جە ئەرەیاۋناکەو وەرزارەتینە ئاماژە پانەیە کریان هێزەکې حکومەتی دەسشا کەردەن بەلوای دلې شارو سوەیدای کە ئینا چېرو هەیمەنەو چەکڎارا دروزینە.

هەرپاسە جە شارەکەنە قەڎە‌غەو ئاماولوای ئەرەیاۋېیان. وەزارەتو وەرگیریچ داواش جە ئەرەنیشتا سوەیدای کەردەن 'جە یانەکاشانە مەناوە و جموجوڵو گرڎو گرووپەکا نایاساییا.'

کوچۍ چێوەڵې ڕابەرا ڕۆحی دروزی ئەرەیاۋنێوەشا وەڵاکەرڎۆ و ئاماژەشا پانەیە دا ئامای دلې هێزەکاو حکومەتیشا پەی دلې شارەکەی پەسینان و داواشا جە گرووپە دروزەکا کەرڎەن چەکەکاشا بنیارە.

جەنگەکە سەرەتا جە ما بەینو چەکڎارە هەرێمییەکا دروزی و هۆزە بەدەوییەکانە ڕووەشدا کە جە لایەنو دیمەشقیوە پاڵپەشتی مکریا.

بە پاو ڕوانگەو سوری پەی مافەکا مرۆڤی (سۆهر) جە جەنگەکەنە ٩٩ کەسې کوشیێنې، کوشیێکێچ؛ ٦٠ دروزی، ١٨ بەدەویې، ١٤ ئەندامې هێزە ئەمنییەکا حکومەتو کاتی دیمەشقی و حۊت چەکڎارې نەشناسێنې.

پارێزگاو سوەیدای یاگې ئەرەنیشتەو گلېرگەو دروزەکان. جە سوریانە نزیکەو ٧٠٠ هەزار دروزیا هەنې. هەرپاسە دروزەکې جە لوبنان و ئیسرائیلیچەنە هەنې.