دەسەو هەماهەنگی پاژکی بۊنەو ٨و ئاداری ڕۊو جەهانی ژەنا رەنجدەریۆ پەیامێوە پیرۆزباییش وەڵاکەردۆ و داواش جە گرڎوو ژەنا کەرد کە بە رۆحوو ۋەرەنگاربیەیۆ ٨و ئاداریوە پێشوازی جە گرڎ ڕووۍ کەرا و مجیارە مێڎانەکا ٨و ئاداریوە.
دەسەو هەماهەنگی پاژکی سەبارڎ بە ٨و ئاداری ڕۊو جەهانی ژەنا رەنجدەریۆ سەروو ماڵپەڕوو ڕسمی ۋێشۆ ئەرەیاۋنێوەش وەڵاکەردۆ.
پاژک جە ئەرەیاۋناکەینە باسش چانەی کەردەن، "جە کەسایەتی کلارا زێتکینۍ، رۆزا لوکسەمبورگۍ، ئالێکساندرا کۆلنتای، لەیلا قاسم، سەکینە جانسز، زەینەب کناجۍ، سەما یوجەیۍ و ئانۍ ٨و ئاداریشا خوڵقنا و پێسە ڕێوگارا و شۊنکۊتا دەلال ئامەڎۍ، بێریڤان زیلانۍ، دەلال پازارجخ، لەیلا سورخوێن، گوڵچیا گابار، شیرین عەلەمهولی، شیلان کۆبانێ، زیلان کۆنیا، لەیلا وان، رێحان عامودێ، بیشەنگ بروسک-سارا هۆگرۍ و هامڕۍ زەلال حەسەکەینە کە ١٨/١/٢٠٢٤ کەرکوکەنە جە ئاکاموو هجوومۍ نامەردانەینە گەشمەرڎۍ کریا، گرڎوو گەشمەرڎا ئاخێزی بە رێزۆ یاڎ کەرمێوە. جە کەسایەتی هامڕا سارا تۆڵهەڵدانۍ و روکەن زەلالێنە کە جە کەشەکا کوردسانینە جە خەتەو گیانبازینە سەرمەشقایەتیشا پۍ کۊشیای ئازاڎیی ژەنا کەرد، ۋەروو دەم و یاڎوو هامڕا گەشمەرڎەکامانە بە ڕێزۆ سەرە منامنمێرە.
بڕوا، ئازایەتی و ئیراڎێوە کە هامڕایاما چی دۆزەنە، بە ئاخێزوو ژەنا سیستموو جەهانی سەرمایەداریی شۊکناوە، گرڎ وەختۍ بۆ بە زانابیەی ٨و ئاداری. جە حەر یاگێنە کە هەناسە مڎا، پێسە ئیراڎە و رۆحوو کۊشیای مژیۋا. پێسە سەنگەروو مدرامانی و وەرگیری جەوهەری گۆرۍ با. میراتوو ئاڎیشا، بۆ بە شۊڵە چراوی و ڕاما رۆشن کەرۊوە".
جە درێژەو ئەرەیاۋناکەو پاژکینە ئامان؛
"ئێمە هامڕایا یەژاستاریما کە شۊڵە چراوەو ئاخێزوو ئازاڎیی ژەنانۍ، فەرمانڎۍ و پێکئاما بەقیمەتەکۍ هێزەکاو یەپەژە، هەپەژە، یەژەشەی کە پێسە یەکینەکاو پارێزنای جەوهەری ژەنا کۊشیا، وێڕاگراو زینڎانی کە بە سەرکۊتەی ئیراڎەی دیلبیەی دلێنەبەرۆ، ئەڎایا جەرگسۆتێما کە دڵوو ۋیشا بە ' ئێشکگریی دادپەروەری' فاڕا پۍ جالاکی و ڕێوە مبارەکەشا گێرتێنە وەر، گرڎوو ژەنا جە کوردسان، ۋەرکەوتوو دلێڕاسەی و جە گرڎ یاگۍ جەهانی بە ئیراڎەو ٨و ئاداری هۊرمێزا سەروو پەیا و بە تامەزرۆییۆ کۊشیای ۋێشا وزانە ۋەرچەم، سڵامشا ئاراسە کەرا و بە جۆش و خرۆشوو ٨و ئاداریوە مبارەک بایشا ۋنەکەرا.
