پەدەکە بەگردی و مەسرور بارزانی بە تایبەتی بەهاندانی تورکیای هەنگامێ مەتەرسیدارێ ڕوو بە هۆرگیرسنای جەنگی کورد بەکوردی منیان و بەئەوەهۆنیەی بەسیناریوی چەواشەکارانە دژ بە جمیەری ئازادی و پەکەکە-ی، زەمینەسازی پەی هۆرگیرسنای و ڕەوایەتیدای بە جەنگەکەی مەکەرانێ.
مەسرور بارزانی، سەرۆکوەزیرو هەرێمو کوردستانی و کوڕە گەورەو مەسعود بارزانی، سەرۆکو پەدەکە-ی، سەروەختو دەستبەکاربییەیش چوون سەرۆکوەزیر، بە جۆرێ وێناش کەردەبێ و نیشانەش دابێ، کە گوایا وازیارەن چەنی جمیەری ئازادی بە بەڕابەرایەتی پەکەکە-ی لاپەڕێوی نۊ هۆربڎۆنەوە و گرژیێ و ئاڵۆزیێ کە جە سەردەمو کابینەکەو نێچیروان بارزانی مامۆزاییش و پاکەکە-یەنە بێنێ، کەمێ بکریانێوە یان بە تەمامی نەمەنانێ. جە وەرانوەرەنە، ڕابەرێ جمیەری و پەکەکە-ی کە هەمیشە وازیارێ چارەسەری کێشەکان بەئاشتی و دوور جە جەنگ و گژیای چەنی هەرێمی و پەدەکە-ی بیێنێ و پەیوەست بە ئانەیە فرەجارێ دەست وەڵێ وێستێشان بیێنێ، بە وەشحاڵییەوە پێشوازیشان جە مژارەکەی کەرد و فرە بۆنێ و بەیاننامێ و ئەرەیاونایێنە ئامادەیی وێشان پەی هۆردای لاپەڕێوی تازەی و هەنگام نیای پەی یەکێتی نەتەوەیی چەنڎین پاتە کەردەوە.
ئایا مەسرور بارزانی، دڵوازانە و ستراتیژیانە یان تاکتیکی و حیلەگەرانە مژارەکەش گێرت دەست و ژڵێویاوە؟
١٠ی تەمموزو ٢٠١٩ی، پەرلەمانو هەرێمو کوردستانی متمانەش بە کابینە وەزاریەکەو مەسرور بارزانی دا و نامبریا و یاگەگیرەکەش قوباد تاڵەبانی و وەزیرەکێ کابییەنەکەیشان بەفەرمی دەستبەکارێ بیێ. گرد کەسێ و لایێ بە تایبەتی جمیەری ئازادی و پەکەکە چەمەڕێ بەدی ئاوردەی و کەردەیی کەردەی ئا بەڵێنێ و پەیامانە بێنێ کە مەسرور بارزانی دێبێنێش. بەڵام بە پێچەوەوانەوە بارزانی نەک بەڵێنەکێش نەبەردێ سەر، بەڵکو چەنی دەستبەکاربییەش چوون سەرۆکوەزیر سەرەتا بەشێوازێوی نەرم و هۆرخەڵەتنەر جە زاخۆوە تا برادۆست قۆناغ بەقۆناخ و بە بەهانێ و پاساوێ جیاوازێ هێز و چەکێ و جبەخانێ قورسێ و تفاقی سەربازیش ڕەوانەو هەرێمەکێ پارێزناو میدیای کەرد کە چێرو دەسەڵاتو هێزەکێ پارێزنای گەلی - (هەپەگە) و یەکینەکێ ژەنێ ئازادێ - (یەژا ستار)یەنەبێنێ و جە فرە یاگێنە بە تایبەتی جە برادۆست، سیدەکان، خاکورک بنکێ بارەگایێ سەربازیش بەنامێ بە پەی پێشمەرگەی دروستێ کەردێ. بەڵام دماتەر ئاشکرا بی نەک پێشمەرگە بەڵکو میت و ئەرتەشی ئەرەگێری تورکیاشان دلێنە مەرزیێنێرە و بە ئی جۆرە پانتایی و ڕووبەرێوی فرە بەبێ جەنگ و تەقە تەسلیم بە تورکیای ئەرەگێری و دژە کوردی کریا. ئانەیچە نیشانەشدا کە مەسرور بارزانی، جە بابەتەکەنە دڵوازانە و ستراتیژیانەکارش نەکەردەن و بەڵکو بەشێوازێوی تاکتیکی و حیلەگەرانە و هۆرخەڵەتنەر ژڵێویانەوە و هیچ نیەتێوش نەبییەن پەی دمایی ئاوردەی بە ئاڵۆزیەکان و ڕووەنەڎای جەنگی و ئاژاولێ میانو پەدەکە-ی و جمیەری ئازادییەنە بەڕابەرایەتی پەکەکە-ی و هەرگیزیچ وازیار نەبییەن لاپەڕێوی نۊ میننشانە هۆربڎۆنە.
