ئارین میرکانە با چالاکییە فیداییەی جە گرد و مشتەنووری کەردش، داعشش مدرنا؛ سەرمەشقایەتی ژەنێش جە شۆڕشو وەرنیشتینە وست ڕۆژەڤو جەهانیۆ، پێسە و زیلانێ (زەینەب کناجی) و بێریتانە (گوڵناز قەرەتاش) میراتو مڏرامان و ژەنێ کوردیس بەردەوامی پنەدا.
بڕێ کاتێ هەنێ جە تاریخو گەلێوەنە درەوشییاوە؛ پێسە و ئەفسانێوە، پێسە و ئێرێوە دلێ نەوەکانە دەنگ مراوە. ٥و تشرینو یوەمو ٢٠١٤ پەی تەڤگەرو ئازادیی کوردی ساتێوە چانە بێ. ئارین میرکان میراتو زیلانێش بەمیرات گێرت و جە گرڏ و مشتەنوورو کۆبانێ بە چالاکیی فیدایی جە دژو داعشی مڏرامانێوە داستانیشا نیشانەدا.
ئازای ئا ئەوەکۆشای ئازادیی ژەنیش کەردە سیمبوڵێوە مییاننەتەوەیی؛ ڕوحیەتو پۆڵایینو گەلوو کوردیش جە تەمامو جەهانینە وەڵاکەردۆ.
ئارین میرکانە ساڵە و ١٩٩٢ جە دەگاو میرکان (حوسێ)ـی ناوچەو ماباتو کانتۆنی عەفرینی وەرنیشتوو کوردەسانی جە ئەڏابیییە. ئارینە کە نامێ حەقەتینێش دلارا کێنجەنە، دلێ بنەیانێوە کوردو وڵاتپارێزنەرە گۆرێ بیێنە.
زاڕۆڵەی ئارینێ بە بەها دۆڵەمەندەکا کلتوور و کوردی ویەردەن. کاتێ جە دەگا بێنێ مەیلو ئارێ پەی گێڵای شۆن و دادپەروەریی و ئازادیرە دیار بێ. ئارینە کە وانایش جە دەگا و میرکانی تەمام کەرد، ڕووەدایێش کە جە وانینکەنە سەرەرە ئاما، ناسنامەو کۆششکارییەکەیش بەهێزتەر کەرد.
مامۆستاکەش سوکایەتیش بە بازنەکەو دەسیش کەردەن کە نوسینی کوردییش سەرۆ بییەن. ئینە تووڕەیی ئارینێش وەراوەرو سیستەمەکەی گۆرە کەرد. ئی ڕووەدایە پەی ئارینێ کە ئەوەکۆشای ئازادیی کوردەسانیش وەش کەرەک بێ، بی بە کاتو قەراردای.
بەشداریکەردەی دلێ ئەوەکۆشای ئازادی
ئارین میرکانە ساڵە و ٢٠٠٧ کە هەڵای ١٥ ساڵە بێ قەرارش دا کە بێنە دلێ ڕیزەکا تەڤگەرو ئازادیی کوردەسانی. ئی قەرارە یۆبئ جە هەنگامە هەرە گرنگەکا ژیوایش. هەڵوێسی وڵاتپارێزیی بنەیانەکەیش و سەرسامییەکەیش بە فەلسەفەو ڕابەر ئاپۆی، بیێ پاڵنەرو سەرەکی کە ئاریناشا وستە سەرو ئی ڕێ.
کاتێ داعش هرووژمش کەرد پ سەر و وەرنیشتی، ئارینە ئاما دلێ ڕیزەکا پارێزنا و ژەنێ (یەپەژە)ی، ئەوەکۆشایش قووڵکەردۆ و جەماوێوە کەمەنە لوا دلێ دڵو هامڕییەکاشۆ . ئارین کە دەم بەخەندێ بێ، دڵگەرمە و خاوەن کارەکتەرێوە بەهێزە بێ،
دلێ ڕیزەکا یەپەژەینە پێسە و جەنگاوەرێوە ئەوەکۆشای ژەنێ بەرەکەوتە.
