زیندانیا دۆزو پەکەکەی و پاژکی جە چوارچېوەو کەمپینوو 'ئازادیی پەی عەبدوڵا ئۆجالانی، چارەسەری پەی پرسوو کوردی' چالاکی مانگرتەیشا جە واردەی جە ٢٧و تشرینی دوەمیوە دەسپنەکەرد و تاکو ٤و نیسانی بەردەوامۍ بیۍ. زیندانیا جە ٤و نیسانیوە پڕێوە پەی قۆناغوو دوەم و چالاکیەکەیشا کە بایکۆتکەردەی ئەرەنیشتەی دادگاکان و چەمپنەکەوتەین چنی بنەیانەی و پارێزنەرا. قەوموو کەسۍ زیندانیا دماو ئێشکگیری دادپەروەری گرڎ ڕووۍ بە دروشمەو 'بە بە دەنگو ئازادیی' ئەنجام مڎا.

پێویسا بەرەو ئیمراڵی بکریۊوە

ئەڎا موشەهر ئولکەرە پەی ئاژانسیما قسېش کەردۍ و ئاماژەش پانەی دا کە مەبۊ ۋەرپرسیاریەتییەکۍ تەنیا ئەستۆو زیندانیانەبۊ و واتش: "گردما کوردېنمۍ، زوڵم جە گردیما مکریۆ. پۊکەی گردما دژوو ستەمینمۍ. گۊشەگیری ستەما، زوڵما جە دژوو مرۊڤایەتی، تاکو گۊشەگیری دمایش نۍ ئابووری و ئازادیی چی وڵاتەنە جە ئاژېوە خراپەنە مبۆ، ۋەروو ئانەیە ئېمە دژۍ گۊشەگیریینمۍ و قبوڵش مەکەرمۍ. گەر ئازادییما گەرەکبۊ پێویسا، دمایی بە گۊشەگیری بارمۍ و بەرەو ئیمراڵی بکریۊوە. تاکو بەرەو ئیمراڵی نەکریۊوە زیندانیەکېما دەس جە چالاکیەکاشا هۊرمەگېرا."

دەسەڵاتداری گرد جۆرە زوڵمێوە مکەرۆ

ئولکەرە ئانەش ئارڎۆ وەیاڎ کە زیندانیەکۍ چنی کەسوهەرمانەکاشا چەمپنەکەوتەی مەکەرا، مەلانۍ ئەرەنیشتەی دادگاکاوە و پی جۊرە بەردەوام بۍ: " ماوەو دووۍ مانگان ئاگاما جە ئاژەو ڕۊڵەکاما نېیا جە زیڼانەکانە. پۊکەی ویرشا مکەرمۍ و ئینایمۍ مەراقەنە. ڕابەرایەتی ماوەو زیاڎ جە ٢٥ ساڵان ئینا زیڼانەنە، پۊکەی ڕابەرایەتی و گرڎوو زیڼانیا خاوەنوو مافوو دیڎارینۍ چنی بنەیانەکاشا. دەسەڵاتداری ئاکەپەی گرڎ ڕېبازېوە ستەم کەردەی وەرا ۋەر بە کوردا بەکارمارۆ، سزاو دیسپلینیش نیېنەرە، ئی سزایۍ چېشەنە؟ ئینسانۍ نەتاوۆ بە تەلەفونېچ قسېوە بکەرۊ، ئیتر مشۊم چ تاوانێوە دیسپلینە بکەرۊ؟ ئینە قبوڵ نەکریان. ئیساتۍ گەلو کوردی جە گرڎ چېوۍ ئاگاڎارا، گەمەکۍ دەوڵەتیش لاوە ئاشکرېنۍ. گرڎ ڕووۍ کەشۍ و دەگایەکاما بۊردوومان مکەرا. زاوڵەکاما کوشا و گېراشا. گەر گۊشەگیری بەردەوامبۊ، ئانە هەر ڕوە و هەرېمېوەما ئەرەگیر مکەرا."

مدرامانما بەردەوام بۆ

ئەڎا ئولکە داواش جە گرڎ کەسێوە کەرد کە دەنگ ۋەرا ۋەر بە گۆشەگیری هۊربڕا و واتش: "گەر ئارۊنە دەنگما هۊرنەبڕمۍ، ئانە پەی سەوای گنا دلۍ یانەکاما. سیاسەتمەدارێما گېرا، گەنجەکاما گېرا، گرڎ ڕووۍ  ئۆپراسیۆن ئەنجام مڎا، قەیوم سەروو شارەوانییەکاوە منیارە. مەڵامەتوو ئی گرڎ ستەما گۆشەگیرییا. با گۆشەگیری دمایش بۍ و گەلو کوردی ئازاڎ بۆ. پێویسا جە گرڎ شۊنۍ ئی جەهانەینە دژوو گۆشەگیری مردمېوە. گۆشەگیری زوڵمێوە گەورەن ۋەرا ۋەر بە گەلو کوردی، تا گۆشەگیری دمایی پنەنارمۍ جە مدرامانیما بەردەوامۍ بیمۍ."