ڕەزان ساریجا پارێزنەرو ڕابەر ئاپۆی جە چەمپنەکۆتەیێنە چنی ئاژانسوو هەواڵوو فوراتی هۆرسەنگنایش کەرڎ سەرو نامە ئارڎەی مافو هیوای کە دۆڵەت باخچەلی سەرۆکو مەهەپەی ئاردەبێش ۋەرو باسی، پێشئامایە تازۍ و ڕووەدایەکۍ پێوەس پا مژاریشە وستۍ ڕووە.

ساریجا واتش، "باخچەلی باسش چانەی کەرڎەبۍ کە ئا مەرجۍ ئاڎ ماچۆشا جابەجێشا بکەرمۍ 'با پەی مافو هیوای فاڕیای یاسایی بکریۆ' و پەی ئانەی ئێژا ئۆجالان ئیسفاڎە چینەی هۆرگێرۆ 'ڕاو ئینەی بکریۆوە'. بەڵام دیار نیا کە پەڕلەمان ئینەی جابەجێ مکەرۆ یا نا. چونکی مافو هیوای جە ڕوو تەکنیکیوە ماناو دەمودەس ئازاڎ بیەی نمەڎۆ. ئینە پەنەوازیش بە بڕۍ فاڕیای هەن، بە مەرجی دیموکراتیک پەنەوازیش بە بڕۍ هەنگامۍ کۆمەڵایەتی، سۆسیۆ-پۆلەتیکی هەنۍ."

پێوەس بە موزایەدەی و سات و سەودای بە مافو هیوایۆ ساریجا واتش، "ڕێبازێوە دروس نیا، مافە بنەڕەتییەکۍ و ئازادییە دەسوزیێکۍ پێوەسۍ بکریا بە سیاسەتەکاو حکومەتیوە." ئاماژەیچش پانەی کەرڎ دادگاکۍ، حکومەت و دەسەڵاتو یاسا نیایرەی ۋەرپەرسێنۍ چانەی بە پاو سیستەمو یاسایی جماوە و پەڕلەمانیچ یۆن چا ئەرەمەرزیایا.

جە بەردەوامینە سارجیا جەختش چانەی کەرڎۆ کە پەنەوازا تورکیا قەرارەکاو دادگاو مافەکا مرۆڤوو ئۆروپای (DMME) جابەجێ بکەرۆ، چونکی بەشدارا چا پەیماننامەنە و واتش: "فاڕای یاساکا بە پاو قەرارەکا DMME لایەنی بنەڕەتی مژارەکەین و پەنەوازا ئینە بەبێ هیچ مەرجێوە جابەجۍ بکریۆ. تەنیا پی جۆرە متاویۆ ئازادی سەرو بنەڕەتێوە یاسایی جابەجێ بکریۆ. بێگومان دلێینەو فاڕای یاساکا گرنگا. گفتوگۆو مافو هیوای سەرو بناغەو ئازادی بنەماو مژارەکەین." ساریجا واوەیش کەرڎۆ پەی پرۆسەو چارەسەری پرسەکا، پەنەوازا گفتوگۆ سەرو مافو هیواو ڕابەر ئاپۆی بکریۆ.

جە دما دماینە ساریجا ئاماژەش پانەی دا کە چنی ئانەی دماو ٤٣ مانگا دەرفەت ڕەخسیا کە چەمپنەکۆتەی بنەیانەیی چنی ڕابەر ئاپۆی بکریۆ، بەڵام هیچ فاڕیایۍ بنەڕەتی جە ڕوو یاساییوە جە مژارەکەنە ڕووەش نەڎان. باسش چانەیچ کەرڎ کە زیاڎ جە ٥ ساڵان پېسە پارێزنەرا نمەتاوا دیڎار ئەنجام بڎا و قەڎەغەو پارێزنەرا بەردەواما و واتش: "ۋەرو ئا مەڵامەتا قسەکۍ باخچەلی هیچ چێوێشا نەفاڕان. سیستەمێوە نایاسایی دوور جە پیمەرە مېیاننەتەوەییەکا جە ئیمراڵینە ڕاوەبەر مکریۆ. گۆشەگیری ئیمراڵی بەردەواما."