کۆمیتەو ڕاوەبەری پەکەکەی ئەرەیاۋناش پەی ئانەی بانگەوازو 'ئاشتی و گلېرگەی دیموکراتیکی'ی ڕابەر ئاپۆی بێنە ئاراوە، ئێمە جە ئارۊ بەدماوە ئایێربەس ئەرەیاۋنمۍ؛ پێکئاوردەو مژارو پېسە چەک نیایرەیچ تەنیا بە سەرمەشقایەتی کردەیی ڕابەر ئاپۆی مکریۆ."
ئەرەیاۋناکەو کۆمیتەو ڕاوەبەری پەکەکەی سەبارەت بە بانگەوازییە تاریخیەکەو ڕابەر ئاپۆی پی جۊرەنە:
"بانگەوازییەکەو ٢٧و شووباتو ڕابەر ئاپۆی بە نامونیشانو "بانگەوازی ئاشتی و گلېرگەی دیموکراتیکی"، ڕاو گرڎو هێزە ئازادیی و دیموکراسییەکا ڕۊشن مکەرۆوە و پېسەنە مانیفیستۆو سەردەمی. ۋەروئانەی پەی گەلەکەیما و مرۆڤایەتی مانیفیستۆو گلېرگەو دیموکراتیکی زیاڎ کەردەن، بە ڕێزۆ سڵام ۋنەو ڕابەر ئاپۆی مکەرمۍ.
جابەجێ کەردەی دلېینەکەیش بە شێوێوە سەرکۊتانە فرە گرنگا
جە بانگەوازییەکەنە ئاشکران جە کوردەسان و ۋەرکۊتوو مېیامینینە قۆناغێوە تاریخی دەسشپنەکەرڎەن. ئینەیچ کاریگەریێوە گۊرە سەرو وەڵێکۊتەی ڕاوەبەری دیموکراتیکی و ژیۋای ئازادی جە سەرانسەرو جەهانینە منیۆرە. پېوەس پینەی ۋەرپرسیاری گنۆنە ملو گرڎ کەسۍ؛ مشۊم گرڎ کەسێ بە ئەرک و ۋەرپرسیاری ۋێش هۊربێزۆ و ئانیشا جابەجێ بکەرۆ.
بێگومان ئەنجامدای بانگەوازیێوە پی جۊرەیە گرنگ بۍ؛ جە ئیساتێوە جابەجێ کەردەی دلېینەکەیش بە شێوێوە سەرکۊتانە فرە گرنگا. پېسە پەکەکەی بەشێوێوە ڕاسەوخۆ بەشدارۍ دلېینەو بانگەوازیی نامریای نیمۍ و دیاریش مکەرمۍ بە پاو پەنەوازیەکا بانگەوازییەکەی جمێوە و جا بەجێشا مکەرمۍ. بەڵام پەی سەرکەوتەی مشۊم هەلومەرجو سیاسەتی دیموکراتیک و زەمینەی یاسایی مەیسەر بکریۆ.
ئا هێزەی ڕاوەبەردەی ئەوەکۊشای و ئا ئەزموونەی پەکەکە خولقناش مڎریۆ بە گەلی
ئاشکران پەکەکە، بی بە تەڤگەرو حەقیقەتی و قارەمانی گۊرەو ئی نیم سەدەیەو دمایی کوردەسانی. گرڎ چېوۍ بە ئەوەکۊشای گۊرەو قارەمانی، فیداکاری، قوربانی و هەرمانۍ گۊرۍ بەدەس ئاما. بە ڕێز، وەشەسیایۍ فرۆ و پنەزانایۆ گرڎو گەشمەرڎە قارەمانەکا ئی ئەوەکۊشاو ئازادییە یاڎۍ مکەرمېوە. جە ئیساتۍ بەدماوە بە هەمان ڕۆح و باوەڕی دەسکۊتە تاریخیە نامبریاکاوە پڕمێوە پەی دلۍ پرۆسېوە تازەو ئەوەکۊشای. ئا هۆشمەندییەی ڕابەر ئاپۆ پێشکەشش کەردەن و ئا ئەزموونە گۊرەی پەکەکە خوڵقناش، عالی، درووسی، زەریفی و هێزو ڕاوەبەری ئەوەکۊشای ئازادی بە ڕاو سیاسەتو دیموکراتیکی مڎۆ بە گەلەکەیما.