سیستموو پیاسالاری، بە ئەقڵیەتوو رەگەزپەرسانەی قووڵ و بە دەسەڵاتوو مەترسیڎاروو ۋێش ۋەرا ۋەر بە ژەنا و گلێرگەی گەورەتەرین جەنگ ڕاوەبەر کەرا. جەنگی جەهانی یەرەم کە جە تەرەفوو ئەمریکا، بەریتانیای و روسیایۆ سەرکێشی کریۆ و بە بەشداری نەتەوە دەوڵەتە ستاتۆپارێزە هەرێمییەکا، جە ئاستوو دلێینەی، هەڕێمی و گەردونینە بە گرڎوو خێرایی ۋێشۆ وەڵابۆوە. ئانەی جە کوردسان، فەلەستین، ئەفغانستان، ئێران، تورکیا، عێراق، سوریا، ئوکرانیا، ئەرمینیانە جە جوگرافیاو ئێمە و جەهانینە گوزەر کەرا، ئینۍ ئاستێوە ترسناکەنە. مەژگ و باڵادەسی پیای کە بەروو مەسڵەحەتوو سەرمایە، هێزوو هەژمووگەرایی و دەسەڵاتوو ۋێشۆ ویر جە حیچ چێوۍ تەری مەکەرۊوە، وەڵۍ ئانەینە جەهانی دلێنە بەرۆ ، بۊنە و پێویسش بە دەسوەرداین. جە تابلۆی وەحشیانەنە، سیستموو جەهانی سەرمایەداری جە قۆناغەو سەروبنبیەینە بە جەنگ، قڕکەردەی، وێرانکەردەی ئیکۆلۆژیکی، هەژاری، کۆجبەری و حەرپاسە بە کۊکوشکەردەی ژەنا کە ئاسایی بیەنۆ و دەسدرێژی سیستماتیک بەرزبیەنۆ، جە وەرا وەرشانە کۊشیای ئێمەو ژەنا دەورێوە تاریخیش هەن.
ئێمە پێسە ژەنا متاومۍ چارەنوویسێوە کە سیستموو تاتەسالاری پۍ ژەنا و گەلا چێردەسەی نویستەنشۆ، تێکش بڎەیمۍ و جە فاڕای چارەنوویسینە دەوری یەکلاکەرەوەما بۆ. چا روۆ پێرسپێکتیڤوو ٨/٣/ ٢٠٢٤ جە حەقەتینەو جەنگوو جەهانی یەرەمینە بارگاوین بە ئەرک و مانای تازێوە. ستراتیج و تاکتیکوو جمیەروو ژەنا و کۊشیای کۆمەڵایەتی ئینا مەعناو ژیۋاینە. جە دژوو جەنگوو سەرجە نۆ دیزاینکەردەیۆ سیستموو سەرمایەداری و پشکپشکێنەو ئیمپریالیستی یەرەمی، جابەجێکەردەو پاڕادایموو چارەسەریی، هەڵوێسی ستراتیژیکی و بەرنامەو کۊشیای ئێمەن.
