بنەیانەو بێسەروشۆنکریایا و کۆمەڵەو مافوو ئینسانوو (İHD)و ئامەدی جە ٨٠٤ـەمین حەفتەو چالاکییەکەیشانە بە نامێ، "با بێسەروشۆنکریێ بوێزیانێوە، دۆسیەکێ دادگایی بکریانە" کە ٣١و کانوونوو دووەموو ٢٠٠٩، دەسشا پەنە کەردەن، مەنتێقەو ڕێزانوو ئامەدینە جەمێ بیێوە.

 بۆنەو ئی حەفتەیەنە داواو ڕۆشنۆکەردەیشا فایلەکاو سەرۆکوو پارتوو ڕەنجوو گەل- ئامەدی، وەدات ئایدن کەرد، کە 5و تەممووزوو 1991 یانەو وێشەنە گیریا و جەنازەکەش سنووروو مادەنی سەر بە خارپێتینە وێزیاوە.  

ئۆرهان، هامسەرۆکوو شارەوانیی سووروو دەم پارتی، بنەیانەو وەدات ئایدنی و فرەو کەسا بەشدارییشا چالاکییەکەو ئی حەفتەینە کەرد. جەمۆبییەیوەکەینە چیرۆکەو کوشتەی وەدات ئایدنی باسە کریا. ئاماژە پانەیە کریا حەرچندە ٣٣ ساڵێش ملەرە ویەردەن، بەڵام عەقڵیەتوو دەوڵەتی هەڵای نەفاڕیان، ئارۆ سیاسەتمەداراو کوردی، پارێزنەراو مافوو ئینسانی  و ڕۆنامەنویساو کوردی سزا مدریانە.

دماتەر شوکران ئایدن، هامژیوەو وەدات ئایدنی، جە کەسایەتیی وەدات ئایدنینە سەرجەموو ئا کەس گیانشا جە دەس دان یادێ کەردێوە. شوکران ئایدنە سەرئاماو وەدات ئایدنیش گێڵناوە و واتش: "من بە شەخسیی وێم چەنی وەداتی لوایمێ پەی پۆلیسوو ئامەدی. واتشا تەنیا بڕێ پەرسێش وەنە مکەرمێ. بەرکەوت دەوڵەت قەرارش دان بکوشۆنەش، سەرۆکوو حکومەتی، سەرۆککۆمار، فەرماندەی گردین گرد هاگادارێ گرد چێوێ بێنێ. مزانمێ نکوشەکێ کێنێم، تا مەردەی داواو وەنەپەرسایوە مکەرمێ. با ئا کەسێ کە بیێنێ بایسوو ئازارەکاما ئادێچی ئازارە بچەشانە. پێسەو هەمیشەی واتەنما قەرارەکە سەرۆ دریابێ."

دماو وتارەکا، ئەنداموو لوجنەو ڕاوەبەریی لەقوو ئامەدو (IHD) چیرۆکەو کوشتەی ڤەدات ئایدنیش واناوە.

هەرپاسە ئێلحەنە، حەفتەو ٦٤٠و چالاکییەکەی، کەسوکاروو بێسەروشۆنکریایا، وینکراوان، پارێزنەراو مافوو ئینسانی، ئەنداماو کۆمەڵەو پارێزنەراو ئازادی (OHD)ی ئێلحی، دەم پارتی، ڕاوەبەراو دەبەپەی، بە پانکارتوو، "با بێسەروشۆنکریێکێ بوێزیانێوە، فایلەکێشا دادگایێ بکریانە" درێژەشا بە چالاکییەکەیشا دا و واتشا بەردەوامێ بانە جە داواکارییەکاشا تا ئا وەختە ئەنجام ورمگێرا و داواو دادپەروەرییشا کەردە.