تا هرووژم نەکریۆ هیچ هێزێوەما چالاکی چەکڎاری ئەنجام نمەڎۆ
چی چوارچێوەنە، پەی ئانەی بانگەوازو ئاشتی و گلېرگەی دیموکراتیکی ڕابەر ئاپۆی بێنە ئاراوە، جە ئارۆوە ئایێربەس ئەرەیاۋنمۍ. تا هرووژم نکریۆنە سەرما، هیچ هێزێوەما چالاکی چەکڎاری ئەنجام نمەڎۆ. مژارو چەک نیایرەیچ تەنیا بە سەرمەشقایەتی پراکتیکیی ڕابەر ئاپۆی ئەنجامگیر مەبۆ.
پەی سەرکۊتەی کۆنگرەی پەنەوازا ڕابەر ئاپۆ ۋێش ڕاوەبەری کۆنگرەی بکەرۆ
هەرپاسە ئێمە ئاماڎێنمۍ کە بە پاو داواکاری ڕابەر ئاپۆی کۆنگرەو پارتەکەیما ئەنجام بڎەیمۍ، بەڵام پەی ئەنجامدای ئینەی پەنەوازا هەلومەرجی گونجیا مەېسەر بکریۆ و پەی سەرکۊتەی کۆنگرەی پەنەوازا ڕابەر ئاپۆ ۋێش سەرمەشقایەتی کۆنگرەی بکەرۆ و ڕاوەبەرش بکەرۆ. تا ئیساتۍ چنی گرڎ غەڵەت و کەموکوڵیەکاما ڕاوەبەریەکاما جەنگش کەرد؛ بەڵام تەنیا ڕابەر ئاپۆ متاوۆ سەرماشقایەتی سەردەمو ئاشتی و گلېرگەی دیموکراتیکی بکەرۆ.
پەنەوازا هەلومەرجو ئازادیی بەڎەنی، ژیۋای و هەرمانکەردەی ئازاڎ مەیسەر بکریۆ
حەقەتینە ۋەرچەمەکۍ بە ئاشكرا نیشانەش مڎا پەی ئانەی بانگەوازو ئاشتی و گلېرگەی دیموکراتیک بە شێوێوە سەرکۊتوو پێک بۍ، پەی دیموکراتیزەکەردەی تورکیای و ۋەرکۊتوو مېیامینی سەرو بنەماو چارەسەری دیموکراتیکی پرسو کوردی، پەی وەڵێوستەی تەڤگەرو دیموکراسی جەهانی، پەنەوازا مەرجەکۍ ڕابەر عەبدوڵا ئۆجەلانی مسۆگەرۍ بکریا تا ئانەی بتاوۆ بە شێوێوە بەڎەنی ئازادانە بژیۋۆ و هەرمانە بکەرۆ، بتاوۆ بەبێ ڕاگیری چنی ئا کەسا گەرەکش بە هەمڕاکایچشۆ عیلاقە بینۆنە. ئێمە هیواڎارێنمۍ کە ئا هەلومەرجە جە لایەنو ئەرەمەرزیا پەیوەندیدارەکا دۊڵەتیوە جابەجێ بکریا.
بانگەواز دمایی نییا بەڵکم سەرەتێوە تازەن
گەل و دۆسە ئێژایەکاما!
بانگەوازو ڕابەر ئاپۆی بەدڵنیاییوە دمایی نییا، بە پێچەوانۆ سەرەتێوە تازەن. پېسە جە ئەرەیاۋناکەینە بەشێوێوە سەرنج کێش باس مکریۆ و بە شێوێوە ئاشکرا وزۊش ۋەروچەما ئا چێوۍ کە پەنەوازۍ بێنۍ جە ٣٥ ساڵی ۋېیەردەنە و بەتایبەتیچ جە ٢٠ ساڵی دماینەنە ئەنجام بڎریا، بەڵام بە ئەندازۍ پەنەواز جە کاتو ۋێشەنە نەکریێنۍ، ئیساتۍ پەنەوازا بەدڵنیاییوە ئەنجام بڎریا. چی بارۆ پەنەوازا بانگەوازو ڕابەرایەتی، مەڵامەتەکاش، تایبەتمەندی و ئەرکەکێش پرۆسە تازەکە کە دەسش پنەکەردەن بە دروسی و تەمامی بیاوانە و پەنەوازا پەنەوازیەکێش بە سەرکۊتەیی جابەجێ بکەرا. پەنەوازا بە ۋەرپرسیاری و جددیەتێوە گۊرۆ نزیکۍ دلېینەو بانگەوازەکەی باوە و فرە گرنگا کە جە گرڎ بوارێنە بە شێوێوە سەرکەوتە جابەجێ بکریۆ.
