ئێلیۆنۆرا دی ماجۆ سیاسەڎمەدارە و ئەکادیمیستەو ئیتاڵیای، ئەرەیاۋناش کە عەبدوڵا ئۆجالان بەهێوە گۊرەن پۍ مرۆڤایەتی و واتش: "پێویسا پارادایگماکێش جە ۋەننگەکانە پێسە ۋەنەی پۍ جیلەکا ئاینڎەی بۋچیاوە.
٢٥ ساڵێن ڕابەروو گەلوو کوردی عەبدوڵا ئۆجالان ئیمرالینە زینڎانین و جە ماوەو ٣٦ مانگا ۋیەردەیچەنە حیچ زانیاریێوە سەروو ژیۋایش نەڎریان. عەبدوڵا ئۆجەلان چێروو گۆشەگیریێوە سەختینە ڕاگیریان، بەتەمامی جە مافوو چەمپنەکۊتەی چنی بنەیانەکەیش و پارێزنەراش بێبەشا. جە لێوەتەرۆ جە ۋەران ۋەروو گرڎوو ئا نادادپەروەریی و بێدەنگی ئەرەمەرزیا پەیوەندیدارەکانە، پەشتیوانی کەرتە کۆمەڵایەتییە جیاوازەکا جە هەڵمەتەو "ئازاڎیی پۍ ئۆجالانی، چارەسەری سیاسی پۍ پرسوو کوردی" کە ١٠/١٠/٢٠٢٣ جە مێڎانوو میان دەوڵەتینە دەسشپنەکەردەن، درێژەش هەن.
ئێلیۆنۆرا دی ماجۆ، ئەندامەو ئەنجومەنوو شارەوانی شاروو ناپۆلی ئیتاڵیای و ئەکادیمیستەو زانکۆو پالێرمۆی، سەروو گۆشەگیری ئیمراڵی و گرنگی پارادیگماو عەبدوڵا ئۆجالانی پۍ ئاژانسوو هەواڵوو فوراتی هۊرسەنگنایش کەرد.
'گۆشەگیری ڕەفتارێوەن جە بەروو مرۆڤایەتیۆ'
ئەکادیمیستە ئێلیۆنۆرا دی ماجۆ ناڕەزاییش جە دژوو گۆشەگیریی تنوو سەروو عەبدوڵا ئۆجالانی بەربڕی و واتش؛ "شەرتەکۍ زینڎانیکەردەی ئۆجالانی نامرۆڤانە و دژە دیموکراسیێنۍ، حەر پۊکەی گرڎما پەشتیوانی جە هەڵمەتەو میان دەوڵەتی کەرمۍ کە پۍ ئازاڎیی عەبدوڵا ئۆجالانی دەسش پنەکەردەن، پۍ نموونەی ٩ ساڵۍ چێوەڵتەر ڕەگەزنامەی فەخریما بەخشا بە بەڕێز ئۆجەلانی."
'ئۆجالان بەهایۍ گرنگا و بەقیمەتا پۍ مرۆڤایەتی'
ئەکادیمیستە دی ماجۆ باسش جە گرنگی پارادایگماکاو عەبدوڵا ئۆجالانی کەرد کە سەروو بنەماو گلێرگەو ئیکۆلۆژی دیموکراتیکی و ئازاڎیی ژەنا بنیاڎ نریان و واتش: "پێویسا عەبدوڵا ئۆجالان نەک حەر پێسە ڕابەروو گەلوو کوردی، بەڵکم پێسە بەهایۍ گۊرەو مرۆڤایەتیچ بویناش. فکرەکۍ ئۆجالانی" پۍ جمیەرە کۆمەڵایەتییەکا جە گرڎوو دنیێنە ئیلهامبەخشێنۍ. پۍ نموونەی جمیەرە فێمینیست، ئیکۆلۆژی و دیموکراتیکەکۍ سەروو بنەماو پارادایگماکاو ئۆجەلانی ئەرەمەرزیێنۍ، فرە گرنگا جیلی تازە بە ویرۆکە ئیکۆلۆژییەکاو ئۆجالانی پەروردە بوینا. ئێمە حۊڵمڎەیمۍ فکرەکاو عەبدووڵا ئۆجالانی جە شارەکامانە وزمۍ بواروو جابەجێ کەردەیۆ."
'ئێمە پارادیگماکاو بەڕێز ئۆجالانی بە شێوێوە ڕاستەوخۆ جە ژیۋایمانە بەکار مارمۍ'
ئەکادیمیستە دی ماجۆ ئەرەیاۋناش کە توێژینەوەی ئەکادیمیش سەروو پارادیگماو کۆنفیدرالیزمی دیموکراتیکی عەبدوڵا ئۆجالانی کەردەن و واتش: "ئانەی ئێمە کەرمێش و حۊڵش پۍ مڎەیمۍ ئانەنە کە مۆدێلوو کۆنفیدرالیزمی دیموکراتیکی جە گرڎ شۊنێوەنە بە تایبەت جە ئەوروپا وزمۍ بواروو جابەجێ کەردەیۆ. من هەرمانە سەروو ئی مۆدێلەیە پێسە مۆدێلێوە کۆمەڵایەتی کەروو."
"پێویسا پارادیگماو ئۆجالانی پێسە ۋەنێوە جە ۋەننگەکانە بوچیۆوە"
ئێلیۆنۆرا دی ماجۆ سەرەڕاو بەربڕیەو ئانەی کە پێویسا پارادایگماکۍ عەبدوڵا ئۆجالانی جە گرڎ یاگێنە وەڵاوۍ کریاوە و واتش: "بەتایبەت پۍ جیلەکا ئاینڎەی فکرەکۍ عەبدوڵا ئۆجالانی فرە گرنگێنۍ، پۊکەی گرنگتەرین ڕا پۍ وەڵا کەردەیۆ ئا فکرە بەقوەتا ئانەنە کە جە ڕاو وەننگەی و ئەکادیمیاکاوە پێسە ۋەنای بوچیاوە."
