جە پارێزنەرا نوسینگەو یاسایی سەڎەی رازیە ئۆزتورکە ئەرەیاۋناش، قسۍ سی پی تی پەی ANF ی بە پاو پێشنیاز و تێبینیەکا وەڵتەرو ۋێشا و دادگاو مافەکا مرۆڤوو ئەوروپای نیا و واتش، "یاساکۍ سزادای قورسیچ جەبارەو موەکیلەکاماوە جابەجێ نمەکریۆ".
پارێزنەرە رازیە ئۆزتورکە واتش، "ئەگەر حکومەتو تورکیای بە پاو پێشنیازەکا نەجمۆوە، سی پی تی متاوۆ پرۆسېوە بوزۆ گەڕ. بەڵام ئانەی نمەکەرۆ. بە جۆرێ جمۆوە کە هیچ بڕگە و مادێوە بیەیش نییا. بەڵام قەرارەکەو ئازەربایجانی جارێوەتەر بەرشوست سی پی تی جە ۋەرا ۋەرو حکومەتو تورکیاینە دەبڵ ستاندەر جمۆوە و پی جۆرە ۋێش ئاشکرا کەرد."
سی پی تی جەبارەو زیڼانو ئیمراڵی و رابەرو گەلوو کوردی عەبدوڵا ئۆجالانی، قسێش پەی ئاژانسەکەیما کەردۍ و ئانەیچ دەنگدایۆش بۍ. جە پاڕێزنەرا نوسینگەو یاسایی سەڎەی رازیە ئۆزتورکە باسش چانەیەکەرد کە سی پی تی پاگیرا سەرو هەڵوێسی وەڵینوو ۋێش. رازیە ئۆزتورکە ئانەش وستڕووە کە قسەکۍ سی پی تی پېسە بەرەنجاموو هەڵمەتەو "ئازاڎیی پەی عەبدوڵا ئۆجالانی" دریێنۍ و ئەرەیاۋناش، "درێژە پا هەوڵوێستەیشا مڎا کە جە کاتوو دیڎارە رووبەڕووەکانە گېراشەنە ۋەر، بەڵام ئەجۊمەنە ئەگەر یاوێبا ئا خاڵۍ کە چەمپنەکۊتەی میدیایی ئەنجام بڎا، ئانە بەرەنجاموو ناڕەزایەتیەکان ۋەرا ۋەر بە سی پی تی و چالاکییەکاو ئەرەنیشتەی و ئێشکگیری ۋەردەموو سی پی تینە".
قسۍ سی پی تی و قەرارەکا دادگاو مافەکا مرۆڤوو ئەوروپای یۆمەگېراوە
رازیە ئۆزتورکە ئەرەیاۋناش، کە ئامای سی پی تی پەی ئی ئاستیە گرنگا، بەڵام کەشێوە پا جۆرە نیشانە مڎۆ کە جە سەرانسەرو زیڼانەکانە مامەڵە و رەفتاری خراپ بیەیش نییا و واتش، "هەوڵ مڎا کەشێوە پا جۆرە ساز بکەرا کە ئیدارە و کارمەنڎا زیڼانی هیچ مامەڵېوە خراپ و نەشیاو ۋەرا ۋەر بە زیڼانیا نمەکەرا، تەنیا قەڎەغەو دیڎاری چنی پارێزنەرا و بنەیانەکا هەن. بەڵام ئا ئاژە بە پاو پێشنیازەکا وەڵتەرو سی پی تی، تێبینیەکا و حەرپاسە قەرارەکاو دادگاو مافەکا مرۆڤوو ئەوروپای نییا، واتە یۊنمەگېراوە. ۋەرو ئانەی تەنیا هەڵوێسوو کارمەندا جە ۋەرا ۋەرو موەکیلەکامانە نمەبۆ پېسە مامەڵەی خراپی هۊربسەنگیۆ. زیاتەر جە ٤٠ مانگان زانیاریما جە موەکیلەکاما نییا. هیچ هەواڵێشا نمەزانمۍ و ئاژێوە نامرۆڤانە ئینا ئارانە".