"مەسرور بارزانی ڕاستینەو وێش ئاشکرا کەرد"
ئیتر مەسرور بارزانی، وردە وردە ڕووە ڕاستەقینەکێش ئاشکرا کەردە. جە ڕێککەوتو ٢٠٢٠/٠٣/١٨ی هێزێ سەربازیش ڕەوانەو زینێ وەرتێ (ئەستێرۆکان)ی کەرد کە هامسنورە چەنی هەرێمەکێ پارێزنای میدیای و سنورو یەکێتی نیشتمانی کوردستانی و جە ئاگەنە پێشمەرگەکێش مەرزنێرە و بنکێ و بارەگاییێ سەربازیش دروستێ کەردێ، بە ئا نیەتە ئا گەیچە چوون ناوچێ و هەرێمەکێ تەرێ دماتەر تەسلیم بە میت و ئەرتەشو تورکیای بکریۆن.
سەرڕاو وریاکەردەی و هۆشداریەکێ هەپەگە، پەکەکە و کەجەکەی و ناڕەزایەتیەکێ گەلی و پارتێ و لایەنە کوردییەکێ و داواکەردەی جە پەدەکە-ی پەی ئەوەکێشەی هێزەکەیش، بەڵام پەدەکە گۆشش بەهۆشداری و داواکاریەکان نەڎا و هێزەکەش نەکێشەوە، بەڵکو تیمی سەربازیێ و سیخوڕیێ تورکیاش ئاوردێ ناوچەکە و بە چەمساخی پەدەکە-ی، جە ڕێککەوتو چوارشەممە ٢٠٢٠/٠٤/١٥ی باڵەپڕە جەنگییەکێ تورکیای بۆردمانو ئەستێرۆکانیشان کەرد و جە ئاکامشەنە چەنڎین گەریلایێ ئازادی شەهیدێ و بریندارێ بیێ.
"ناوچە مەدەنیەکێ هەرێمی، مەخموور و شەنگال بۆردومانێ کریێ"
هامتەریب چەنی ئینەیە، چەنڎین جارێ ناوچە مەدەنینشینەکێ پانیشتو کوردستانی، مەخموور و شەنگال بۆردومانێ کریێ و جە ئاکامشانە ژمارێوی فرێ هاموڵاتیێ مەدەنیێ شەهیدێ وبریندارێ بیێ و بۆردومانەکێ زیانی فرەی مادیی و ژیوگەییشان ونەکەفتەوە. جە وەرانوەرەنە نەک مەسرور بارزانی و پەدەکە بێدەنگێ بێنێ، بەڵکو پاساوێشان پەی تاوانەکێ تورکیای ئاوردێوە و بەئاشکرا لایەنگیری تورکیای و دژایەتی پەکەکە-ی و گەلو کوردیشان کەرد و خاوەنداریشان جە هونەو شەهیدێ و بریندارەکان نەکەرد. تەنانەت ڕاگیریشان جە خەڵکی کەرد تا دژ بە ئەرەگێرتەیی و تاوانەکێ تورکیای ناڕەزایەتی و وێنیشاندای و ڕاپیمایێ ئەنجامێ نەڎان. جە ئی چوارچێوەنە جە هەولێر و بادینان چەنڎین چالاکوانێ،و هاموڵاتیێ دەستگیرێ و زیندانیێ کریێ.
