هامسەرۆکو گرڎیی دەبەپەی کەسکین بایندر جە کۆنگرەو مەبیا-دەرینە قسێش کەردۍ و واتش: "مەشۊم ڕۆژەڤی سەرەکیما یۊبیەی نەتەوەیی بۆ. هەرپاسە گەلو کوردی مەشۊم هێز و هەوڵدایەکاش پەی بە دی ئاوردەی کۆنگرەی نەتەوەیی بەکار بارۊنە."
جەمە و هامکاری و پەشتیووانی بنەیانە و بێسەروشۆنکریایا لانکەو شارستانیەتی (مەبیا-دەر) چوارەمین کۆنگرەو ئاسایی جە لە تەلارە و زەماونێنە جە ئامەد بە دروشموو "ئاشتی و گلێرگە و دیموکراتیک" ی ئەنجام مرۆنە. هامسەرۆکو گرڏی پارتو هەرێمە دیموکراتیکەکا (دەبەپە) ی کەسکین بایندەر، واتەواچوو ئەنجوومەنو ژەنا پارتو یەکسانی و دیموکراسی گەلا (دەم پارتی) خالید تورکئۆغڵو، هامسەرۆکا شارەوانی، پەرلەمانتارا و نوێنەرو فرە جە ئەرەمەزییەکا ئامادێ بێنێ.
جە تەلارە و کۆنگرەکەیند لافیتێ بە نووسینی "بە دیدگای 'ئاشتی و گلێرگە و دیموکراتیک' ی سەرگنمێ" و وێنەو ڕابەر ئاپۆی و کادرا سەرمەشقێ پەکەکەی عەلی حەیدەر کایتان و ڕەزا ئاڵتون هورواسیێ. کۆنگرەکە بە دەقێوە ڕێزگێرتەی دەسش پنەکەرد و چنین جارێ دروشموس "گەشمەرڏێ ،ە،را" بەرزکریاوە.
هامسەرۆکو مەبیا-دەر محەمەد ئەمین کلیچ دما و هورچنییە و دیوانەکەی قسێش کەردێ و ئاماژەش پانەی دا مەبیا-دەر بەشێوە گرنگو ئەوەکۆشاین واتش: "پەی فراوان بییە و ئی ئەوەکۆشایەی، مەبیا-دەر بەهێزتەرین خەباتەکا ئەنجام دێ."
دماتەر سەرۆکو جەمە و شێخ سەعیدی و نەوەو شێخ سەعیدی قاسم فورات قسێش کەردە و ئاماژەش پانەی دا گەلوو کوردی ئارۆ پێوەرە گەشمەرڏاشا یاڏوسمێ و واتش: "گەشمەرڏەکێما، شکۆمانێ. سەر و ڕێچکەو ئاریشا بەردەوامێنمێ."
هامسەرۆکو مەبیا-دەر کەرەم جانپۆڵاتیش واتش: "بنەیانەکێما تەنیا یەک داواکاریشا هەن؛ ئاریش ئانەن بەهاکاشا جە یاڏنەکەرمێ، خاوەندارێتی جە ئەوەکۆشایشا بکەرمێ".
هەرپاسە ئەڏیاو ئاشتی نەزاهەت تەکێ ئاماژەش پانەی دا ئەر ئارۆ باسو پڕۆسێوە مکەرا؛ مشۆم دۆڵەتیش بە پاو ئاری هەنگامە بنیۆ و واتش: "بانگەواز جە ئەردۆگانی و باخچەلی مکەرمێ؛ دەسو ئێژا ئۆجالانی گێرا و ئانەی پەنەوازا ئەنجامش دانە. ئەڏایایا ئاشتیشا گەرەکا. ئەڏێ ئیتر سەر و ئی خاکەی ئێشا گەرەک نییا."
