هرووژمەکێ سەر و غەززەی بەردەوامێنێ و لایەنیکەم ٨١ کەسێ کوشیێنێ
وەزارەتو تەندروسی غەززەی کە ئینا چێرو کۆنترۆڵو حەماسینە ئەرەیاوناش؛ جە هرووژمە ئاسمانییەکا ئیسرائیلینە جە ماوەو ٢٤ سەعاتا ویەردەینە لایەنیکەم ٨١ کەسێ کوشیێنێ.
بە پاو ئەرەیاوناس وەزارەتو تەندروسی غەززەی هرووژمە ئاسمانییەکا ئیسرائیلینە پەی سەر و غەززەی جە ماوەو ٢٤ سەعاتا ویەردەینە لایەنیکەم ٨١ کەسێ گیانشا جە دەسدان و ٤٠٠ کەسێش زامڏارێ بیێنی.
بانگەوازو چۆڵکەردەی جە چن کۆڵا کریان
لێوەتەرۆ سوپاو ئیسرائیلی سەرسەعبو ڕۆو یەک شەممەی بانگەوازو چۆڵکەردەیش جە ئەرەنیشتا چنین کۆڵانه جە پانیشتوو کەرتو غەززەینە کەرد. سوپا ئاماژەش پانەی دا کە 'هێزێوە زیاتەر' جە دژو حەماسی چا هەرێمانە بەکارمێنە و ئۆپەراسیۆن ئەنجام مرانە.
زیاتەر جە ٥٦ هەزارێ و ٤٠٠ کەسێ کوشیێنێ
دماین جەنگو غەززەی جە ٧و تشرینو یوەمی ٢٠٢٣ بە هرووژمێوە حەماسی پەی سەر و پانیشتوو ئیسرائیلی دەسش پنەکەرد، کە وەڵێ ئانەی هرووژمێوە چانە نەکریا بێ. جە هرووژمەکەنە هەزار و ٢١٩ هامووڵاتیێ ئیسرائیلیێ کوشیێنێ. هەرپاسە ٤٩ کەسێش بڕفانریێنێ. سوپاو ئیسرائیلیش ئەرەیاوناش ٢٧ چا بارمتا گیانشا جەدەسدان.
بەپاو ئامارەکا وەزارەتو تەندروسی غەززەی، جە هرووژمەکە ئیسرائیلینە پەی سەر و کەرتو غەززەی زیاتەر جە ٥٦ هەزارێ و ٤٠٠ هامووڵاتیێ فەڵەستینیێ کوشیێنێ. هەرپاسە وێرانکاریێ گۆرە و کارەساتێوە مرۆیی ئینا ئارانە
