سەرو داواو بانگەوازو میانی گلېرگەی دیموکراتیکی کوردی (نەجەدەکە)ی و ئەنجوومەنو ژەنا ئامارای، جە ستۆکهۆڵمەنە مەراسمێوە شایتە پەی گەشمەرڎا ئەنجام دریا، جە مەراسیمەکەنە کە بە سەڎان کوردەسانیۍ بەشدارۍ بێنۍ، چنەشەنە بە ئاماڎەبیەی بنەیانەو گەشمەرڎا، گەشمەرڎۍ مانگۊو گوڵانی یاڎۍ کریێوە.

جە تەلارەو مەراسیمەکەینە شانبەشانو وێنەو هەردووە گەشمەرڎۍ کادرۍ سەرمەشقۍ پەکەکەی عەلی حەیدەر قەیتان و ڕەزا ئاڵتوونی وێنەو گەشمەرڎا ڕاو ئەوەکۊشای ئازادی نریابێرە. هەر جە تەلارەکێنە شانبەشانو ئاڵاو کەجەکەی و پەکەکەی وێنەی گۊرەو ڕابەر ئاپۆی هۊرواسیا بۍ.

سەرەتاو مەراسیمەکەی بە دەیەقێوە ڕێزگېرتەی دەسش پنەکەرڎ و دماتەر هامسەرۆکو نەجەدەکەی، جەماڵەدین دڵباش قسێش کەردۍ و جە قسەکاشەنە بە تێروتەسەلی بە هۊرسەنگنای سیاسی و تاریخی باسش جە ڕۆژەڤە هەنووکەییەکا کەرڎ.

هەر جە مەراسیمەکەنە پەیام و هۊرسەنگنایۍ تەرۍ سەرو سەنگینی کۊشش و ئەوەکۊشای گەشمەرڎا کریا. جە بەردەوامی هۊرسەنگنایەکانە سەرنج وزیا سەرو پەیامو 'بانگەوازو ئاشتی و گلېرگەی دیموکراتیک'ی ڕابەر ئاپۆی.

دماو قسەکا بەڵگەفیلمېوە دەربارەو ئەوەکۊشای شکۆدارانەو گەشمەرڎا نمایش کریا، جە مەراسیمەکەنە هونەرمەڼ و تاتەو دوۍ گەشمەرڎا هۆزان جۆمەرد چن بەرهەمێوە ۋێش پێشەکەش کەرڎ و بە واتەیۆ شاکارە-گۆرانیەو 'ئەز گەشمەرڎەنا'ی مەراسیمەکە بە کۊتا یاوا.