شاندێوە ئەورووپاوە دژوو گۊشەگیریی ڕەهای دژوو ڕابەروو گەلوو کوردی عەبدوڵا ئۊجالانی، کە ٣٥ مانگێن هیچ زانیاریێوە سەروو ژیوایش نیا، کە زیندانوو ئەمنیی تایبەتوو جۊروو F گیریان، نمەزانیۊ، سەرۍ ئەستەنبوڵیشا دا. شاندوو "چارەسەری دیموکراتیکوو پەرسەو کوردی و شاندی میاننەتەوەیی دژوو گۊشەگیری" کە پەرلەمانتارێش چەنەنێ، پەی ماوەو دووۍ ڕاو  ڕۊژ سەرۍ ئەستەنبوڵیشا دان. یوەم  وتاروو شاندەکەو ئارۊی فەرمانگەو یاسایی سەدەی بێ.

شاندەکە سەرۍ نویسگەو یاسایی سەدەیش بین ئۊغڵونە کەرد. پارێزنەر سوزان ئاکیپا، ئیبراهیم بیلمەز، جەنگیز یورێکلی، ڕێزان ساریجا و مەزڵوم دینچ چەنی قسەکەروو پەیوەندییەکاو دەم پارتی ئەبرو گونای خێرامایشا وەنەو  شاندەکەی کەرد.  نوێنەروو پارتوو چەپوو کۊنستانزە کریسێ، سەرۊکوو EFA ماریا لۊرینا لۊپێز دی لاکال، نوێنەروو پارتی چەپوو سویدی و کۊڕبەندوو چەپی ئان جەسیکا تێریزا کارلکڤیست، سیناتۊروو ئەنجوومەنی نیشتمانیی ئیسپانیای لە ئێه بیلدو (BASK) جۊسو ئیستارۊنا ئەلیزۊندۊ، یاگەدارو پەرلەمانوو کەتەلۊنیا (CUP) مۊنتسیرات ڤینیتس پەیجز، سیناتۊروو گرووپوو پارتوو سەر دانانوێنوو فەڕەنسای سێگۊلین ئەمیۊت، ڕاوێژکاروو گرووپوو پارتی غەیرە ئەرەنیشتاو فەڕەنسای کلیمنت ئیڤانس و پەرلەمانتاروو پارتی سووری نەرویجی هێگۍ بای نیهۊڵت شاندەکەنە بەشدارێنێ.

پارێزنەر ئیبراهیم بیلمەز، میانوو سەردایەکەینە باسوو هەوڵەکاش کەرد پەی ورگێرتەی زانیاریی جە ڕابەروو گەلوو کوردی عەبدوڵا ئۊجالانی.  بیلمەز شاندەکەش جە بێدەنگیی میکانیزمە میاندەوڵەتییەکا دژوو گۊشەگیریی ئیمرالی و هەوڵە میاندەوڵەتییەکا پەی دیداری چەنی موەکیلەکەیش هاگادارۍ کەردێوە.

 دماو سەردایەکەی کە ڕووەو ڕۊنامەوانیرە وزیابێرە، بیلمەز واتش: "زانیاریما سەبارەت بە گۊشەگیریی ڕەهاو ئیمرالی پەنە ئەرەیاونایمێ. واتما، ئی پاڵپەشتییە پەی ئێمە فرە گرنگا. گەرەکمانە هەوڵە یاساییەکا پەی وێستەیۊ  ڕاچارەی سەبارەت بە بەڕێز ئۊجالانی وزیۊ هەرمانە، پەوکای ئێمە سەردای شاندەکەی فرە بە گرنگ مزانمێ."

دمایی شاندەکە دەقەکەش واناوە و واتش، کە کێشەی چارەسەرنەکریاو کوردی هەڵای کاریگەرییش سەروو تورکیای و مەنتێقەکەی وەش کەردەن.

شاندەکە ئاماژەش کەرد، ساڵاو نەوەدەکاوە، وەختۍ پەکەکە و بانگەوازەکاو ڕابەری زیندانیکریاو گەلوو کوردی عەبدوڵا ئۊجالانی و هێزە سیاسییەکێ، کە نوێنەرایەتیی ئیرادەو گەلوو کوردی کەرا، داواو ئاویربەسی و دماییئاردەی جەنگی و دایوسانای ئاشتییش پەی ئازاڎیی کەرد، بەڵام دەوڵەتوو تورکی بەردەوام بە جەنگ و فشار جوابوو بانگەوازەکەیش دانۊ".

 دەقوو شاندەکەینە دەسنیشان کریان، کە پێویسا ئیتر عەبدوڵا ئۊجالان ئازاڎ کریۊ و واتش: "بە مەبەسوو دەسپەنەکەردەیۊ پڕۊسەکە بە ئامانجوو چارەسەرێوە سیاسیی هەمیشەیی و ئاشتییانەی پەی پەرسەو کوردی، هەم فشارەکاو سەروو پارتە سیاسییە یاساییەکا پەی دمایئاردەی بە گۊشەگیریی بە ڕابەروو گەلوو کوردی عەبدڵا ئۊجالان گرد هەوڵێوە پێویس مشۊم بدریۊ، ئێمە گۊشەگیریی عەبدوڵڵا ئۊجالانی بە پاشێلکەردەی مافەکاو ئینسانی و پاشێلوو یاسا میاندەوڵەتییەکا مزانمۍ و شەرمەزارش کەرمێ، ئیساتۍ وەختوو ئاشتی و پێوەژیوان، وەختوو ئازاڎکەردەی عەبدوڵا ئۊجالانین. وەختوو ژیواێوە دوور جە ملەملا و ئاڵۊزییەکان پێوە  وەرکەوتوو دلێڕاسەینە".

ئاخروو دەقەکەینە ئامان، "ئێمە چەنی هەڵمەتەو پەشتیوانی پەی کوردستانی و ئا ڕێکوزیایا چێگە نوێنەرایەتیی کەرا هەنمێ، هەوڵۍ مدەیمۍ چەمداراو ورچنیەی پەی ورچنیەیەکاو دلۍ ٣١و ئازارینە ڕێکۍ وزمێ. بەردەوامۍ بیمۍ جە  پەشتیوانییەکاما پەی شاندوو ئەورووپای". ئێمە خێرامای جە پەرلەمانتاراو نەتەوە جیاوازەکا کەرمۍ و پەشتگیریی جە مافی ڕەواو دەم پارتی کەرمێ، جە بەشداریکەردەی ئازاڎانەو ورچنییەینە.  

 جێی ئاماژەینە. شاندەکە بەردەوامۍ با، جە سەردایەکاشا پەی لاو ڕێکوزیایەکاو گلێرگەی مەدەنی و لایەنە سیاسییەکا.