"چەنی دەستبەکاربییەی مەسرور بارزانی هێرشەکێ تورکیای دژ بە گەریلای پەرەشان سەند"
هامکات چەنی دەستبەکاربییەی مەسرور بارزانی چوون سەرۆکوەزیران، بەشێوازێوی فرە و فراوان هێرشەکێ تورکیای دژ بە گەریلای پەرەشان سەند. جە ئاکامشەنە چەنڎین فەرماندێ و سەڎان ئەندامێ گەریلای شەهیدێ بیێ و بریندارێ بیێ و چەنڎین سەرکردێ جمیەری ئازادی کریێ ئامانج. هاموەخت چەنڎین ئەندامێ و لایەنگرێ جمیەرەکەی دەستگیرێ و زیدانیێ کریێ و ژماێوشان تەسلیمێ تورکیای کریێوە. بەگردی جە سەردمو دەسەڵاتداری مەسرور بارزانی-یەنە بەشێوازێوی ڕۆوانە جە زەمین ئاسمانەوە سەروەری هەرێمو کوردستانی پاشێل کریا و مەکریۆن و هێزە سیخوریێ و ئاسمانیێ و زەمینیەکێ دوژمنی بە درێژایی سەڎان کیلۆمەترێ و پانتایی دەیان کیلۆمەترێ قوڵایی هەرێمیشان بەزنان و دەیان بنکێ و بارەگایێ تازێنە یاگەگیرێ بیێنێ و یاوێێنێ دلێ شارو هەولێری پایتەختی. سەرجەم ئانەیچە بە هامکاری ڕاستەووێ مەسرور بارزانی و پەدەکە-ی کریان و نەخشە پەی کێشیان.
"ڕژێمو تورکیای کارا پەشتیوانیش جە مەسرور بارزانی کەرد"
وەر جە دەستبەکاربییەش و جە سەرەتاو دەستبەکاربییەشەنە چوون سەرۆکوەزیر، مەسرور بارزانی پاسەش نیشانەدێ و وێناش مەکەرد کە گوایا گەرەکشەن هەرێمو کوردستانی جە ئەنقەرەی و تورکیای دوور بوزۆنەوە و چەنی بەغدادی و ئێراق-ی نزیکایەتی دروست بکەرانێ و قوڵایی ستەرتیژی هەولێری، بەغداد ببۆنە نەک ئەنقەرە. بەڵام ئا بابەتە فەرەش نەخاینا و ئاشکرا بی پەی هۆرخەڵەتنای ڕای گردی کوردستانی و حکومەتی ناوەندی ئێراقی بییەن و هیچی تەر. چونکە وەڵێ ئانەیە مەسرور بارزانی ببۆنە بە سەرۆکوەزیر و کاندید کریابێ پەی پۆسەتەکەی، جە ڕێککەوتو ٢٠١٩/٠٤/٢٩یەنە جە هەولێر چەنی مەولود چاوشئۆغلو وەزیروبەرو تورکیا کۆبیێوە و چاوشئۆغلو بە ڕەهایی پەشتیوانی وێش و ڕژێمەکەیش پەی بارزانی و دەستبەکاربییەیش چوون سەرۆکوەزیر دووپات کەردەبێوە.
هەر جە دمای دەستبەکاربییەش بە سەرۆکوەزیر، دوا جە مەسرور بارزانی کریا سەردای تورکیای بکەرۆن؟
هەر جە دمای دەستبەکاربییەش بە سەرۆکوەزیر، ڕژێمو تورکیای پەی نیشاندای پەشتیوانی و هامکارکەردەی کابینەکەیش، داواش جە مەسرور بارزانی کەرد تا سەردای تورکیای بکەرۆن. بەڵام ئا داواکارییە هامکات بێ چەنی هێرشەکێ ڕژێمی پەی سەرو ڕۆژاڤاو کوردستانی و پۆکەی ناڕەزایەتی فراوانی وەرانوەر بە سەردایەکەی، مەسرور بارزانی نیشانە دریا و دەرنجام بارزانی نەیاراش داواکاریەکەو تورکیای بەگا باوەرۆن. بەڵام تورکیا فشارش ونەکەرد تا هەر چوومە بییەن سەردایەکەی ئەنام بڎۆنە. پۆکەی جە مانگەو ٨و ٢٠١٩یەنە بارزانی بەنهێنی سەردایەکەش ئەنجام دا و جە میانشەنە چەمش بە دەسەڵاتدارە تورکەکان کەوتەبێ و سەبارەت بە دژایەتیکەردەی پەکەکە-ی پێوەرە ڕێکێ کەوتێبێنێ و بڕیارشان دابێ بە کەردەیی کار پەی دژایەتیکەردەکەی بکەرانێ.
