سەرسەعبوو ڕۊو ٢٤-٦-٢٠٢٣ جە ستۊکهۊڵموو پایتەختوو سویدی، دووەمین کونفڕانسوو ڕێکوزیایەکاو ئەورووپاو پارتوو ژیوای ئازاڎوو کوردسانی (پژاک/ PJAK) بە بەشڎاریی فرەو ئەنداماو ئۊرگانە جیاوازەکاو ئا پارتەیە بەتایبەتی ژەنا و گەنجا، لوا ڕاوە  و دووۍ ڕوێش خواینا. کۊنفڕاسەکەنە، دۊخوو ئیسەو وەرکەوتوو کوردسانی و ئێرانی و مەنتێقەکەی، شۊڕشوو ژەنی ژیوای ئازاڎی، خەبات و کۊشیای پژاکی  بەگرڎی و بەتایبەتی ئەورووپانە جە ویەرڎە، ئیسە و ئایندەنە بەفراوانی تاوتۊ کریا و قسەوباسی هەسش سەرۊ کریا. ئارۊیچ مەجلیسوو پژاکی ئەورووپانە ئەنجامنامەو کۊنفڕانسەکەیش بە بڕۍ قەرارۍ و ئەرەسپارڎی و ورسەنگنایۍ گرنگێوە پەی ڕای گرڎینی پێسە ئەرەیاونا:

ئەنجامنامەو دووەمین کۊنفڕانسوو ـ پارتوو ژیوای ئازاڎوو کوردسان ـ پژاکی ئەورووپانە:

جە بارودۊخێوەنە کە گەلوو کوردی و کوردسانی بەگرڎی کەوتەن وەر هجووموو ئەرەگیراو کوردسانی، لای سەری گرڎیچشاوە ئێران و تورکیا هەر ڕوۍ پەلامارەو بەشێوە جە گەلوو کوردی مڎا، ئێمە جە ٢٤ و ٢٥وو مانگەو ٦ ساڵەو ٢٠٢٣ ، دووەمین کۊنفڕانسوو پژاکیما ئەورووپانە بەست. ڕۊی یوەموو کۊنفڕانسەکەی جیا جە هامڕایا و رێکوستەیەکاو پژاکی بەروو وەڵاتینە، کۊمەڵۍ کەسایەتیۍ وەڵاتپارێزنۍ و دڵسۊزۍ گەلەکەیما خوڵکە کریێبێنۍ و بەوەشحاڵیوە فرێشا تاواشا بەشڎارۍ کۊنفرانسەکەی با. هاموەخت  کۊمەڵۍ پارتۍ و ڕێکوزیۍ کوردسانی ئێرانی جە ڕاو کۊمیتەو ئاماڎەکاریی کۊنفڕانسەکەیۊ خوڵکە کریێبێنۍ و بڕێوە چا پارت و ڕێکوزیایا پەیاموو مەبارەکباییشا وهومێڎوو سەرکەوتەیشا پەی کۊنفڕانسەکەی کیانا. چێگەوە جارێوە تەر سپاسوو گرڎوو ئا کەسایەتی و لایەنە بەڕێزا کەرمۍ، کە جوابوو خوڵکەکێشا دایمێوە.  

ڕۊی یوەموو کۊنفڕانسەکەی تەرخان کریابۍ پەی وانایۊ راپۊرتی و ورسەنگنای دۊخی سیاسی و ئا هەلومەرجەیە کە ئیساتۍ جیهان بەگرڎی و وەرکەوتوو دلێڕاسەی و کوردستانش بەتایبەتی چەنەنۍ. چێگەوە دماو کەرڎەیۊ کۊنفڕانسەکەی جە ڕاو هامسەرۊکایەتیی پژاکیوە ، بەشی سیاسی ڕاپۊرتەو مەجلیسوو پژاکی ئەورووپانە و رێکوستەی ژەناو پژاکی ئەورووپانە ونیێوە. دماتەر شرۊڤە و ورسەنگنای بەشڎاربییاو کۊنفڕانسەکەی تا ئاخیروو ڕۊی یووەمی درێژەش بۍ. کۊو ورسەنگنایەکا جەختشا سەروو هەستیاریی قۊناغەکۍ کەرڎۊ و گرڎوو فرسەت و هەڕەشەکاو وەراوەروو شۊڕشی کوردساننە بەگرڎی و وەرکەوتوو کوردسانینە بەتایبەتی باسشا چۊوە کریا.
 
چەنی هجوومە ئەرەگیرییەکا سەروو کوردسانی و شۊڕشوو ژەنی، ژیوای، ئازاڎی جە وەرکەوتوو کوردسانی و ئێراننە و وەڵێئامایەکاش، دووۍ بابەتۍ سەرەکیۍ ورسەنگنایەکاو دلۍ کۊنفڕانسەکەی بێنۍ. هاموەخت ئازاڎیی ڕابەر ئاپۊی و پەنەوازیی کۊشیای پەی ماڕای سیستموو ئیمرالی تەوەرێوە تەروو ورسەنگنای کۊنفڕانسەکەی بێنۍ.

