کتیٛبو (مانائەشناسای و مەبەستئەشناسای- سیمانتیک و پراگماتیک) چاپ و پەخش بی
تازەتەرین بەرویرو د. ناجح گوڵپی چیٛرو چاینە ئامابەر، ئینە چوارەم بەرویرەن کە نویسا بە زونو گوٙران- هەورامانی مەنویسوٙنەش جە ویارو زوانئەشناساینە، ئینەشان تایبەتەن بە ویارو مانائەشناسای و مەبەستئەشناسی،  کتیٛبەکە جە شش لیٛژا (chapter) سازیان و(430) پەلیٛن بە قەوارەو 24*17 . زوان ئەشناسای جە یەریٛ کوڵەکان وەش بییەن (دەنگ، ساختار، مانا)، کتیبە وەڵینەکانە باسو هەردوە کوٙڵەکەکان کریان و ئەچی کتیٛبە تازەنە باسو کوٙڵەکیٛ یەرەمیٛ، هەکە مانانە کریان، دیارەن مانا دویٛ جوٙریٛنە مانای سیمانتیکە و مانای پراگماتیکیە، ئی دویٛچە چندەها جوٙریٛ تەریٛش چەنە پەیدا مەبانیٛ، با پیٛوەرە بلمیٛنە دلیٛ کتیٛبەکەی بزانمیٛ بابەتەکیٛش باسو چیٛشی مەکەرانیٛ: 
کتیٛبەکەکە جە دویٛ شیپان سازیان، شیپی یوەم مانا ئەشناساین کە پەنج لیٛژیٛ مەگیٛروٙنە ویٛ  جە  دووە سەڎ پەلان سازیان. شیپی دوەم مەبستئەشناساین، کە لیٛژەی پەنجەم و ششەمینە ڕاش بییٛنەوە و دووە سەڎ پەلیٛ زیاتەر مەگیٛروٙنە ویٛ. 
لیٛژەی یوەمنە باسو مانائەشناسای و بنەرەتە سەرەکیەکیٛ مانای کریان، پیٛسەو گلکەنیشانی، جوٙرەکیٛ مانای، مانای ویرییە، مانای فەرهەنگیە، ئەرکیٛ مانائەشناسای و تایبەمەندیی مانا ئەشناسای، مانای هەرەقەتینە و مانای مەجازیە، ئەژناسەو مانا ئەشناسای، پەیوەندی مانا ئەشناسای بە زانشتەکانی تەریوە، هەرپاسە دەسەبەندی مانائەشناسای. 
لیٛژەی دوەم باسو هیٛمازانی و مەفهومو هیٛمای مەکەروٙن، هیٛمای زوانیە و هیٛمای نازوانیە، چەنی پەیوەندی مانازانی و زوانئەشناسای، دنڎە مانایەکیٛ زوانی، حەننڎیٛ مانای و بنچینە ومانای، پیمانەو مانای، پەیلوای و لەیەکەودای مانای جە کوٙتانە جوٙرەکیٛ مانای باس کریێنیٛ. 
لیٛژەی یەرەم باسو ماناو واتیٛ، لیٛڵی ماناو واتیٛ، فرەمانا، هامدەنگ، پەیوەندیەمانایەکیٛ، پەیوەندی تانی، پەیوەندی پوٙیی، هام مانا، دژمانا، پوٙژنای، گیٛرتەیویٛ، ناسازگاری مانای، پەیوەندی فەرهەنگی واتیٛ، هەمان نامیٛ و هەمان ویٛنە، میتوٙنومی. 
لیٛژەی چوارەمنە باسو مانائەشناسایو واتچنی کریان، ئەرکش چیٛشەن، ماناو واتچنی جە وینگاو کاتزی فۆدەریوە، تیورەکیٛ کاتزی فوٙدری. ساختاری قوڵو واتچنی، مانای لوجیکیەو واتچنی،  گەشەو فاڕیای مانای، فراوان بییەی مانای و تەسکۆبییەی مانای.
لیٛژەی پەنجەمنە باسو مەبەستئەشناساین، تاریخو سەرهوردای مەبەست ئەشناسای، کوٙشەنو مەبەسئەشناسای، ئەژناسەو مەبەستئەشناسای و ئەرکیٛو مەبەسەستئەشناسای، جوٙرێو مەبەستئەشناسای. پراگماتیک وپراگماتیزم، پەیوەندی میانو مانائەشناسای و مەبەستئەشناسای، دنڎە ماندارەکیٛ مەبەستئەشناسای. واتەی،واتمان، وات و واچ، وەروپەشت، جوٙریٛ وەرو پەشتی، نیشانیٛ و دوری، جوٙریٛ نیشانیٛ، وەرو پەشت و هامدەق، وەڵگریمانیٛ، چەنەکەوتەی، وجوٙریٛو چەنەکەوتەی، کەردەوەو واتەی، کەردەوەو واتەی ویٛڕاس و ناویٛڕاس، دەسبەندی کەردەوە واتەی، کەردەوەو دوای و ئیٛژانە، جیاوازی مانای سیمانتیکیٛ و مانای پراگماتیکییٛ. 
لیٛژەی ششەم باسو شیکەردەی واتمانین، ئەژناسە و لەیەکەودای واتمانی، قومیای قسیٛ، بنەڕەتەکیٛو هامکاری،  مانای ناویٛڕاسە، مانای ضمنیە، بنەڕەتیٛ شیکەردەی وات و واچی، نوٙرەگیٛرتەی، دووەقوٙڵی واتەی، ساختاری پەسەنڎ، قەتارەو واتەی، ڕیٛکوستەی پەسەند، ڕشکوستەی وات و واچی، دمایی ئامای وات و واچی، ویٛڕنیەیرە جە وات و واچی، دما بەش فەرهەنگو وات و دەسەواتی زانشتین (گلۆسەری Glossary ).