شۆنیشەرە ٢٠٢٠/٠٢/١٦ی جارێوتەر مەسرور بارزانی و چاوشئۆغلو جە ئەڵمانیا جە پەراوێزو کۆببیەو ئاساییشی میاندەوڵەتی میوشن-ی کۆبیێوە و دیسان جەختشان جە دژبەری جمیەری ئازادی و پەکەکە-ی کەردەوە.
"تورکیا دەستبەردار نەبی و داواش جە بارزانی کەرد بە ئاشکرا سەردای تورکیای بکەرۆن"
ڕژێمە ئەرەگێر و دژە کوردەکەو ئەردۆغانی دەستبەردار نەبی و داواش جە مەسرور بارزانی کەرد تا پێسەو نیشاندای دڵسۆزیش پەی تورکیای گۆش بە ناڕەزایەتییەکان نەڎۆنە و بە ئاشکرا سەردای تورکیای بکەرۆنە. پۆکەی مەسرور بارزانی چێرو فشارو تورکیایەنە مانگو ١١و ٢٠١٩ی سەردای تورکیایش کەرد و چەنی ئەردۆغانی و چاوشئۆغلۆی و هاکان فیدان سەرۆکو دەتگاو میتی کۆبیەبێوە. دماتەر چەی چاوشئۆغلوی جە کۆنگرێوی ڕۆچنامەوانی هامبەشەنە جارێوتەر سوربییەی وێشان پەی دژایەتیکەردەی پەکەکە-ی نیشانەدابێوە. جە ئا کۆنگرە ڕۆچنامەوانەیەنە چاوشئۆغلۆ بە ئاشکرا و فشارش پەی مەسروری ئاوردەبێ و قسێ وزێ سەرو زاریش و بارزانیچ کە پەشۆکیاییش پۆوە دیار بێ، توتۍئاسا شۆنەیشەرە قسەکێ چاوشئۆغلوی دووبارێ مەکەرێوە.
شۆنیشەرە جە ٢٠٢٠/٠٢/١٦ی جارێوتەر مەسرور بارزانی و چاوشئۆغلو جە ئەڵمانیا جە پەراوێزو کۆببیەو ئاساییشی میاندەوڵەتی میوشن-ی کۆبیێوە و دیسان جەختشان جە دژبەری جمیەری ئازادی و پەکەکە-ی کەردەوە.
"بە فیت و فەرمان و تورکیای ڕێککوتەی سەرو شەنگالی و تەسلیمکەردەییش بە ئێراقی کریا"
جە ڕێککەوتو ٢٠٢٠/١٠/٠٩ی، بەبێ بەشداری شەنگالیەکان، میانو حکومەتو ناوەندی ئێراقی و پەدەکە-یەنە، ڕێککەوتێو سەبارەت بە ڕاوەبەردەی شەنگالی ئیمزا کریا کە بەشێوازێ جە شێوازەکان بەفەرمی تەسلیم کەردەی شەنگالی بێ بە حکومەتی ناوەندی ئێراقی، هەڵبەتە بەبێ وەرچەمگێرتەی ئیرادەو شەنگالیەکان. شۆنیەشەرە ئاشۆرا بی کە ڕێککەوتەکەی فراوانتەرەن جە ئانەیە کە تەنیا بە شەنگالی و دەوروبەریشەوە سنوردار بمانۆوە و چێر بەچێر ئێراق، تورکیا و پەدەکە بە موبارەکبایی ئەمەریکای و نەتەوە یۆگێرتەکان، (لۆزان)ێوی تازەشان ئیمزا کەردەن کە سەرجەنۊ سنورەکێ میساقی میللیی تورکەکان تۆخێ و زینڎێ مەکەرۆنەوە.
جەی ئی چوارچێوەنە، ڕژێمە ئەرەگێرەکەو تورکیای بە هامکاری پەدەکە-ی و حکومەتو ئێراقی هەنگامەی یەکەمەشان جە هەرێمو شەنگال نیا، بە ئا ئامانجە جمیەری ئازادی و ئێزیدیەکێ جە هەرێمەکەنە پەراوێژێ بوزیانێ و بێکاریگەرێ بکریانێ و جە شەنگالەوە زەمینە پەی نیای هەنگامەی دووەمێ بنریۆنە.