تاکە هێز کە سیستموو جەهانی فاڕۆ، ژەنینۍ
پۍ رزگاری جنسوو ژەنا، پێویسش بە سیستموو تازەو جەهانی هەن. چی پرۆسەنە کە رەگەزپەرسیی، ئایینپەرسیی، نەتەوەپەرسیی شان بە شانوو یۊی جماوە و دەنگوو پەیاو فاشیزمی پێسە جەنگی و قڕکەردەی زیاتەر مژنەویۆ، پێویسا ژەنی دەوروو ستراتیژێوە هامبەشیرە کوۍ باوە و جە دژوو جەنگی گەردوونی سەرمایەداری کۊشیای گەردونی ئەنجام بڎا. تاکە هێزێوە کە سیستموو جەهانی فاڕا، ژەنینۍ. چالاکییەکاو گرڎوو هێزە دژە سیستمەکا و جمیەرە کۆمەڵایەتیەکا، کە بە سەرمەشقایەتی ژەنا بەرەو وەڵۍ ملا، مجیانە دەرێوە هامبەشۆ. پۍ ئانەی ئا دەرە پێسە تافێوە پێسە هێزوو فاڕیای گنۆ جوڵە، وەخت گونجیان. ئا سەردەمەی ئێمەش ئینایمۍ چنە، سەردەموو ئاخێزوو ژەنان. ئاماژەن پۍ جە ئەڎابیەو سەردەموو ئازاڎیی ژەنا. هەلومەرجەکۍ بەرش وزا کە کریۆ ئاخێزوو ژەنا بە ئەنجام بیاوۆ. ئێمە متاومۍ ئانەی بە بنیاڎنیاو سیستموو کۆنفیدڕاڵی، بە گەورەکەردەی و وەر وەڵاکەردەی یەکینەکاو مدرامانوو پارێزنای جەوهەریی ژەنا، بە هۆشمەندی 'ئێمە پێوەرە بەقوەتتەرێنمۍ' جە ئاستوو دلێینەیی-هەرێمی-گەردونینە بە بنیاڎنیای خەتەو کۊشیای، بە چالاکی وڕنای بیەیشا و بناغەو پیا سالاری و بە زیاتەرکەردەی مێڎانەکا ئازاڎیی، دەسەبەر کەرمۍ.
بانگەوازوو ئێمە پۍ ٨و ئاداری، سەروستەی هەڵمەتەو ئازاڎیینە پۍ رابەر ئاپۆی
چنی وەڵابیەیۆ پاڕادایموو رابەر ئاپۆی، پێسە بەرکۊتەیۍ فەلسەفی-ئایدۆلۆژی-سۆسیۆلۆژیکی گەردونیی تازە، بە جۆش و خرۆشۆ خاوەنداریش ۋنە کریۆ، ئانە وینیۆ و ئی ئاستەو ئیسەی مژدە و ئیلهام بەخشۆ. رابەر ئاپۆ سەرچەمەو ئیلهامیا پۍ ئانەی ژەنا جە سیستموو تاتە سالاری، مرۆڤایەتی جە سیستموو سەرمایەداری رزگارۍ با و پۍ ئانەی سیستموو کۆمەڵایەتی بە بەهاکاو ئازاڎیی بارگاوی کریا و بە بنەماکاو دیموکراتیکی زینڎۍ کریاوە. جە دژوو ئا هێزا کە بە پیلانگێڵنی میان نەتەوەیی بیۍ بە موهەندیسۍ ئیمراڵی، پێویسا گرڎوو ژەنا بەشداری جە هەڵمەتەو ' ئازاڎیی پۍ رابەر ئاپۆینە' کەرا و ئا بەشۍ کە تائیسە بەشداربیێنۍ بە شێوێوە رادیکاڵ هەڵمەتەکۍ بەگوڕتەر کەرا، ئینە بانگەوازوو ئێمەن پۍ ٨و ئاداری. گرڎوو کوردسانیەکا کە پێسە فەلەستینیەکا ئینۍ چێروو هەڕەشا و مەترسی جینۆسایدینە، ۋەرپەرسێنۍ جە سەروستەی هەڵمەتەو ئازاڎیی پۍ رابەر ئاپۆی، چارەسەری پۍ پرسوو کوردی. سەرکۊتەی هەڵمەتەکۍ ئازاڎیی ژەناش ۋنەگنۊوە، جەنگ یاگۍ ۋێش مڎۆ بە ئاشتی و چارەسەری. حەرپۊکەی هەڵمەتەکۍ، جە کەسایەتی رابەر ئاپۆینە پۍ ژیۋاین و ڕۊو ژەنا و گەلان. جە دژوو ستەمکارا، سەرکۊتەی هەڵمەتەکۍ یەکجار پێویسا. بە بۆنەو ٨و ئاداریوە جارێوەتەر بە وەشەسیای و رێزۆ سڵام جە رابەر ئاپۆی کەرمۍ؛ پۍ ئانەی نەمرود، فیرعەون، زوحاکەکۍ سەردەموو ئێمە دلێنەبشا، پێسە پاژکی پاگیرێنمۍ کە جە خەتەی فیداییەنە جەنگوو ۋێما بەرمۍ ڕاوە. پێسە هێزوو نوێنەری و پێکئاماو پاڕادایموو رێبەر ئاپۆ "دیموکراتیک، ئیکۆلۆژیکی و ئازاڎیوازی ژەنان"، شیەینە و قوربانیداکەیش چێش بۆ با بۆ، ئێمە بە دڵنیاییوە میاونمێش بە سەرکۊتەی.
