ئەندامەو کۆمیتەو ناوەندی و سکرتێرەو کاروباری مېیاننەتەوەیی ١٥ەمین کۆنگرەو پارتو کۆمۆنیستی ئەفریقای پانیشتی مۆلی دلامینیە کە بەشداریش جە ٣٢ەمین فێستیڤاڵی مېیاننەتەوەیی کولتوری کوردینە جە فرانکفۆت کەردەبۍ قسێش پەی ئاژانسوو هەواڵوو فوراتی (ANF)ی کەرڎۍ و واتش: "پەشتیوانی جە دۆزو گەلوو کوردی و ئازاڎی جەسەیی رابەرو گەلوو کوردی عەبدوڵا ئۆجالانی مکەرا".

' مشۆم ئیتر عەبدوڵا ئۆجالان ئازاڎ بکریۆ'

دلامینیە باسش چانەیە کەرڎ کە پەی بەربڕیەو ئا پاڵپەشتییە بەشدارییش جە فیستیڤاڵی مېیاننەتەوەیی کولتوری کوردینە کەرڎەن و ئەرەیاۋناش، "بەپەیلواو من ئامایما پەی ۋۍ فرە گرنگا. چونکی ئێمە و گەلوو کورڎی پەی چارەنوویسیما ئەرەکۊشمۍ ئێمە پەشتیوانی جە گەلوو کورڎی مکەرمۍ کە پەی ئازاڎی عەبدوڵا ئۆجالانی، کولتور و زۋانەکەیشا ئەرەکۆشۆ".

'گۆشەگیری پاشێلکەردەی مافو مرۆڤیا'

دلامینی ئاماژەش بە گۆشەگیری رەهاو سەرو ڕابەر عەبدوڵا ئۆجالانی کەرڎ و واتش، "رابەرو گەلوو کوردی عەبدوڵا ئۆجالان ٢٥ ساڵېن ئینا زیڼانەنە. گۆشەگیری ٢٥ ساڵۍ، ماوێوە فرەن. پېسە مزانیۆ نێلسۆن ماندێلایچ ئانڼە زیڼانەنە بۍ، بەڵام پېسە عەبدوڵا ئۆجالانی گۆشەگیرینە نەبۍ. لاوکەمیۆ بڕۍ کەسێش چنی بێنۍ. عەبدوڵا ئۆجالان دلۍ زیڼانو دوورگەکەینە ؛دلۍ گۆشەگیرینە راگیریان. ئانە پاشێلکەرڎەی مافەکا مرۆڤین. گەلوو ئەفریقای پانیشتی بە تنی پەشتیوانی جە مافەکا مرۆڤی مکەرۆ، ئێمە گەرەکمانە و داوا مکەرمۍ عەبدوڵا ئۆجالان ئازاڎ بکریۆ و ئی دۆزە بیاوۆ بە ئەنجام و چارەسەرۍ."

' ئێمە پەشتیوانۍ ئەرەکۊشای گەلوو کوردینمۍ و ئینایمۍ چنیش'

جە درێژەو قسەکاشەنە دلامینیە بە ئاماژەدای بە ئەرەکۊشای گەلوو ئەفریقای پانیشتی و گەلوو کوردی بۆنەو زۋان و کولتورەکەیشاوە واتش، "نکۆڵیکەردەی جە کولتور و زۋانی، پاشێلکەردەی مافەکا مرۆڤین، ئێمەیچ جە ئەفریقای پانیشتەنە پەی زۋان و کولتورەکەیما ئەرەکۆشێنمۍ، هەرپۊکەی پەشتیوانی جە ئەرەکۊشای گەلوو کورڎی مکەرمۍ پێناوو کولتور و زۋانەکەیشەنە. داوا جە گرڎو ئاشتیوازا و داکۆکیکارا مافەکاو مرۆڤی مکەرمۍ کە پەشتیوانی دۆزو کوردی بکەرا پەی ئانەی کوردەکۍ بتاوا بە کولتور، ئایین، نەریت، زۋان و جلوبەرگو ۋێشاوە بە شێوێوە ئازادانە بژیۋا".

'زۋان شناسنامەو مرۆڤەکان'

دلامینیە یاڎش ئارڎۆ کە مانگەو ئەیلولی جە ئەفریقای پانیشتەنە مانگەو میراتی و کەلەپورین و ئێمە جە گرنگی میراتی، کولتوری و زۋانی میاومێنە. کاتو ۋێش ئێمە جە دژو قەڎەغەکەردەی زۋانەکەیما جە ۋەننگەکانە دەسما بە ئەرەکۊشای کەرڎ. مشۆم مرۆڤ شناسنامەو ۋێش پارێزنۆ، چونکی زۋان شناسنامەو مرۆڤەکان. پەیامو من پەی گەلوو کوردی ئانەنە کە هیوا نەدۆڕنا. کاتو ۋێش ئێمەیچ هیواما جە دەس نەڎا، واچێنۍ کە حەجگیز ئەرەکۊشاکەیما نمەیاوۆ ئەنجام، بەڵام دماجار یاوا ئەنجام. پۊکەی داوا مکەرمۍ گەلوو کوردیچ هیواو ۋێشا نە دۆڕنا، درێژە بە ئەرەکۊشایشا بۆنەو مافەکا مرۆڤیۆ بڎا و پا گیرتەرۍ با سەرو داواو ئازاڎیی عەبدوڵا ئۆجالانی".