کۆپنهاگو پایتەختو دانیمارکینە یاڏ و زەینەب کناجی (زیلان)، گەریلاو پەکەکەی کە جە ٣٠ی حوزەیرانو ١٩٩٦ جە دێرسیمەنە چالاکیی فیداییش دژو سوپاو تورکی ئەنجامدا، جە ٢٩هەمین ساڵیاڏ و چالاکییەکەینە یاڏە کریاوە.
جە ساڵیاڏ و چالاکییە فیداییەکەو گەشمەرڏە زیلانی کە جە ٣٠ی حوزەیرانو ١٩٩٦ جە دێرسیمەنە لواڕاوە، ئەنجومەنو ژەنا سێوەی جە دانیمارکەنە مەراسیمێوەشا بەرد ڕاوە.
مەراسیمەکە جە مییانو جەمە و دیموکراتیکو کوردا شارو کۆپنهاگی لواڕاوە، جە ناوچە جیاجیاکا کوردەسانی جەماوەرێوە فرە بەشداری مەراسیمەکەی بیێ.
سەرەتاو مەراسیمەکەی بە دەقێوە بێدەنگی پەی یاڏ و گەشمەرڏە زیلانێ دەسش پنەکەرد. دماتەر نۆپەل مونزور بە نامێ جمیەرە و ژەنە کوردا ئەوروپای (تەژەکە-ئەوروپا) قسێش کەردێ و سەرەتا بەڕێزدارییۆ یاڏ و گەشمەرڏە زیلانێ، سەما یۆجە، گوڵان گارزان، لەیلا ئاگریە، بێریڤان زیلانە، ڕاپەڕین ئامەد، بێریتان نورحەق چیا و گرڏ و گەشمەرڏا مانگە و حوزەیرانیش کەردۆ.
نوپەل مونزورە چالاکیە فیداییەکەو زیلانێش پێسە و ئیلهامو ڕۆحو مڏرامان و ژەنا جە وەراوەر و سیاسەتەکا نکۆڵی و پاکتاوکاری دژو گەلوو کوردی، پیلانگێڵی مییاننەتەوەیی و کۆمکوژی دێرسیمی وەسف کەرد و واتش: "فیداکاریی هەڤاڵ زیلانێ و ژەنە کۆششکارا و سەرمەشقێ کە جە مانگە وحوزەیرانینە گەشمەرڏێ بیێ بۆنە مەڵامەتو بەردەوامی ئەوەکۆشای و ژیوای ئێمە."
نوپەلە جەختش چانەیش کەردۆ کە جە چوارچێوەو پارادایمو ئازادی ڕابەر ئاپۆی، ژەنی مشۆم دەوری سەرمەشق جە فاڕییای کۆمەڵایەتی و بنیاتنیای گلێرگە و دیموکراتیکینە گێڵنا، هەرپاسە پەنەوازا ژەنی جە گرڏ و بوارەکانە وێشا بە ڕێکوزتەی بکەرا.
دما و قسەکا کورتە فلیمێوە دوکیۆمێنتاری سەر و ئەوەکۆشاییەکا گەشمەرڏە زیلانێ و ژەنا کۆششکارێ تەرێ کە جە مانگە و حوزەیرانینە گەشمەرڏێ بیێ، نمایشکریا.
مەراسیمەکە بە واتەیۆ دروشموو "گەشمەرڏە مەمرۆ" و "ژەنی، ژیوای، ئازادی" دمایش ئاما.
