واتەواچوو دەسوەڵێوستەی ئازاڎیی پۍ عەبدوڵا ئۆجالانی جە سەرنیشت و ۋەرکەوتوو سوریای فەرزەندە مونزور ئەرەیاۋناس، ئا ئیمزۍ کە پۍ ئازاڎیی عەبدوڵا ئۆجالانی کۊکریاوە، دماو تەمام بیەو کەمپینەکەیشا جە ٤و نیسانی، راسەوخۆ رادەسوو ئەنجومەنوو ئەوروپای کریا.

فەرزەندە مونزور جە دیڎارێنە چنی ئاژانسوو هەواڵوو فوراتی ئەرەیاۋناش، کە جە ٩و شوباتیوە جە تەرەفوو دەسوەڵێوستەی گەلوو سەرنیشت و ۋەرکەوتوو سوریایۆ جە گرڎوو شارەکانە لوجنەشا سازکەردەن و دەسشا بە هەڵمەتەو کۆکەردەیۆ ئیمزایا کەردەن.

مونزور ئەرەیاۋناش، کە پۍ ئازاڎیی جەسڎەیی عەبدوڵا ئۆجالانی، جە ئاستوو سەفەربەرینە ۋێشا حازر کەردەن و هەرمانەکەرا و واتش، "جە چوارچێوەو هەڵمەتەکێنە کە لاو خەڵکیچۆ مایۍ سەرنجیا، دلۍ یانانە و دلۍ ڕێکوزیا و ئەرەمەرزیاکانە ئیمزۍ کۊکریاوە، سەکۆ منریۊرە. تا ئیسە ١.٥ ملیۆن و نیمۍ ئیمزۍ کۊکریێنێوە. هەڵمەتەو کۆکەردەیۆ ئیمزایا تا ٤و نیسانی بەردەوام بۆ".

نامە پۍ ١١ ئەرەمەرزیایا تەندروستی و مافی و یاسایی

فەرزەندە مونزور ئانەش وست ڕووە، کە پەیوەس بە پاشێلکارییە یاساییەکا جە دژوو رابەروو گەلوو کوردی عەبدوڵا ئۆجالانی پەیوەندییشا بە ١١ رێکوزیا و ئەرەمەرزیایا پێسە دکتۆرا بێسنووری، رێکوزیاو چنەویەردەی میان نەتەوەیی، ئەنجومەنوو مافەکاو مرۆڤی جە نەتەوەیۆگێرتەکانە، کۆمیتەو ڕاگێرتەی جە ئەشکەنجەو ئەنجومەنوو ئەوروپای (سی پی تی)، کۆمیتەو ڕاگێرتەی جە ئەشکەنجەی سەر بە نەتەوەیۆگێرتەکا، ئەنجومەنوو ئەوروپای، دادگاو سزاو میان نەتەوەیی، دیوانوو دادی میان نەتەوەیی، رێکوزیاو چەمڎاری مافەکا مرۆڤی (هیومان رایتس وۆچ)ی کەردەن و واتش، " رابەر ئاپۆ وێنا و نوێنەرایەتی گەلێوە کەرۆ، چارەنوویسی سیاسی دیاری کەرۆ. جە ۋەرا ۋەروو رابەر ئاپۆینە، پاشێلکارییێوە جددی یاسایی ئینا ئارانە. چا هەڵمەتێنە کە ٢٩و شوباتی دەسش پنەکەرد، دامودەزگا و رێکوزیاکۍ سەرنیشت و ۋەرکەوتوو سوریای دەس بە کیاناو ناما کەرا. ئا هەڵمەتۍ بە سەرمەشقایەتی دەسوەڵێوستەی ئازاڎیی عەبدوڵا ئۆجالانی ئەنجام مڎریۆ".

سی پی تی بە پاو ویستوو تورکیای جمۊوە

فەرزەندە مونزور یاڎش ئاردۆ کە شاندوو سی پی تی جە ما بەینوو ١٣-٢٢ۍ شوباتینە سەردای تورکیایش کەردەن، بەڵام نەلان ئیمراڵی واتش: "ئیمڕاڵی ناوەندوو دژوارتەرین ئەشکەنجەیا. جە وەختێنە کە گەلوو کوردی و دۆساش جە دژوو ئەشکەنجەی، پۍ ماڕای گۆشەگیری و مسۆگەرکەردەی ئازاڎیی جەسڎەیی دەنگوو ۋێش بەرز کەرۊوە، داخەم مەشۆ سی پی تی ملۆ تورکیا بەڵام سەردای ئیمراڵی مەکەرۆ. سی پی تی بە پاو بەرژەوەندییە سیاسیەکاش و بە پاو ویسوو تورکیای جمۊوە. دوورا جە ئەرک و ۋەرپرسیاریەکا ۋێش. مشۊم سی پی تی جارێوەتەر بلۆ تورکیا و دەموو دەس سەردای ئیمراڵی کەرۆ. جە ماوەو مانگێنە چوار جارۍ جە مەرمەرەنە بوومەلەرزە کۊت. مشۊم رابەر ئاپۆ بتاوۆ دەموو دەس پارێزنەر و بنەیانەکەیش بوینۆ. ئێمە مەزانمۍ ئیمراڵینە چێش ڕووە مڎۆ. مشۊم سی پی تی ئەرکوو ۋێش جا بەجۍ کەرۆ".