هامسەرۆکە و گرڏی دەم پارتی تولای حاتەم ئۆغوللاریە جە کۆنگرەو ئاوارتەو ڕحا و دەم پارتیینە قسێش کەردێ و واتش: "تا ئیسە دەسەڵات هیچ هەنگامێوەش پەی ئاشتی کۆمەڵایەتی نەنیان، پرۆسەکە پەنەوازش بە هەنگامەی یاسایین و تەنها بە قسێ بریقەدارێ مەبۆنە."
ڕێکوزیا و ڕحای پارتو یەکسانی و دیموکراسی گەلا (دەم پارتی) یوەمین کۆنگرەو ئاوارتەو وێش ئەنجام دا، جە کۆنگرەکەنە کە وێنەو ڕابەر ئاپۆی کاتو بانگەوازییەکەو ٢٧ی شوباتی، هەرپاسە وێنەو گەشمەرڏا ڕاو ڕزگاری و کادرە سەرمەشقا پەکەکەی گەمشەرڏە عەلی حەیدەر قەیتان و ڕەزا ئاڵتوونی و وێنەو ئەندامو شاندو ئیمراڵیی دەم پارتی سری سوورەیا ئۆندەری نریابێرە.
جە کۆنگرەکەنە کە ئەندامێ ڕێکوزیا و ڕحای دەم پارتی و پەرلەمانتارو ڕحای دەم پارتی عومەر ئۆجالان و ئەندامێ پلاتفۆرمی و ڕێکوزیا مەدەنییەکێ ئامادێ بێنێ، تولای حاتەم ئۆغوللارە قسێش کەردێ و ئاماژەش پانەی دا ئینێ شارەکەو ڕابەر ئاپۆینە، گرڏ و ئا گەشمەرڏاشە بە ڕێز و پنەزانی یاڏ کەردێوە کە جە شۆڕشو ڕزگاریینە گەشمەرڏێ بیێ و جەختش چانەی کەردۆ درێژە بە ئەوەکۆشای گەشمەرڏا مرەیمێ و یاونمێش بە ئامانجو سەرکەووتەی.
تولای حاتەم ئۆغوللارە جە قسەکاشەنە سەرنجش وست سەر و پرۆسە و چارەسەری کە بە بانگەواز تاریخییەکە و ٢٧و شوباتو ڕابەر ئاپۆین هورچەرخیا سەر و زەمینەو پراکتیکی و و واتش: "تا ئیسە دەسەڵات هیچ هەنگامێوەش پەی ئاشتی کۆمەڵایەتی نەنیان، پرۆسەکە پەنەوازیش بە هەنگامەی یاساییەنە و تەنیا بە قسێ بریقەدارێ مەبۆنە."
تولای حاتەم ئۆغوللارە ئاماژەش بە بانگەوازو ئاشتی و گلێرگە و دیموکراتیکو ڕاڤەر ئاپۆی و قەرارەکا کۆنگرەو پەکەکەی کەرد و ئاماژەش پانەی دا مشۆم خاس چی بانگەوازەیە یاومێنە و واتش: "وەرپرسیارێتی ئێمە ئانەن بە عالی چی بانگەوازەیە یاومێنە و کەرمێش بە بنەماو هەرمان کەردەیما. ئی بانگەوازە، بانگەوازو ڕزگاری چێردەسان. ئی بانگەوازە پەی جابەجێ کەردە و مافەکا شوناس، زوانو ئەڏێ گەلوو کوردین کە سەرەڕاو گرڏ و قوربانییە سەختەکا دەسش چی ئەوەکۆشایە هورنەگێرت. بانگەوازو هامووڵاتی بییە و یەکسانین. بانگەوازو بنیادنیا و گلێرگەی دیموکراتیک و ڕا و سۆسیالیزمین. ئی بانگەوازە، بانگەوازو سەرکەوتە و ئەوەکۆشای یەکسانی و ئازادی ژەنان. بانگەوازو ئایندێوە ئازادی و دیموکراتیکو جوانان. ئی بانگەوازییە پەی گرڏ کەسێن."
دما و ئانەی پەیامو زینانیا زیناو ژمارە ١ و ٢ی ڕحای ونریاوە. زینانیێ جە نامەکەیشانە سڵامشا جە بەشداربییەکا کەرد و ئیدارەی تازەشا موبارەک کەرد، ئاماژەشا بە بانگەوازو ئاشتی و گلێرگە و دیموکراتیکو ڕابەر ئاپۆی کەرد. زینانیێ ئاماژەشا پانەی دا کە جە گرڏ هەنگامێوەنە دڵسۆزو ڕابەر ئاپۆینێ و جەختشا کەردۆ کە ئەرکی سەرەکیشا خاوەندارێتیکەردەین چا پێشئامایا کە جە چوارچێوەو پارادایمو "گلێرگەی دیموکراتیک، ئیکۆلۆژی و ئازادی وازو ژەنێ" ڕووەمرا و بە گلێرگە کەردەی بانگەوازییەکەین. زینانیێ ئەرەیاوناشا کە ڕاوەبەرا و کۆششکارا دەم پارتی و کەسێ وڵاتپارێزنێ پەنەوازا دەوری سەرمەشقایەتی گێڵنا، ئامانجەکێشا بە دی بارانە و پەشتگیری جە ئەوەکۆشای ڕابەر ئاپۆی بکەرا.
دماتەر ڕاپۆرتە و دارایی و چالاکییەکا ونریاوە. جە دماینە ئایشە سوروجو و نیهات دەمیربیلەکلیە پێسە و هامسەرۆکەی تازێ ڕێکوزیاو ڕحا و دەم پارتی هورچنیا.
کۆنگرەکە بە هورپڕای و بە گۆرانییەکێ هۆزان سەرڤانێ دمایش ئاما.
