هامسەرۆکۊو جەمەو چەمڎاری و ئەوەکۊڵیای کۆچو میزۆپۆتامیای (گۆچ-دەر) مەدیا ئاڵکانە ماچۆ؛ ئامانجی سەرەکی سیاسەتەکاو کۆچکەردەی ئانەنە کە جوگرافیاو کوردەسانی بێ ئەرەنیشتاش بازاوە.

مەدیا ئاڵکانە واتش: "جە ساڵەکا نەوەڎەکاوە دەگایەکې چۆڵې کریې. دۊڵەت هەوڵ مڎۆ شارەکاو بەپاو ویستو ۋێش دیزاین بکەرۆ. گەرەکشانە شارەکا کوردەسانی بە سیاسەتو کۆچی جە شناسنامەیشا دوورې وزیاوە. بە تایبەتی جە ساڵانی دماینە کۆچ پەی ئۊرووپای زیاڎش کەردەن. ئی ئاژە بە زانابیەی دۆڵەتی پەرەش پنەدریان. دۊڵەت گەرەکش نیا جوانې ڕێکوزیا بۆنە. هەرپاسە هەوڵمڎا جوانې کوردی جە خاکو ۋێشا دوورې وزاوە."

'مەشۆم دۆڵەت ۋەرپرسیاری گێرۊنە ئەستۆ'

جە دمادمایی قسەکاشەنە مەدیا ئاڵکانە ئاماژەش پا کۆچا دا کە جە وەختو جەنگینە وەشێبیێنې و واتش: "پرسو کۆچی تەنیا پرسو گەلی نییا، جە هەمانکاتەنە پرسو دۊڵەتیچا. مشۆم دۊڵەت ۋەرپرسیاری ئینەی جە ئەستۆ گێرۊنە. چنی دەگایەکێشا چۆڵې کەردې، بەهەمان شێوە مەشۊم ڕاو گێڵایۆ پەی دەگایەکا بکەراوە.

جە چوارچێوەو حەفتەو کۆچینە، لوایمې پەرلەمان و چنی پارتە سیاسییەکا سەبارەڎ بە گېڵایۆ پەی دەگایەکا گلېرې بیەیمېوە. جە کۆنگرێوە ڕۆنامەوانینە پەی گێڵایۆ پەی دەگایەکا بانگەوازما کەرڎ. هەم کۆچی ئابووری و سیاسی، هەم ئا کۆچې بەمەڵامەتو ڕژێمیوە وەشې با. بە گێڵایۆ پەی دەگایەکا، متاویۆ ڕاگیری چینەی بکریۆ. پېوەس پینەیە دیدو سەرنجما هەن؛ پەی جابەجێکەردەیشا کۊشش مکەرمې."