"هەنگامەی دووەمە نریا"
هەر چەنڎە ڕێککەوتەی سەرو شەنگالی بە مەردەی جەئەڎێ بی و ناڕەزایی ئێزیدیەکێ و ئازادیوازێ و پارت و لایەنێ کوردستانی و ئێراقیش ونەکەفتەوە، بەڵام هەر دمابەدمای ڕێککەوتەکەی، یەکسەر هەنگامەی دووەمەیچ نریا و بە پاو ئا هەنگامێ، جە یاگێوەنە بەنامێ (ئۆڤاکۆی) کە خاڵەو پنەیاوای یەرێ سنورێ باشور، باکور و ڕۆژاڤاو کوردستانیەنە، دەروازێوی سنوری میانو ئێراقی و توریایەنە بکریۆنەوە.
هەنگامەکێ جەلاو سەرۆکایەتیی وەڵێبەردەی ستراتیژیی سەر بەوەزارەتو بەروو تورکیایەوە چوون پڕۆژێوی ستراتیژی کارش سەر مەکریۆن و ئامانج چنەش جە هەنتری ئەوەبڕیەی هەر یەرێ بەشێ کوردستانی یانی باکور، باشور و ڕۆژاڤایەن.
ڕژێمو تورکیای جە ساڵەو ٢٠١٧ی و جە دمای ڕفڕاندۆمەکەو پانیشتو کوردستانی، نەخشەو ئا دەروازە سنوریەیشە متێ بێرە و جە ٢١٨نە حەیدەر عەبادی سەرۆککوەزیرانو وەختو ئێراقی پەی هەمان مەبەستی سەردای تورکیایش کەردەبێ. پاسە پیلانش پەی کریان، ئەگەر دەربازەکە بکریۆوە، ئاوەختە سنوورو خاپور (ئیبراهیم خەلیل)ی بێکاریگەر بکریۆنە و دەرەنجام جە دوور مەودانە بوزیۆرە. بڕیارە ئیتر جەی دوما خەتەو بازرگانی جە (ئۆڤاکۆی)ـەوە دەست پنەبکەرۆنە و بە دەربازنەبییەی بە دهۆک-ـەرە یەکسەر بلۆوە وەرهۆرزو شەنگالی و دماتەر تا تەلعەفەر، موسڵ، تکریت، سامەڕا و بەغداد و بەسرە، درێژە ببۆوە.
""ئامانج تۆخکەردەی و زینڎەکەردەی میساقی میللین"
هەڵبەتە بە نزیک بیەی جە ١٠٠هەمین ساڵەو پەیمانامەی لۆزان-ی، ڕژێمو تورکیا تەنها خەیاڵ و وەرمش زینڎەکەردەی میساقی میللین کە ئەرەگێرتەی موسڵی و کەرکوکی و ئەوەبڕیەی ڕۆژاڤا و باشوری جەوێش مەگێرۆنە. ئەوەکەردەی دەروازە سنوریەکەو ئۆڤاکۆی بەشێن جە بەدیئاوردەی ئا خەیاڵ و وەرمیە و جە دەروازەکەوە تا شەنگال، تەلعەفەر، موسڵ، تکریت و بەغداد، خەتەو شەمەندەفەری و ئوتوبان دروستێ بکریانێ و تەلعەفەری تورکوماننشین ببۆنە بە دلێڕاسی پڕۆژە و پیلانەکەی. شۆنیشەرە گوایا پەی پارێزنای ئاساییش و ئەمنیەتو ئا خەتە بازرگانیێ، جەسنورەکێ ڕۆژاڤای و باشوریەنە خەندەق بدریانێ ونە و دیوارێ و خاڵێ و بنکێ چەمداریێ و سەربازیێ دروستێ بکریانێ و بە ئاشێوازە بە یەکجاری ئا دووە بەشەو کوردستانی جە هەنتری ببڕیانێرە.
هەرپاسە کە وەڵتەر ڕژێمو تورکیای جە سنورەکێ ڕۆژهەڵاتی و باکوریەنە ١٣٩ کیلۆمەترێ و جە سنورەکێ باکوری و ڕۆژاڤایەنە ٨٣٢ کیلۆمەترێ دیوار و دەیان سەربازگێ و سەدان خاڵێ و بنکێ چەمداریش دروست کەردێنێ، هەمان چێویچ جە میانو باشوری و ڕۆژائاڤایەنە دووبارە بکەرۆنەوە.
