دەسوەڵێوستەی ئەڎایا ئاشتی جە ئیستەنبوڵ جە مەڕەو تەقسیمینە گلېرۍ بیێوە و گەرەکشا بۍ بە داواو ئاشتی جە جاڎەو ئیستیقلالینە ڕاپیمای بکەرا، پۆلیسەکۍ هەوڵشا دا ڕاشا ۋنە گێرانە.

پەرلەمانتارەو دەم پارتی چیچەک ئۆتلوە و هامسەرۆکۊو دەم پارتی ئیستەنبوڵی عاریفە چنارە پاڵپەشتیشا جە چالاکییەکەی کەرد، دژو هەڵوێسو پۆلیسی مردێوە و چالاکی ئەرەنیشتەی ئەنجامدریا. ئەڎایا سروودەو (Herne Pêş)یشا واتە، پۆلیس ئینەش کەرڎ بە بەهانێوە و دەسوەردایش کەرڎ.

سەرەڕاو ئاستەنگیەکا ئەڎایا ئەرەیاۋنێوەشا ۋەناوە، داواشا جە ئەڎایاو سەروازەکا و تەمامو ئەڎایا کەرد، "با دەس بڎەیمۍ دەسو یۊی، با ئیتر حیچ ئەڎێوە خەمگینە و جەرگسۆتۍ نەبۆ".

ئەڎایا تەئکیدشا کەرڎۆ، تا دمایی پاڵپەشتی جە بانگەوازو 'ئاشتی و گلېرگەی دیموکراتیک'ـی ڕابەر ئاپۆی مکەرا، ئەر پەنەواز بکەرۆ پەی بەدیئاوردەو ئاشتی بەرە بە بەرە گێڵانە.

'داواکېما ڕۆشنێنۍ'

ئەڎایا جەختشا کەردۆ، ئەرکی فرە گنۆ سەرو شانا پارتەکا، مشۊم هەنگامەی ڕۊشنە پەی ئاشتی بنریۆ، مشۊم گرڎ بانە بە بەشێوە چی کۊششەیە، واتشا: "مشۊم زینانیا نەوەشی و ڕامېیاریمەدارا ئازاۍ بکریا، مشۊم زوانما بۆ بە زوانو ئاشتی، جەنگی سیاسی دمایش بۍ و گرڎو پارتەکا پەی ئاشتی هەرمانە بکەرا".