شەنگالنە بەگەرمی خێرامایۆ وەنەو ژەنە ڕزگاربیێوە ئێزدیێ کریا
ژەنە گەنجە ئێزدییە کۆڤان عیدۆ خرتۆوە، کە وەختوو فەرمانەکێ ٢٠١٤ داعشی ئڕفانیێبێ، دماو ئانەی لاو یەپەژەیۆ کەمپوو هۆلینە ڕزگارە کریا، شەنگالنە دریاوە ەسوو کەسوکارەکەیشۆ.
ژەنە گەنجەی ئێزدییە کۆڤان عیدۆ خرتۆوە، کە ٣ ئابوو ساڵەو ٢٠١٤ چەتەکاو داعشی ئڕفانێبێ، ئەنجاموو ئۆپراسیۆنوو قەسەدەینە کەمپوو هۆلینە ڕزگارە کریا، تاژێ بە بنەیانەکەیش شادەشا کەردۆ، کۆڤانە بۆنەو ئا خێرامایە گەرمەیۆ سوپاسوو ژەناو ئێزدییش کەرد و واتش، "ئی خێرامایە هەستێوە فرە وەشا پەیم. پێسە چەنی بە دڵێوە وەشۆ گێڵانێوە پەی بنەیانەکەیم، هومێدەوارەنا گردوو دیلەکای تەریچ پێسە گێڵاوە دلێ یانەکاشا".
مانگەو شوباتی هێزەکاو ئاسایشوو دلێ سەرنیشت و وەرکەوتوو سوریای بە هامکاریی قەسەدەی و یەپەژەی ئۆپراسیۆنێوەشا بە نامێ "مرۆیی و ئاسایشی" کەمپوو هۆلینە کەرد، دلێشنە کۆڤانەی ٢٦ ساڵە کە وەڵێ ١٠ ساڵا چەتەکاو داعشی ئڕفانێبێ، کەمپەکەنە ڕزگارە کریا.
ئا ژەنە ئێزدییێ ئەوەڵ دریێبێ دەسوو یانە ئێزدییاوە کانتۆنوو جزیرەینە، دمایی ڕاو هێزە ئەمنییەکاوە دریا دەسوو هێزەکاو یەبەشەی و یەژەشەیوە.
جمیەروو ئازادیی ژەناو ئێزدی (تاژێ) بە ئامادەبییەی ژمارێوە وەرەچەمی جە ژەنە ئێزدییا خێرامایشا جە کۆڤان عیدۆ خرتۆی کەرد و دمایی بە هەلهەلە و پێشکەشکەردەی ولا لاو بنەیانەکەیشۆ خێرامایش وەنە کریا.
عەدول عەلی ئەندامەو تاژێ دڵوەشیی وێش بە ڕزگاربییەی ئا ژەنە ئێزدیێ نیشانە دا و سوپاسوو هێزەکاو وەرنیشتوو کوردستانیش کەرد و واتش، "خێرامایۆ کۆڤانێ کەرمێ، ئینایمێ سەروبەندوو ٨وو ئادارینە. بە بۆنەو ئا ڕۆیۆ مەبارەکبایی جە سەرجەموو ژەناو ئێزدی کەرمێ و هومێد کەرمێ سەرجەموو ئا ژەنا بە دیلی گیریێنێ ڕزگارێ کریا. قەسەدە و هێزە ئەمنییەکاو وەرنیشتی بە ونەو وێشا ئا دیلاما ئازادێ کەرا".
لاو وێشۆ مامۆو کۆڤانێ بە نامێ خەڵەف شوانیوە، کە خێراماییەکەنە ئامادە بێ قسێش پەی ئاژانسەکەیما کەردە و واتش، "ئا وەختە چەتەکاو داعشی هجوومشا کەرد، کۆڤانە و بنەیانەکەش گیریێ. جە سنونێوە بەردشا پەی خانەسۆری و چایچۆ پەی ڕەقای. دماو ئازادبییەی ڕەقای فاڕیاوە پەی کەمپوو هۆلی، بەڵام نەیارابێش بواچۆ ئێزدییەنا. وەروو ئانەی بنەیانەو داعشەکا ئا کەسا کوشا کە ماچا ئێزدییەنا".
خەڵەف شوان سوپاسوو هێزە ئەمنیەکاو وەرنیشتوو کوردستانی، یەبەشە و یەژەشەیش کەرد و واتش، "سوپاسوو یەبەشە، یەژەشە و هێزەکاو وەرنیشتی کەرمێ، کە بە ڕەنج و هەوڵوو وێشا دیلەکاما ئازاد کەرا و ماراشاوە پەیما. بنەیانەو کۆڤانێنە هەڵای ئەدا و تاتەش دیارێ نییەنێ، هیچ هەواڵێوە بارەشاوە نیا. داوا وەنەو لایەنە پەیوەندیدارەکا کەرمێ، پەی گێڵایۆ بێسەروشۆنککریایەکاما هەوڵێ بدا. هەڵای حکومەتوو عێراقی هیچ هەنگامێوەش پەیشا نەنیان، مشۆم وەرپەرسیی وێش بیاونۆ یاگێ".