مڏرامان و کۆبانێ و گردو مشتەنووری
ساڵ و ٢٠١٤ بێ، پەی وەرنیشتوو و کۆبانێ ئەزموونێوە تاریخی بێ. داعش بە قورسترین چەک بەشێوی دڕندانە هرووژمش کەرێ و هەوڵیدێ کۆبانێ ئەرەگیر بکەرۆ. ئا تەوقەی کە جە ١٥ـو ئەیلوولو ٢٠١٤ دەسش پنەکەرد، ڕووبەرووو مڏرامان و داستان و جەنگاوەرا یەپەگەی و یەپەژەی بییۆ.
ئارین میرکانە جە پارێزنا و کۆبانێنە بە دەورێ گرنگ هور ئێستە. داعش جە ٥ـو تشرینو یوەمی ٢٠١٤نە پەی بەدەسئاردە و گردو مشتەنووری دەسش بە چن هرووژمێوە فرە قورسی کەرد. جە گردەکەنە کە جەنگەکە قورس بێ، هێزەکا یەپەگەی و یەپەژەی بە جبەخانێوە کەم و دلێ هەلومەرجێوە قورسەنە جەنگشا کەرد. گردو مشتەنووری جە ڕوانگە و کۆنتڕۆڵکەردە و شارەکەی گرنگییێ ستراتیژییش بێ.
ئارینە کە چنی گرووپێوە کوڵانەی وەراوەرو داعشی جەنگ کەرێ، پەی مدرنا و ئامای وەڵێ چەتەکا هەنگامەش نییا . لوا دلێ چەتەکا داعشی، وێس تەقناوە و چالاکیی فیداییش ئەنجامدا.
ئی چالاکییە بە دەیان چەتێ داعشیش دلێنە بەردێ و پلانە و چەتەکاش پەی بەدەسئاردە و گردەکەی تێکدا. جە ئەرەیاونا و فەرمیی یەپەژەی ە ئاماژە پانەی کریان کە چالاکیەکەیپو ئارینێ 'ڕوحیەت و مڏرامان و کۆبانێ و سەرمەشقایەتی ژەنا دلێ ئەوەکۆشای ئازادی' نە نیشانەدا.
کاریگەریی چالاکییەکەی جە ئاستو ناوچەیی و مییاننەتەوەیینە
چالاکیەکەو ئارین میرکانێ جە گردو مشتەنووری مڏرامان و کۆبانێش وست ڕۆژەڤو جەهانیۆ. بوێریی ئارێ جە دژو دڕندەیی داعشی ویژدانو ئینسانیش ئاگادار کەردۆ. چالاکییەکەو ئارێ نەک تەنیا جە کۆبانێ، جە تەمامو کوردەسانی و جەهانینە دەنگش داوە.
جە سەرنیشتوو کوردستانی ڕوانە ٦-٨ـی تشرینو یوەمی ٢٠١٤ بەبۆنەو چالاکییەکەو ئارینێوە، پەی پەشگیرکەردەی کۆبانێ چنین چالاکییێ گۆرێ شەرمەزارکەردەی ئەنجام دریێ.
جە فرە و وڵاتا، دۆسێ گەلوو کوردی و لایەنگرا ئازادی ئامێ سەر و مێڏانەکەی و پەشتگیریشا پەی مڏرامان و کۆبانێ بەربڕی. چالاکیەکەس ئارینێ دەورێ گرنگش وینا چانەی ڕۆو ١ـو تشرینو دووەمی پێسە و 'ڕۆو جەهانی پشیوانیکەردەی کۆبانێ' ئەرەیاویۆنە.
چالاکیەکەو ئارینێ جە هەمان کاتەنە سەرمەشقایەتی ژەنێش جە شۆڕشو وەرنیشتینە کەرد سیمبوڵێوە مییاننەتەوەیی.
ئی چالاکییە جە سەرانسەرو جەهانینە ئیلهامبەخش بێ پەی ئازادی تاوەکو بلانە دلێ ڕیزەکا یەپەژەی و یەپەگەی.
ئارینەیش پێسە و زیلان (زەینەب کیناچی) و بێریتان (گوڵناز قەرەتاش) درێژەش بە میراتو مڏرامان و ژەنا کوردی دا و بە جەهانیش نیشانە دا کە ژەنی کوردێ تەسلیمێ مەبا.