پەنەوازا گرڎما ۋێما بە ۋەرپەرس بزانمۍ پەی سەرکەوتەی بانگەوازو ڕابەرایەتی
ئێمە یاڎما نەشۆ کە قورستەرین بار هەمیشە ڕابەر ئاپۆ وستەنش سەروشاناش، ڕاما ڕۊشن مکەرۆوە و سەرمەشقایەتیما مکەرۆ. ئیساتۍ بە 'بانگەوازو ئاشتیی و گلېرگەی دیموکراتیک'ی هەنگامېوە تازۍ منیۆ و پەی گرڎو چېردەسا بەتایبەتی ژەنا و جوانا پڕۆسېوە تازەو ئەوەکۊشای دەسپنەبکەرۆوە. پۊکەی ئێمە تایبەتمەندییەکاو ئی پڕۆسە تازەیە بە دروسی بیاومېنە و سەرو بنەماو ئانەی کە هەمیشە جە ۋەرا ۋەرو هەر جۆرە ساختەکاری و هرووژمێوەنە ئاماڎۍ بیمۍ، ئەرکەکاش بە سەرکەوتەیی جابەجێ بکەرمۍ. ڕێکوستەبیەی دیموکراتیکی ۋێما و ئەوەکۊشای ئازادییما جە گرڎ مېڎانێنە بە ئازایەتی و فیداکاریێوە گۊرۆ جە کوردەسان، ۋەرکۊتوو مېیامینی و جە چوار لاو جەهانی گەش بکەرمۍ. پەنەوازا گرڎما ۋێما بە ۋەرپرسیار بزانمۍ پەی سەرکەوتەی بانگەوازو ڕابەرایەتی.
بانگەوازی؛ بەهێزتەر خاوەنداری جە ٨و ئاداری و نەورۆزی بکەردۍ
ئانە، ئێمە کۊتیمۍ مانگەو ئادارێوە تازەی و جە جۆش و خرۊش و ٨و ئاداری و نەورۆزینە مژیومۍ. ئێمە شۆڕشو ئازادیی ژەنا سەرو بنەماو ژنۆلۆژی پەرەپنەبڎەیمۍ و سەرو هێڵۊو شارستانییەتی دیموکراتیکی ژیۋای گلېرگەی ئەخلاقی و سیاسی ڕێکوزمۍ. کۊشش مکەرمۍ حەقیقەتو ئاپۆیی بە شێوێوە دروس و تەمام بیاومێنە و شۆڕشو حەقیقەتی کە شۆڕشو زیهنییەتی و شێوازو ژیۋاین پەرەپنەبڎەیمۍ. دما بانگەوازو ڕابەر ئاپۆی جە بنەڕەتەنە بانگەوازی بەهێزتەر خاوەنداری کەردەین جە ٨و ئاداری و نەورۆزی و بە جۆش و خرۆشێوە گۊرۆ پیرۆزشا بکەردۍ. جە گرڎ کەسۍ زیاتەر پەنەوازا ژەنا و جوانا ئی بانگەوازیە بە دروسی بیاوانە، بە بەهێزی پەشتگیریش چنەبکەرا و پەنەوازیەکاش جابەجێ بکەرا.
سەرو ئی بنەمایا ٨و ئاداری ڕۆو ژەنا کرێکارا و نەورۆز جە گرڎو ژەنا و جوانا، گەلوو ۋێما و دۆسەکاما پیرۆز مکەرمۍ و داوا جە گرڎ لێوە مکەرمۍ کە بە ڕۆحو ٨و ئاداری و نەورۆزی پەشتگیری جە بانگەوازو ڕابەرایەتی بکەرا و جە گرڎ مېڎانێنە ئەوەکۊشای ئازادیی گەش بکەرا!
بژیۋۍ سەرمەشقی قارەمانو گەلەکەیما پەکەکە!
"بژیۋۆ ڕابەر ئاپۆ!"
