وەزیرو دلېینەو ئەڵمانیای ئەلێکساندەر دۆبریندت سەرش ۋنەو هەرێمێوە پانیشتوو تەل ئەبیبی دا، کە بی بە ئامانجو هرووژمېوە ئاسمانی ئێرانی و ئاماژەش پانەی دا وڵاتەکەش جە ۋەرا ۋەرو ئێرانینە مەشۊم پاڵپەشتی ئیسرائیلی بکەرۆ.
دماو جەنگو ١٢ ڕووەو ئێرانی و ئیسرائیلی، پەی یووەمجاری ۋەرپەرسێوە باڵاو ئەڵمانیای سەردایې دیلپۆماسی پەی ئێسرائیلی مکەرۆ.
وەزیرو دلېینەی ئەلێکساندەر دۆبریندت سەرش ۋنەو گەڕەکەو بات یامی دا کە چڼین کەسې چنەشەنە گیانشا جە دەسدان و دلې ئانیشایچەنە یەرې زاوڵې بێنې، جە یاگې کۊتەیرەوارو موشەکەکەینە واتش: "مەشۊم پاڵپەشتیما پەی ئیسرائیلی بەهێزتەر بکەرمې."
ئیسرائیل ڕۊو ١٣و حوزەیرانی هرووژمش کەرڎ سەرو ئێرانی و بانگەشەو ئانەیش کەرڎ کە هرووژمەکە پەی ڕاگێرتەین جە وەشکەردەی بۆمبی ئەتۆمی.
ئیسرائیل ئاماژەش پانەیچ دابۍ جە هرووژمە مووشەکییەکاو ئێرانینە بە گرڎیی ٢٨ کەسې کوشیێنې. بە مەڵامەتو سانسۆری سەروازی سەرو ئەرەیاۋنایۆ، زەرەرې هرووژمەکا ئێرانی پەی سەرو ئیسرائیلی نەزانیان.
بە گوێرەو هەژمارە فەرمییەکا ئێرانی جە هرووژمەکا ئیسرائیلینە لاوکەمیۆ ٦٢٧ هاموڵاتیې مەدەنیې کوشیېنې و نزیکەو چوار هەزارا و ٩٠٠ کەسایچ زامڎارۍ بیېنې.
