ئەمڕۆ بەبۆنەی هاتنی جەژنی ڕەمەزانەوە سەردانی مەزاری شەهیدی ڕاگەیاندنی ئازاد (هێرۆ بەهادین) کرا. کۆمیتەی خانەوادەی شەهیدان و کۆمپانیای چەتر و ئاژانسی ڕۆژنیوز و ڕۆژنامەنووسان و ئازادییخوازان بەشداربوون.

تاجەگوڵینەی ڕێز و وەفا لەسەر مەزاری شەهید دانرا و کۆنگرەیەکی ڕۆژنامەنووسی بەسترا.

بەناوی کۆمیتەی خانەوادەی شەهیدان ئیبراهیم محەمەد ئەمین، شەهید هێرۆ بەهادین و سەرجەم شەهیدانی ڕێگای ئازادیی بەبیرهێنایەوە و جەژنی لە هەمووان پیرۆز کرد و گوتی: "بەهیواین ئەم جەژنە ببێتە هۆی بەدیهێنانی ئاشتیی و پێکەوەژیانی گەلان و کۆمەڵگای دیموکراتیک".

لە درێژەدا ئاماژەی کرد بە پەیامی سەدەی ڕێبەر ئاپۆ گوتی: "دەبێت خۆمان بۆ پڕۆسەی ئاشتی ئامادە بکەین و کاری بۆ بکەین تاکو لە چوارچێوەی کۆنفیدڕاڵیزمی دیموکراتیکدا گەلان بە خۆشی و شادی بژین".

بەڕێوەبەری کۆمپانیای چەتر، کەمال حەمە ڕەزا، وەدات و هێرۆ و گوڵستان تارا و عەزیز کۆیلوئۆغلو و تەواوی شەهیدانی ڕاگەیاندنی ئازادی بیرهێنایەوە و بەڵێنی دا بە درێژەدان بە ڕێگەی شەهیدان.

هەروەها باوکی شەهیدی ڕۆژنامەنووس هێرۆ، بەهادین عەبدوڵا سوپاسی ئامادەبووانی کرد و گوتی: "داواکارم لێکۆلینەوە لەوکەسانە بکرێت کە دەست بۆ خەڵکی قەڵەم بەدەست و هاوڵاتی مەدەنی دەبەن و  تیرۆریان دەکەن، داواکاریشم خوێنی شەهیدانمان ون نەکرێت، درێژەپێدەری ڕێگا و ڕێبازیان بن".