بۆنەو ٨و ئاداری ڕۊو جەهانی ژەنا رەنجدەری، جمیەروو ئازاڎیی ژەنا ئێزدی (تاژێ) نامێوەش ئاراسەو ئا ژەنا ئەفغانستانی کەرد کە جە دژوو تنووتیژیەکا تالیبانی ۋێڕاگری کەرا و کۊشیانە.

نامەکەو تاژۍ پۍ ژەناو ئەفغانستانی پی جۆرەنە:

" ئێمە پێسە جمیەروو ئازاڎیی ژەنا ئێزدی (تاژێ) ٨و ئاداری ڕۊو جەهانی ژەنا جە گرڎوو ژەنا جەهانی پیرۆز کەرمۍ. بە تایبەتی پیرۆزبایی جە ژەنا کۊششکاری، ۋێڕاگری و ژەنا شۆڕشگێڵنۍ ئەفغانستانی کەرمۍ، کە تا ئارۆ جە ۋەران ۋەروو ستەمەکا تالیبانینە کۊشیانە و رووبەڕووش مرداوە. جە دژوو ئەقڵیەتوو تاتە سالاری بە رۆحیانەتوو کلارا زێتکینۍ ڕەمزەو ٨و ئاداری، رۆسا لوگزەمبورگە ڕەمزەو یۊبیەی گەلا. واڵەکا میرابێلی ڕەمزۍ کۊشیای جە دژوو تنووتیژی، بێریڤان جزیریە ڕەمزەو سەرهۊردای ژەنا ئێزدی، سەکینە جانسزە ڕەمزەو کۊشیای و مدرامانی، ژینا ئەمینیە ڕەمزەو ئازاڎیی و حەرپاسە ژەنەی سەرمەشقەو مافوو ژەنا مینا کیشوەر کەمالە، فەلسەفەو ژەنۍ-ژیۋای-ئازاڎیی ڕۆ دماو ڕۆی زیاتەر پەرە مسانۆ.

وەڵینگەو ئازاڎیی ژەنا چەمەڕاو نویستەیۆین

حەقیقەت ئانەن کە ئازاڎیی ژەنۍ ئازاڎیی گلێرگەین. ۋەروو ئا مەڵامەتیە سەرمایەداری بە رێبازی جیاجیا حۊڵ مڎۆ ئیراڎە و هێزوو ژەنا دلێنەبەرۆ. بێگومان جە ۋەران ۋەروو ستەم، کۆیلەداری، تنووتیژی سەروو ژەنانە، کە جە کەسایەتی ژەنانە سەروو گلێرگەی جابەجێ کریۆ، تەنیا ڕێوە چارەسەری و ئازاڎیی هەنە ئاڎیچ کۊشیای و مدرامانا. ئانەی ئارۊنە جە ئەفغانستان و تەماموو جەهانینە ڕووە مڎۆ ئا حەقیقەتەنە. بەردەوام سەرچەمەو هێزوو کۊشیای ئێمەو ژەنا، یۊگێرتەیمانە. وەڵینگەو بە کۆیلەکەردەی ژەنا نەنویسیانۆ، وەڵینگەو ئازاڎیی ژەنایچ چەمەڕاو نویستەیۊین. جە سەڎەو ٢١ینە ئارۆ ژەنی جە شەنگالۆ تا ۋەرنیشت ، جە ئەفغانستانۆ تا ۋەرکەوت و سەرنیشتوو کوردسانی، جە جەهانەنە ئاێروو ئازاڎیی تا مۍ بە تینتەر بۆ. ئانەی بە قوربانیدای فرۆ دەسەبەر بۆ و ئازاڎییچ بە بێ قوربانی دای مەبۆ. گرڎ وەختۍ دلۍ تاریکینە، راسی پێسە وەرەتاوی چانەن، سیستم حەرچێوێچ کەرۆ مەتاوۆ ۋەر بە ڕۊشنای و گەرماو ئانەی گێرۆ.

یا ئازاڎیی یا ئازاڎیی

ئێمە پێسە جمیەروو ئازاڎیی ژەنا ئێزدی (تاژێ) نادادی و ستەموو تالیبانی سەروو گلێرگەو ئەفغانستانی بە تایبەت سەروو ژەنارە حەجگیز قبوڵ مەکەرمۍ. جارێوەتەر جەخت چانەی کەرمێوە کە کۊشیای شمەو ژەنا ئەفغانستانی جە دژوو تالیبانی، ئێمە فرە بە گرنگش وینمۍ و پەشتیوانیش ۋنە کەرمۍ. ئێمە گرڎ وەختۍ پەشتیوانی جە شمە کەرمۍ. ئێمە جە کۊشیای شمە پۍ ژیۋایۍ شکۆمەندانەی و دیموکراتیکی، سەرکۊتەی هەمیشەیتا پۍ موازمۍ. جارێوەتەر ٨و ئاداری جە شمەی پیرۆز بۆ و ماچمۍ یا ئازاڎیی یا ئازاڎیی".