  ڕۊی دووەموو کۊنفڕانسەکەی، کە زیاڎتەر تایبەت بۍ بە ورسەنگنای دۊخوو رێکوستەی و دیاریکەرڎەی پلانەو ساڵیی تەری، بە وانایۊ راپۊرتەو بەشوو رێکوستەی مەجلیسوو پژاکی ئەورووپانە و راپورتەو بەشوو رێکوستەی هەرمانە و خەباتوو ژەناو پژاکی ئەورووپانە دەسش پەنە کەرد. دماتەر هەرمانە و خەباتوو یەک ساڵی ویەرڎەی بەوردی ورسەنگیا و جگە باسکەرڎەی وەڵێکەوتەیەکا، قۊرتەکۍ و لاوازییەکۍ، بیۍ بە بابەتوو ڕەخنەی و ویەرنای سەرێعوو ئا قۊرتا کریا، کە ناستەنشا بە پاو پەنەوازی هەوڵەکۍ ئەنجامگێرۍ با. تا جە هەرمانە و خەباتوو یەک ساڵی تەرینە شایەتۍ ئەنجامی خاستەری و شۊندارتەری بیمۍ.  

 کۊنفڕانس دماو نرخنای  دۊخوو هەرمانۍ و خەباتی یەکساڵەی ویەرڎەی و پەیڕەوکەرڎەی ڕەخنەی و ڕەخنەدانێوە تۊکمەی چا بوارەنە تاواش، ئیرادێوە شۊڕشگێڵنانە پەی بەرڎەوامیی هەرمانۍ و کۊشیای پژاکی  بەروو وەڵاتینە جە درێژەو کۊشیاینە وزۊ مەیڎان.  بەشی ئاخیروو کۊنفڕانسەکەیچنە کۊمەڵێوە خاڵۍ بنەمایۍ و عەمەلیۍ پێسە پلانسازیێوە پەی ساڵیوە تەروو هەرمانۍ و خەباتوو پژاکی بەروو وەڵاتینە، بیۍ بە قەرار و پلاننامەو کۊنفڕانسی. 

بەشێوە چا قەرار و پلانسازییە گرنگا چی چند خاڵانە کوڵۍ کریێنێوە:

١ـ کۊشیای گرڎلایەنە بەروو وەڵاتینە دژوو ئەرەگیری جە کوردساننە.
٢ـ کۊشیای گرڎلایەنە پەی کۊکەرڎەیۊ هێزوو پاڵپەشتی جە شۊڕشوو ژەنی، ژیوای، ئازاڎی جە وەرکەوتوو کوردسانی و ئێراننە.
٣ـ کۊشیای دژوو گۊشەگیری ئیمراڵینە‌ و هەرمانکەرڎەی پەی ئازاڎیی جەستەیی ڕابەر ئاپۊی.
٤ـ بەرەووەڵێبەرڎەی گرڎنۊعە هەرمان و خەباتێوە پەی ئانەی، کە کورد دیاسپۊرانە بۊ بە هێزوو پاڵپەشتیی شۊڕشوو دلۍ وەڵاتی و هەم ئانە، کە ڕەوەندی کوردی جە دیاسپۊرانە بە ئشناسنامەی هەقەتینی نەتەوەیی و نرخە کۊمەڵایەتی، دیموکراتیکی و سەرڎەمیانەکۍ وێشۊ بشناسیۊ و بژیوۊ.  
 ٥ـ جیا چا چالاکییا کە پژاک جە ئاستوو کوردسانینە و وەرکەوتوو کوردسانینە بەتایبەتی وێش بەرۊشا ڕاوە، هەوڵۍ بدۊ پەی چالاکیی هامبەشیی نەتەوەیی و بەپتەوی بەشداریی چالاکییە نەتەوەییەکا کەرۊ.
٦ـ جە مەیڎانی هامبەشوو گەلاو ئێرانی و هێزە دیمۊکراتیکەکانە هەوڵۍ دریا، پەی نزیکبیەیۊ و وەڵیوستەی چالاکیی هامبەشی و وەڵێوستەی چارەسەری دیمۊکراتیکی سەروو بنەماو پێوەژیوای دیمۊکراتیکی و ئازاڎانەو گەلا.  
٧ـ جە چوارچوەو قەرارەکاو کۊنگرەو ششەمەموو پژاکی و کۊنگرەو یووەموو پژاکی جە ئەورووپانە ماوەو ساڵۍ تەرینە گوڕ بە پەروەرڎەی، رێکوستەی و چالاکی بدریۊ.
 
بێگومان جیا چی خاڵە گرنگانە، کۊمەڵۍ خاڵۍ تەرۍ و عەمەلیۍ جە قەرارنامەو ئاخیروو کۊنفڕانسەکەینە هەنۍ، کە پەنەوازا ڕێکوستەیەکاو پژاکی جە ساڵی ئایندەنە عەمەلییشا کەرا. کۊنفڕانسەکە ، دروشموو (بە فەلسەفەو ژەنی، ژیوای، ئازاڎی پەرە بە رێکوستەی مدەیمێ؛ جە کوردساننە و ئێراننە شۊڕشوو گەلا سەروزمێ)ێش پێسە دروشموو کۊنفڕانسی پەسەند کەرد و کۊنفڕانسەکە بە جۊشوخرۊشێوە فرەوە، بە واتەیۊ دروشموو ژەنی، ژیوای، ئازاڎی دماییش ئاما.

مەجلیسوو پارتوو ژیوای ئازاڎوو کوردسانی جە ئەورووپا
٢٦/٠٦/٢٠٢٣

س.ز