرزانی جماوە، بە حیچ قەرارێوە عێراقی مەجماوە. ئانۍ گرڎ هێزۍ پەدەکەینۍ."

'ئامانجوو ئی هێزا دژایەتی کەردەی پەکەکەیا'

حاجی سەرەنجش وست سەروو ئامانجوو ئا هێزا کە بە نامۍ پارێزنای سنوریی عێراقیوە لووێنۍ هەرێمەکە و واتش: "ئامانجوو لووای ئی هێزەیە پۍ جەنگ کەردەین دژوو پەکەکەی. گەرەکشا بەنامۍ هێزوو عێراقیوە چا مەنتیقەنە بنە وزۆ. پەکەکە هێزێوە وڵاتپارێزا، قەراری بنەڕەتی پەکەکەی ئانەن کە جە دژوو حیچ هێزێوە کوردی جەنگ نەکەرۆ. گرڎ وەختۍ ئینەش نیشانە دان. من چنڎی کەڕەتۍ شایەتوو ئینەی بێنا. وەختۍ پەدەکە هجومش کەرد سەروو هەرێمەکاو پەکەکەی، پۍ ئانەی جەنگ ڕووە نەڎۆ، پەکەکە چەکش ۋەران ۋەر بەرزنەکەردۍ. پەکەکە متاوۆ ۋەران ۋەروو پەدەکەینە جەنگ کەرۆ هێزوو ئانەیش هەن، بەڵام پەکەکە پۍ گەلەکەیش جەنگ کەرۆ. ئی ئاژەیە ۋەرووچەما گێرا."

حەرپاسە حەجی پەیوەس بە ئاژەو زینڎانەکا پەدەکەی و چنڎین مژارۍ تەریۆ پۍ ئاژانسیما قسێش کەردۍ.