بە بۆنەو نزیکبییەیۆ ٨ ی ئاداری ڕۆو جیهانیی ژەناوە، کۆنگرەو ستاری عامودانە ڕاپیماێوەش ڕێک وست. ئەرەنیشتاو عامودای، ئەنداموو ڕێکوزیاکاو گلێرگەی مەدەنی و پارتوو یۆبییەی دیموکراتیک (پەیەدە)ی بەشداریی ڕاپیمایەکەی بێنێ.

ڕاپیمایەکەی مەیدانوو گەشمەردە جیهادینە ناوەندوو مەنتێقەکەینە تا مەیدانوو ژەنێ ئازادێ بەردەوام بی.

عەلەمەو کۆنگرەو ستاری، ڕسموو یاگەداروو هامسەرۆکایەتیی مەجلیسوو قامیشلۆی، گەشمەردە ڕەیحان عامودا (لیمان شوێش)ی و هامسەرۆکوو مەجلیسوو قامیشلۆی گەشمەردە یوسرا دەروێشی، گەشمەرداو کۆکوشیی هەلنجی و پانکارتەکا بە نویستەی "وێڕێکوستەی ژەنا جوابوو هجوومەکاو ئەرەگیرکاریین" و "بە ئیرادەو ژەنێ ئازادێ سیاسەتوو قڕکەردەی و ئەرەگیرکاری و گۆشەگیری دلێنە بەرمێ" بەرزێ کریێوە.

ژەنی درووشموو "ژەنی، ژیوای، ئازادی" و "بژیوۆ مدرامانوو یەپەژە"یشا بەرزێ کەردێوە.

بە نامێ کۆنگرەو ستاری، قسەکەرەو ڕاوەبەرایەتیی مەکتەبەکاو عامودای حەنا خالیدە قسێش کەردێ و واتش ژەنی جە فرەو مافوو وێشا بێبەشێنێ بۆنەو زیهنیەتوو تاتەسالارییوە.

حەنا تیشکەش وستە سەروو بەئامانجگێرتەی ژەنا و واتش: "ئامانجشا دلێنەبەردەی کۆشیای ژەنان، کۆنگرەو ستاری بە ئایدۆلۆژیاو ئازادیی ژەنان وێش ڕێک وزۆ، ئەنجاموو خەباتەکەی دلێ شۆڕشوو وەرنیشتینە  و بەرگنۆ و ئیرادەو ژەنا قەوەتتەر کەرۆ."

ڕاپیمایەکە بە درووشموو "ژەنی، ژیوای، ئازادیی دماییش ئاما.