"بەرزایەکێ و دەگایەکێ سورچیایەتی و سۆرانی و پەنگاوو بێخمەی تەسلیمێ تورکیای بکریانێ"
جەلایێ تەرەوە جە ٢٠٢/١٠/٢٠ی پەلیانەو (تەڤدا پرێس)ی وەڵاوش کەردەبێوە: جەدمای شکست و مەڕیای سپا ئەرەگێرەکەو تورکیای جە هەفتانین، چەنڎین هەفتێن پەدەکە کەوتنە پیلان ئەرەمتەی پەی پەلکێشکەردەی زیاتەرو سپا بەزیاکەو تورکیای پەی قوڵایی هەرێمو کوردستانی و جە ئا چوارچێوەنە هێزە چەکدارەکێ پەدەکەی جە بەرزایەکێ و دەگایەکێ دەڤەرەکێ سورچیایەتی و سۆرانی و پەنگاوو بێخمەی مەرزیێنێرە و بڕیارە دماتەر ئا یاگا تەسلیمێ سپاو تورکیای بکەرانێ.
بە پاو زانیارەکێ تەڤدا پرێسی، ئا شۆن و یاگێ کە بڕیارەن تەسلیمێ تورکیای بکریانێ بریتیێنێ جە، چەندین بەرزایێ و کەشێ سورچیاتی، سۆرانی، سەرنیشتو خەلیفانی، سپیلک، پەنگاوو پێخمەی و ڕاو بلە و بارزانی، هەرپاسە دەگایەکێ، (گۆڕەز، جۆنەر، کانی کولك، کنەك، خەلان، بەورکان، سرێشمە، ساوا و هەنار)ی و جە سەرجەم ئا یاگانە چەکدارەکێ پەدەکەی وەڵاوێ بیێنێوە و بازگێشان نیێنێرە. هامکات بە پاسەوانی هێزەکێ پەدەکەی، هێزەکێ تورکیای سەرقاڵێ دروستکەردەی بنکێ و بارەگایێ سەربازیێنێ.
تەڤدا پرێس زانیاری زیاتەرش دابێ و دەستنیشاش کەردەبێ: تا ئیسە دووێ لیوێ چەکدارێ پەدەکەی برینێ ئا شۆن و یاگێ کە نامێشان بریێنێ و بڕیارەن لیوایێوە تەرە پەیوەستو دووە لیواکەی ببۆنە. هامتەریب چەنی ئانەیە، هێزەکێ پەدەکەی و تورکیا دەستشان دان تۆقنای ژەن و زارۆڵەی و دەستگیرکەردەی خەڵکی مەدەنی و ئاستەنگی دروستکەردەی پێشان.
"پەدەکە هێز و چەکی قورسش ڕەوانەو (گارێ)ی کەرد"
جە چوارچێوەو جابەجاکەردەی پیلانە شەڕەنگێزەکێ تورکیای و هۆرگیرسنای جەنگی کوزد بەکوردیەنە و
جە بەردەوامی دژبەری کەردەی پەدەکەی وەرانوەر بە جمیەرو ئازادی کوردی و گەریلاکێ ئازادی کوردستانی، ئەی جارە هێزی تایبەتو (گوڵان)ی کە سەر بە مەسرور بارزانی، سەرۆکوەزیرو هەرێمو کوردستان-یەن بە چەکێ قورسێوە ڕەوانەو هەرێمو (گارێ)ی کریا. گارێ کە سەر بە هەرێمەکێ پارێزنای مەدیا-یەن و گەریلا چنەش باڵادەستەن و پەدەکە بە فەرمان و پیلانو ڕژێمە ئەرگێرەکەو تورکیای هەوڵ مڎۆنە کۆنترۆڵش بکەرۆنە و دمایی تەسلیم بە سپاو ئا ڕژێمە دژە کوردەیشە بکەرۆن.
دیمەنێ ڕەوانەکەردەی هێزەکەی و چەکە قورسەکێ پەدەکە-ی پەی گارێی نیشانەش مڎانێ کە بە ژمارێوی فرێ ماشینێ و باربەرێ ئا هێزێ و چەکێ و شۆفڵێ و بلدۆزەرێ و بێلێ میکانیکیێ، بریێنێ ناوچەکە.