جە دماینە هامسەرۆکو گرڏی دەبەپەی کەسکین بایندەر قسێش کەردە و ئاماژەش بە سەدهەمین ساڵیاڏو جە قەنارەدای شێخ سەعید و هەڤاڵاش کەرد و واتش: "ساڵیاڏو جە قەنارەداو شێخ سەعیدیا. ساڵیاڏ و جە قەنارەداو ڕابەر و سەرمەشقو گەلوو کوردین. سەرو ڕێزی وەردەمو گرڏ و گەشمەرڏا و جەنگاوەراما منامنمێرە. کاتێ شێخ سەعید لوا وەردەموو پەتە و جەقەنارەی واتش "مشۆم نەوەکێم شانازیم پۆوە بکەرا و با من ڕوو سیاو نەبوو." ئێمەچ ئارۆ واچمێ بە دەیان هەزار نەوێ تۆ ئینێ چێ و شمە ڕوو سیاو مەکەرا . تاریخو کورد و کوردەسانی بە سەدان ساڵێن بە کوشتەی و قڕکەردەی ویەردەن. جە هەر بستێوە خاکو کوردەسانیمە زوڵم ئەنجام دریان. جە لێوە زوڵم و زۆرداری هەن، بەڵام لێوەتەرۆ کە شانازیش پۆوە مکەرمێ، سەر و هەر بستێوە ئی خاکەی ئەوەکۆشای و مڏرامان هەن. ئی ئەوەکۆشای و مڏرامانا ئارۆ پڕۆسێوەش دەسپنەکەرد.
ئانە نییا کە دۆڵەت دۆسو ئێمەن ئی پڕۆسەش دەسپنەکەردەن. ئی پرۆسە کە ڕابەر عەبدوڵا ئۆجالان بە پڕۆسەو 'ئاشتی و گلێرگە و دیموکراتیکی' نامێش بەرۆ، بە ئەوەکۆشای گەلوو کوردی و تەڤگەرو ئازادی کوردەسانی پەرەش سانان. بە هەڵوێس و ئەوەکۆشای ڕابەرا ئێژا ئۆجالانی پەرەش سانان."
واتیشش: "هەر بستێوە کوردەسانی بە ئەوەکۆشای و مڏرامان بە دەسئامان. جە سەرانسەرو جەهانینە ئارۆ باسو کوردی و ستاتۆو کوردی کریۆ. ئینەیش ئانەی نیشانە مرۆ کە کورد ئیتر ئینا چنی ڕابەر و ئەوەکۆشایێ هێزێوە جەهانی.
جە دماینو قسەکاشەنە کەسکین بایندەر ئاماژەش پانەی دا پەی ئانەی ستاتۆ بەدەس بێنە، پەنەوازیما بە ڕێکوزتەی و یۆبییەی هەن و واتش: " ڕابەر عەبدوڵا ئۆجالان جە ساڵە ق٢٠١٣ نە بانگەوازش جە سەرمەشقا کوردی، پارتە کوردییەکا کەرد، گەرەکشا چێرو چەترێنە بێ دی. گەرەکش بێ چێرو چەترە و کۆنگرەو نەتەوەی کوردەسانینە گرڏو هێزە کوردەسانییەکا یۆگێرانە و پارێزنای جە گەلوو کوردەسانی بکەرا. گەرەکش بێ پارێزنا و یاسێ و دیپلۆماسی بەرە و وەڵێ بەرا. هەرپاسە ئارۆ جارێوەتەر ئێژا ئۆجالان بانگەوازو کۆنگرەو نەتەوەی کوردەسانی مکەرۆ. ئێمەچ چێوە بانگەواز جە گرڏ و ئەرەمەزییەکا و ڕێکوزتەکا سەرانسەرو کوردەسانی مکەرمێ. ماچمێ دەنگتا با پاڵو دەنگو ئێژا ئۆجالانینە بۆ. ئی پەرسێ پەرسە و ئاینەدە و گەلو کوردیم. چونکە جە هەر چواربەشو کوردەسانینە جەنگ هەن. کورد بە دابەش بییەی مەتاوۆنە وێش پارێزنۆ، بەڵام جە هەر چواربەشو کوردەسانینە هێزما هەن. مشۆم چێرە و چەترە و کۆنگرەو کوردەسانینە گەلەکەیشا پارێزنا. ستاتۆو وێشا مسۆگەر بکەرا. ئێمە ئینەی فەرز مکەرمێ. پەی ئینەی مشۆم خەبات بکەرمێ."
دما و قسەکاش، بەڵگە فلیمێوە نیشانە دریا. ڕاپۆرتە و دارایی و خەباتەکێ ونریێوە و دماتەر بە یەک لیست هورچنییەی ئەنجامدریا. غوربەت سەڤیکتەک ئاری و ڕەمەزان دەنگیز پێسە و هامسەرۆکێ تازەێ مەبیا-دەر هورچنیێ.