ناتانیاهوو کە ڕاش پۍ کوشتەی دەیان هەزار کەسا، بە تایبەتی ژەنا و زاوڵا کەردۆ. دەسەڵاتوو ئەردۆغانی فاشیستی کە پۍ کوردا کۊکوش کارا و پۍ فەلەستینیەکا ۋێش پێسە فریاڎ ڕەسی نیشانە مڎۆ حەرپاسە پارتە جاشەکۍ پێسە پەدەکە-هوداپاری بە هامکاری دەسەڵاتوو ئەردۆغانی، یاوێنۍ بە دمایی. جە دژوو هێزەکاو سیستموو تاتەسالاری، کە ژەنا، گەلا سەروو بنەماو نەتەوە دەوڵەتی بەش کەرا، تنووتیژی پیای-دەوڵەتی زیاتەر پێکمارۆ و رەگەزپەرسیش یاونا بە ئاستوو رژێمێوە، جە گرڎ ئاستێوەنە کۊشیای هەڵوێسوو بیەو ئێمە بۆ. پۍ ئانەیچ پێسە بناخەدانیایرەو نەتەوەی دیموکراتی، ئێمە جەهانوو ۋێما بە کۆنفیدڕاڵیزموو دیموکراتیکی هۊنمێوە، بە زانابیەی ژنۆلۆژی رۆشنش کەرمێوە و هامژیۋای ئازاڎیی بەرەو وەڵۍ بەرمۍ، بە گرڎ جۆرە رێ و رێبازێوە چانیشا هۊرچنیەی کۊشیایما دۊڵەمەنڎ کەرمۍ، دەسدرێژیەکاو تاتە سالاری وڕنمۍ و ڕاوەبەری جەوهەری سازکەرمۍ.
ئێمە بە رۆحوو ۋەرەنگاربیەیۆ ٨و ئاداری پێشوازی جە گرڎ ڕووۍ کەرمۍ
ئەرەیاۋنمێش کە ئێمە چنی ژەنا فەلەستینی، چنی ئا ژەنا جە ئەفغانستانەنە دژوو تاڵیبانینۍ، ئێرانەنە دژوو رژێموو شەریعەتی، تورکیانە دژوو رژێموو فاشیستی ئەردۆغانی ۋێڕاگری کەرا، جە دژوو دەسەڵاڎداری عەرەبی دژە-دیموکراتیکی کۊشیای دیموکراسی ئەنجام مڎەیمۍ. پێوەرە، شان بە شان پۍ ئانەی جە ۋەرکەوتوو دلێڕاسەینە دیموکراسی و ئازاڎیی چرۆ کەرا، بە بنیاڎنیای پێوەرەبیەیۍ بەقوەتی، ئێمە قەناعەتما پاسەن کە جوگرافیاو ۋێما بە ئەقڵ و دەسوو ژەنا فاڕمۍ پۍ بەهەشتی، پی بۊنۆ ئێمە سڵام جە گرڎوو ئا ژەنا کەرمۍ کەبەرهەمئاوەرۍ و رەنجدەرێنۍ. چنی ئا ژەنا کە کەشەکا، جاڎەکا، کارگەکا، گرڎوو مێڎانەکا و مەنتیقەکا فاڕا بە رەنگەو ئازاڎیی، ئێمە سەرجە نۆ شێوە و روخسار بە ژیۋای بەخشمێوە. جارێوەتەر بانگەوازما پۍ گرڎوو ژەنا هەن کە بە رۆحوو ۋەرەنگاربیەیۆ ٨و ئاداری پێشوازی جە گرڎ ڕووۍ کەرا ، مجیارە دلۍ مێڎانەکا ٨و ئاداری".
