گرووپێوە ٣٠ گەریلایی کە ۋێشا پېسە 'گرووپو ئاشتی و گلېرگەی دیموکراتیکی' نامۍ نیا، دماو بانگەوازە ڤیدۆییەکەو ڕابەر ئاپۆی بە ئیرادەو ئازادی ۋێشاوە جە مەراسیمێوە تاریخینە چەکەکې ۋێشا سۆچنې.

یۆ چا گەریلایا بەشدارو مەراسیمو ١١و تەممووزو چەک سۆچنای بې، گەریلاو ئازادی، ئەتەم کلچ (سەردار باوەڕ) بې. بنەیانەو کلچی دماو ١١ ساڵا کوڕەکەشا جە شاشەکاوە ویناوە.

ئەنداماو بنەیانەکەی ئاماژەشا پانەیە دا پەوپەڕو سەربەرزییوە پەشتیوانی جە هەنگامەکې مکەرا. عادل کلچ تاتەو، گەریلا سەردار باوەڕی واتش: "تەرمې فرێما دیې، ئیتر کاتو ئانەی ئامان ئاشتی بنیاڎ بنریۆ. پەی مردای ۋنې بە گرڎ جۆرې پاڵپەشتی جە هەنگامەکې مکەرمې."

'با تەرمې نەلاوە یانەو کەسی'

عادل کلیچ دماو ئانەی تەماشەو دیمەنەکەیش کەرڎ، پی قسا هەستو ۋێش بەربڕی: "دماو چڼین ساڵا کوڕەکەمم وینا. چا ڕوۊن لوان دەنگ و ڕەنگما نەژنیەنو نەدیەن. ئا ڕووە جە تەلەفزیۆنەنە کاتو چەکنایرەینە دیما. یانەنە چڼین وەختې تەماشەو ئا گرتە ڤیدیۆییەیما کەرڎ. پېسە بنەیانێوە پېسە گەلو کوردی گەرەکمانە پېسە گرڎو گەلا ۋەرکۊتوو مېیانی جە ئاشتیینە بژیومې. با جارێوەتەر کەس نەسۆچۆ، گەرەکما نیا تەرم بلۊنە یانەو حیچ کەسی. ئاشتیێوە شکۆمەند و دڵسۆزانەما گەرەکا. پېسە گرڎو گەلا یەکسانیما گەرەکا."

کلیچ ئاماژەش پانەیچ دا چنی ئا سەختیا سەرشارە ئامێنې حەجگیز لایەنگرې جەنگی نەبیێنې و واتش: "ئێمە ئاڼڼە سەختیێما دیێنې، بەڵام حەجگیز نەبیێنمې بە لایەنگرې جەنگی و ون متەی. ئی ئاشتییە ئیسفاڎەش پەی گەلی بۆ. کاتێ ئادم دی فرە دڵوەش بیا و سەربەرزبێنا. دەرفەتێوە پی جۆرە دەسو گرڎ کەسې نمەگنۆ."

'پەنەوازا ئی دڵوەشیە مەڕیایە بە ئاشتی بیاونمې ئەنجام'

هەرپاسە کلچ ئەرەیاۋناش، باوەڕیما هەن پڕۆسەو ئاشتی ئەنجامێوە ئەرێنیش پەی گرڎ لێوە بۆ و واتش: "چی ماوەنە بەهەزاران ڕۆڵې ئی گەلەیە گیانشا بەخشا، پۊکەی دڵوەشیما مەڕیان، بەڵام بە ئاشتیێوە گەل بەتەمامیی دڵوەش بۆ. حەچ کەسې ئی پرۆسەشە گەرەکا، بەڵام پېسە گەلێوە مەشۆم دۆڵەتیچ هەنگامە بنیۆ. بە هەزاران کەسې ئینې زینانەکانە، بە هەزاران هەمڕێما بەمەڵامەتو ئانەی کە سیاسیێنې دەربەدەرې کریێنې، ئی کەسې بەبێ تاوان سزا مڎریا."

'هەم دڵوەش بێنا و هەم دڵتەنگ '

هەرپاسە ئەڎاش ڤەسیلە کلچە واتش: "نەزانێنمې کە تەلەفزیۆنەنە وەڵا مکریۆوە، وەختې دیم هەم فرە دڵوەشە بیا و هەم فرە دڵتەنگ، ئێمە ئەڎایا و بنەیانەکا تا دما نەفەس پاڵپەشتی ئی پرۆسەیە مکەرمې، با ئاشتی بې دی و ڕۆڵەکاما بوینمې، من ١١ساڵېن کوڕەکەمم نەدیەن."