ئارۊ جە مېڎانوو ڕیسپێک پارکینە جە فرانکفۆرت دما مەراسیمو نەورۆزی جە ئەڵمانیانە، بە کەیف و سەفاوە ئەنجامدریا، مەراسیمەکە یۆبۍ جە شلۊقتەرین مەراسیمەکا ئی ساڵا دماییە.
جە مەراسیمەکەنە پەیامو نەورۆزو ڕابەر ئاپۆی بە دەنگو ۋێش سەرو شاشێوە گۊرێوە نیشانەدریا. بەبێدەنگی گۊشش ۋنە گیریا، بە تەمابیەو پەیامەکەی هوتافەو "بژیۋۆ سەرۆک ئاپۆ"ی وچیاوە.
دماتەر ۋەرپەرسەو پەیوەندییەکا جبەرو سەرنیشت و ۋەرکۊتوو سوریای ئیلهام ئەحمەدە سڵامو ۋەرنیشتیش یاونا بە گرڎ لایۍ، واتش: "بە پرۆسێوە چارەنوویسسازەرە موېیەرمۍ. دماو سەڎ ساڵا، کاتو ئازادیی پەی گەلوو کوردی و ۋەرکۊتوو مېیامینی ئامان. ١٤ ساڵېن بە ۋنەو هەزاران گەشمەرڎا ڕوانۍ ماناڎارۍ و گرنگۍ خوڵقیێنۍ. ئارۆ کاتش ئامان فیداکاریشا فاڕیۆ پەی چارەسەری پرسو کوردی".
ئیلهام ئەحمەد ئەرەیاۋناش هەزاران ڕامېیاریمەدارۍ و شۆڕشگێڵنۍ جە تورکیانە دلۍ زینانەکانە مڎرامانێوە گۊرە مکەرا، جەختش کەرڎۆ چارەسەری پرسو کوردی جە گرڎ یاگێنە پېوەرە بینیان، گەلو کوردی جە چوار پارچەو کوردەسانینە جگە جە ئازادی حیچ هۊرچنیێوە تەر قبووڵ نمەکەرا.
ئیلهام ئەحمەدە جەختش کەرڎۆ، جە ماوۍ نزیکەنە پێشئامایۍ گرنگۍ مەیانە وەڵۍ و بانۍ بە مایۍ دڵوەشی گەلی، سەرنجش وست سەرو هەنگامەکا جە سوریانە پەی چارەسەری سیاسی، واتش: "تا ئیسە جە لایەنو کوردیوە هەوڵی گرنگ دریان، دماو جەژنۍ مزانی گرنگتا پنە مڎەیمۍ. دماو ئەرەیاۋنای ڕێککەوتەکەی، شاندێوە کوردی چنی ئیدارەو دیمەشقی کۊبۆوە و داواکاریەکا ۋێش ئەرەیاۋنۆ. گەلو کوردی بەشداربۆ جە بنیاڎنیای سوریای تازەی. پەی دیموکراتیکبیەو سوریای گفتوگۆ مکریۆ. پەی ئانەی بیەو گەلو کوردی و گەلا سوریای مسۆگەر بۆ، کۊشش مکریۆ، کۆمیتە ئەرەمەرزیۆ. هەوڵ مڎریۆ ئا ڕێککەوتەی چنی دیمەشقی مکریۆ، بیاوۆ ئەنجام".
ئیلهام ئەحمەدە جەختش کەرڎۆ ئەر جە سوریانە مافو ژەنا نەڎریۆ، ئیتر نمەبۆ بە سوریاو گرڎ کەسی، مشۊم یەکسانی ژەنۍ و پیای ۋەرچەم گیریۆ.
'قەول مڎەیمۍ گەلو عەفرینی گێڵاوە سەرو خاکەکەیشا"
ئیلهامە جەختش کەرڎۆ جە عەفرین و گرێ‌سپی و سەرێکانی ئەرەگیرکریانە پێشئامایۍ گرنگۍ ڕووەمڎا، واتش: "قەول بە گەلەکەیما مڎەیمۍ، ئېساڵ بۆ بە ساڵۊو گێڵایۊیشا پەی سەرو خاکو ۋێشا. پەی ئینەیچ کۊشش و گلېرۊبیەی هەن... پی نزیکا جەمێوە جە خەڵکو عەفرینی گێڵاوە پەی ماواو ۋێشا".
ئیلهام ئەحمەدە سەرنجش وست سەرو پارادایمی تازەو رابەر ئاپۆی و ئا پرۆسەی جە زینانۆ دەسش پنەکەرڎەن، واتش: "ئی پرۆسە گرنگا. گەلو کوردی لایەق بە ئاشتی و ئازادییا. پەنەوازا گرڎ کەسۍ هەرمانە بکەرۆ پەی وەڵېکۊتەی ئی پرۆسەیە و چارەسەری پرسو کوردی".
نوێنەرو سەندیکاو (IG Metall) میشێل ئەرهارد قسێش کەردۍ. مەراسیمەکە بە هۊرپڕای و گۆرانییەکا هۆزان دینۆی بەردەوام بی.
دماتەر پەرلەمانتارو پارتو چەپی، فەرهاد کۆچاک جەژنەو نەورۆزیش جە گەلوو کوردی پیرۆزە کەردە، ڕەخنەش جە ئۆپراسیۆنەکا دەسەڵاتی جە ئیستەنبوڵنە گېرت، سڵامش ۋنەو مڎرامانوو گەلو تورکیای دژو دەسسەرەرەگێرتەی ئیرادەی کەرد.
مەراسیمەکە بە گۆرانیۍ و کەیف و سەفاوە دمایش ئاما.
