ئاهەنگو نەورۆزی ئەنقەرەنە بە درووشمو "ئەرەپڕە وەختو ئازادی و سەرکەوتەین" ئانتی پارکنە کریا. هەزاران کەسێ بەشدارێ بێنێ. گەنجێ و ژەنی بەشدارییێوە وەرەچەمشا کەرد. هاموەڵاتێ پەی ماوێوە درێژی  ورپڕێ. درووشمو "بژیوۆ سەرۆک ئاپۆ"ی و "ئازادیی پەی زیندانییا"شا بەرز کەردۆ.

دماو دەیەقێوە ڕیزگێرتەی وەنەو کۆشیای ئازادی و دیموکراسی، ئاهەنگەکەنە نامەو کاندیدو دەم پارتی پەی هامسەرۆکو شارەوانی گەورەو ئەنقەرەی گوڵتان کشاناکێ واناوە.  

کاندیدو دەم پارتی پەی هامسەرۆکو شارەوانیی شاری گەورەو ئەنقەرەی، ئۆزتورک تورکدۆغان واتش دەم پارتی تەنیا هینو کوردا نییا، بەڵکوم پارتو چەپ و سۆسیالیستەکایچ، ئاشتی مارمێنە ئی وەلاتەیە هامپەیمانیما چنی کەسی نیا، تەنیا داواو دەنگداین بە دەم پارتی.

پەرلەمانتارەو دەم پارتی وانی، پەروین بوڵدانە واتش پەرسەو کوردی مەیدانەکاو ئاهەنگەکاو نەورۆزینە بەرەکەوتێنە  واتش: " مەیدانەکانە داواو ئاشتیی جە تورکیای بەرەکەوتێنە. گوڵتان کشاناکە ئارۆ بۆنەو پەرسەو کوردیوە ئینا زیندانەنە، ئێشکگێریی دادپەروەری ئەمینە شەنیشارێ وەروو پەرسەو کوردین".

دمایی بوڵدانە ناڕەزایەتییش وەراوەرو گۆشەگیریی ئیمرالی بەروست و واتش: "ئارۆ پەی ورگێرتەی گۆشەگیری سەروو بەڕێز عەبدوڵا ئۆجالانی، هەزاران زیندانیێ سیاسیێ مانیشا جە واردەی گێرتێنە. سڵامشا وەنە مکەروونە و گۆشەگیری تاوانێوەن دژوو ئینسانیەتی، جارێوە تەر بانگەواز مکەرمێ دەمودەس گۆشەگیریی ئیمرالی ورگێرا و بەڕێز عەبدوڵا ئۆجالان چەنی بنەیانەی و پارێزنەراش کۆ بۆوە. زیندانیێ پەی ورگێرتەی گۆشەگیری ئینێ مانگێرتەینە، ئەدێ ئێشکگێری مکەرا و ڕاپیمایی ئازادیی مکەرا، بەڵام ئەنقەرە کەڕ و لاڵا. جوابی خاس و گەورە سەرو سندۆقەکاوە مدەیمێوە".

دمایی ئاهەنگەکە بە ورپرای دماییش ئاما.