حسێن مەردان ئەندامو لوجنەو کشتوکاڵی و ئاوۍ و زۆنگاوەکا جە پەرلەمانو عێراقی، پێوەس بە پاشێلکاریییە ئاوییەکا دۆڵەتو تورکی جە ۋەرا ۋەرو عێراقینە قسێش پەی میدیا دلێینەکا عێراقی کەرڎۍ و واتش: "پېسە لوجنەو کشتوکاڵی و ئاوۍ جە ئەنجوومەنو نوێنەرانە عیلاقەی ڕاسەوخۆما چنی وەزارەتو سامانەکا ئاوۍ و وەزارەتو کشتوکاڵی بیەن و بەرکۆت، کە تورکیا پابەڼ نەبیەن بە گرڎو قەرارەکا وەڵتەریش و ئا قەرارا کە جە بەینو حکومەتو عێراقی و تورکیاینە ئیمزاکریێنۍ."

'ئا بڕە ئاوۍ کە جە ئیساتێنە تورکیا وەرش مڎۆوە پاشێلکەردەی ڕێککۆتننامەکان'

حسێن مەردان باسش چانەیچ کەرڎەن؛ "چنی لایەنی تورکی ڕێککۆتەی کریان سەرو وەردایۆ ئاوۍ بە بڕو ٧٠٠ هەزار مەتر چوارگۆشەی، بەڵام تەنیا ١٨٠پەی ٣٠٠ هەزاراش وەردێنۆ، ئینەیچ بە پاشێلکەردەی گرڎو پەیماننامەکا منریۆرە."

ئا پەرلەمانتارەو عێراقی جە لوجنەو کشتوکاڵی و ئاوۍ، ماچۆ: "جە سەرۋنەداکەیمانە پەی لاو سەرۆک وەزیرانی و سەرۆک کۆمارو عێراقی، داواما کەرڎ چارەسەری جدی بێزمێوە پەی سنووردارکەردەی ئا پاشێلکارییا، هەرپاسە جە کۆنفرانسو ئاوەو ئەندەنوسیاینە داواما جە تورکیای کەرد کە بەشداری جە ڕێککۆتەی بەحرە هامبەشەکا و ئاوە هامبەشەکانە بکەرۆ، چونکی ئی ئاوۍ پەی گرڎو وڵاتانۍ نەک تەنیا تورکیا."

جەختیچش کەردۆ کە؛ "سەڎەنە ٨٧و ئاوەو عێراقی جە تورکیاوە مۍ، هەرپاسە ٧٪ جە ئێرانۆ مۍ و ٨٪ـ یچ ئاوەو دلێینەینە، کە عێراق پەی مەیسەرکەردەی ئاوۍ پەشتی بە ئاوەو تورکیای بینۆ."

سەبارەت بە چارەسەرو قەیرانەو ئاوێچ، مەردان ئاشکراشکەرڎ؛ "پەنەوازا سەردارو حکوومەتی پەشتیوانی وەزارەتو سەرچەمەکا ئاوۍ بکەرۆ، چونکی بودجەو ئی وەزارەتەیە کەما و تواناو چارەسەرکەردەی قەیرانەکەیش بەشێوێوە ڕیشەیی نییا."