سەرچەمە هەرێمیەکێچ ئاشکراشان کەردەن: ئا هێز و چەک و تفاقە سەربازییە، بریێنێ دەگایەکێ (مەلکێ، دۆستەکا، گیسێ، مامیشمیش، بەرزایی دینارتە)ی و بەرزاییەکێ (مەزرینگان، ناوخۆش، دفرێ)ی و دەگا ئاسوریی و زێباری نیشینەکێ بنارو گارێی”.
"مەسرور بارزانی پەی ڕەوایەتیدای بە جەنگەکەی سیناریوێ چەواشەکارانێ مەهۆنۆوە"
مەسررو بارزانی و پەدەکە بە پشتیوانی و هامکاری تورکیای، پەی ئانەیە ڕەوایەتی بە هۆرگیرسنای جەنگی کورد بەکوردی بڎانێ دەستشان دان ئەوەهۆنیەی چەنڎین سیناریوێ چەواشەکارانێ و بێبنەمایێ جە ئا نیشاچە:
تیرۆرکەردەی وەرپرسیارو دەربازەو سنورو سەرزێڕێ سەر بە قەزاو ئامێدیێ کە هەپەگە-ی بەدرۆش وستەوە.
دەستگیرکەردەی گروپێوی پەکەکە-ی جەلاو ئەنجومەنو ئاساییشو هەرێمی کە گوایا گەرەکشان بییەن جە هەولێر کەردێ تەرۆرستیێ و تێکدەرانێ ئەنجامێ بڎانێ کە کەجەکە و موراد کاریلان و ٣ ئەندامێ ئەنجومەنو ئاسایسشو هەرێمی سەر بە یەنەکە-ی بەدرۆشان وستەوە.
"پەکەکە و کەجەکە و گەریلا پشوو درێژانە و غەموەرانە مامەڵەشان چەنی پەدەکە-ی کەردەن"
جە وەڕانوەر بە ئا گردە خیانەت و دژبەریە کە پەدەکە و مەسرور بارزانی دژ بە جمیەری ئازادی پەیڕەوش مەکەرانێ، پەکەکە و کەجەکە و دامودەستگایێ و سازییەکێشان و هەپەگە، فرە پشوو درێژانە و غەموەرانە و وەرپەرسیارانە مامەڵەشان کەردەن و ڕاشان نەڎێنە ئەردۆغان و ڕژێمەکەش بە مەرام بیاوانێ و کورد بەکوردی دابەکوشتەی و ئایرو جەنگی هوناوی و یانەوێرانکەری کورد بەکورد هۆربگیسنۆنە. هەمیشە ڕاوەبەری و سەرکردایەتی جمیەری ئازادی و پەکەکە-ی و کەجەکە-ی پافشاریشان سەرو ئاشتیانە چارەسەری کێشێ و ئارێشەکێ چەنی پەدەکە-ی کەردەنەوە و هەوڵشان دان پەدەکە-ی جە دوژمنی و هێزهمئەرەگێرەکێ کوردستانی دوور بوزانێوە و بگێڵنانێشەوە ڕیزەکێ گەلی و یەکێتی نەتەوەیی.
جە دمایین پەیام و وندوایشانە هەم کەجەکە، هەم موراد کاریلان و هەم دوڕان کاڵکان پافشاریشان سەرو ئانەیە کەردەن و دژبەری وێشان پەی جەنگی کورد بەکوردی نیشان دانەوە و وازیارێ بیێنێ مەسعود بارزانی سەرۆکو پەدەکە-ی کە واتەنش هەرگیز ڕا بە جەنگو براکوژی نمڎۆنە، دەستوەردای جە بارۆدۆخەکەی بکەرۆنە و ڕاگیری جە هۆرگیرسنای ئا جەنگەیە بکەرۆنە. هامکات داواچ جە؟سەرجەم پارتێ ولایەنێ کوردستانی کریان، تا هەڵوێستشان ببۆنە و ڕانەڎانە جەنگی کورد بەکورد ڕووە بڎۆنە و پەیوەست بە ئانەیە ئەرک و وەرپرسیای وێشان هۆربێزانێ.