تەنانەت چا مافایچە بێبەشېنۍ کە جە سیستموو سزادای قورسینە دیاریکریێنۍ
رازیە ئۆزتورکە ئاماژەش پانەیەکەرد، کە جە قسەکا وەڵتەریشانە واچېنۍ، بە پاو پیمەر و بنەماکاو مافوو مرۆڤی نییا، بەڵام ئیساتۍ جیاوازتەر جماوە و پی جۆرە بەردەوامە بۍ: "وەڵتەر ئاژەکەشا پېسە "بە پاو بنەماکا مافەکاو مرۆڤی نییا' پێناسەکەردەبۍ. ئێمە ماچمۍ با تەماشەو هەلومەرجەکەی بکەرا، زیڼانێوە دوورگەکەی ئینا چوارچێوەو سیستەمو سزادای قورسینە، بەڵام راس نییا ئینسان بواچۆ کە ئانەیچ جابەجێ مکریۆ؛ مشۊم پېسە نامۍ مرۆڤ بواچۆ کە ئینۍ چېرو سیستەموو سزادای قورسینە، بەڵام خاوەن مافەکاو دلۍ سیستموو سزادای قورسیچ نیەنۍ. چا سیستمەنە کەسەکۍ مافوو ئانەیشا هەن، کە چنی بنەیانەی و پارێزنەراش دیڎار ئەنجام بڎا. نمەبۆ ئانە سنووردار بکریۆ. بەڵام جە زیڼانو دوورگەو ئیمراڵینە، یۆ چا مافایچە جابەجێ نمەکریا. ئاژەکە پی جۆرەنە، ئاشکران ئانە نەک هەر مامەڵەی خراپ بەڵکم ئەشکەنجەداین. سیستموو جابەجێکەردەی سزای تنکریای و قورس پېسە ئەشکەنجەی دیاریکریابۍ. واتە پێچەوانەو بڕگەو یەرەموو پەیماننامەو مافەکا مرۆڤوو ئەوروپاین. چاگە ئاژێوە فرە چانەی زیاتەریچ هەن".
پەیوەڼی ئاڎیشا بە تەمامی چنی جیهانوو بەری پڕچیان
پارێزنەرە رازیە ئۆزتورکە ئەرەیاۋناش، کە ئەشکەنجە ۋەرا ۋەر بە رابەرو گەلوو کوردی عەبدوڵا ئۆجالانی کاریگەری مکەرۆ سەرو گرڎوو جیهانی و واتش، "مشۊم مرۆڤ پېسە کۆی تەماشەو مژارەکەی بکەرۆ. ئێمە ماچمۍ پەیوەندی موەکیلەکاما چنی جیهانوو بەری بە تەمامی پڕچیان. حەرپاسە بە هەمان جۆر گەلوو کوردی، بنەیانۍ و موخاتەبەکۍ پەیوەس پانەی زەرەرمەنڎۍ بیۍ. بەڵام ۋەرو پێگەو بەڕێز ئۆجالانی و پێناسەو رابەرایەتی، گرڎوو گلېرگەو کوردی بە مەڵامەتوو ئانەیۆ کاریگەری سەرشا وەشبیەن".
سی پی تی لایەنو تورکیایش گېرت و پی جۆرە ۋێش ئاشکرا کەرد
رازیە ئۆزتورکە پی جۆرە درێژەش بە قسەکاش دا: "ئێمە فرەو وەختی باسوو ئاژەکەیما کەردەن، بەڵێ رەنگە بە پاو پرۆسە و رێکارەکا پی جۆرە بۆ. بەڵام حکومەتو تورکیای بە پاگیریوە پێشنیاز و قەرارە پەسەڼ کرییایەکا سی پی تی جابەجێ نمەکەرۆ. جە گوزارشتەو ٢٠١٩ینە ئەرەیاۋیابۍ، کە دیڎارەکۍ چنی پارێزنەرا بە شێوەی بەردەوام ئەنجام نمەڎریا، مشۊم بە شێوېوە سیستماتیک و بەردەوام ئەنجام بڎریا. بەڵام چی قۆناغېنە موینمۍ کە ئانە جابەجێ نەکریان. ئاژێوە خراپتەر و قووڵتەر هەن. هەرپۊکەی ئەگەر حکومەتو تورکیای گۊش پەی پێشنیازەکا نەڎارۆ، سی پی تی متاوۆ ڕاوجاکا بگېرۊنە ۋەر. بەڵام ئانەی نمەکەرۆ. بە جۆرێوە جمۊوە پېسە ئانەی هیچ بڕگېوە نەبۆ پەشتیش پنەبەسۆ. بەڵام جە قەرارەکەو تایبەت بە ئازەربایجانینە، جارێوەتەر نیشانەشدانۆ کە سی پی تی جە ۋەرا ۋەرو حکومەتو تورکیاینە مامەڵېوە دووە ستاندەر مکەرۆ و پی جۆرە ۋێش ئاشکرا کەرد.
رازیە ئۆزتورکە ئانەش وستڕوە کە جە ساڵەو ٢٠٢٥ ینە سی پی تی سەردای وڵاتا مکەرۆ، بەڵام تورکیا دلۍ ئا وڵاتانە نییا و واتش، "بەداخەوە سەرەڕاو گرڎوو کردەوە خراپەکا، موینمۍ کە سی پی تی هەوڵ مڎۆ چەمۍ سەرو ئیمراڵیرە قوجنۆ".
