ئەنجوومەنە ئەدەبی و فەرهەنگییەکۍ وەرکەوتوو کوردسانی سەرەمڕ ئینۍ تەقەلا و مدرامانی فەرهەنگینە و چێششا پەنە کریۊ کەراش و مەمردا و دایم بۊنە تارێخی و کولتوورییەکانە بە کەردەیۊ دەورەی دایمی و دەورەو پەنەیاونای و ڕۊشنویری و پارێزنای چاندی بەردەوامێنۍ و ڕووە نەتەوەییەکانە پەیامی تایبەت منیارە، ئینەیمواندێشۊ پەیاموو ئەنجوومەنوو فەرهەنگی-ئەدەبی ڕۊجیارین بۊنەو ڕۊو جەهانیی زوانی ئەداییوە.

"پەیاموو ئەنجومەنوو فەرهەنگی – ئەدەبی ڕۊجیاری بۊنەو ٢وو سیاوکامی ڕۊجەهانی زوانی ئەدٚایی"

       چا وەختەوە زوان پێسە ئەشناسەو خەڵک و نەتەوەیە دریا قەڵەم، تاکە ویر بەرزەکۍ گلێرگای هێمەتشا فاڕاوە پەی ماندگاری زوانوو ئەدٚایی و بڕیارشا دا بە پشتیوانی گەلی و خەڵکی  ئی ئەرکە پیرۊزەیە یاونا بە مەخسەد.

یاگۍ شانازینە ئارۊ بۊنەو چەم و ویر کریاوەیی جە دنیانە چەمکوو زوانی پێسە داغتەرین و وەرچەمتەرین ئێلمان ئەژمارە کریۊ و گەل و نەتەوە وێشا تەیار و ئامادٚە کەردٚەن چی بارەوە بە دڵ و گیان هەزینە و مانیایی وزا سەروو شانەیشا، نازا هازەو زوانیشا کزە و لاوازە بۊ.

پەرمای بە وۍ، قەڵاو پشتیوانی نەتەوەی وزەش جە ئا بانگەوازە زانستی و عێلمیە گێرتەن: زاڕۊڵە ئەگەر بە زوانوو ئەدٚایی وێش جە وانگانە وانە نەوانۊ، پەی هەمیشەی ڕۊح و زەینش کاڵ و سیس و ناپۊختە مەنۊوە.  هەست بە کزی و لاوازی کەرۊ.

هەڵمەتەو دێفاع و سەرەمڕەیی داواکاری گەلە ماف وریاکا جە باری زوانیەوە، پاڵپشتی زوان شناساشا کەردٚێنە نوونگە و عەلەمەو داخوازیشا ئانەن گرد تاکۍ مافوو ئێنسانی و مرۊیی وێشا بە زوانوو ئەدٚایی وێش وانگانە وانۊ، میدیاش بۊ و قسۍ کەرۊ. ئینە سەرەتاییتەرین مافوو و حەقوو ئێنسانەکان، وەڵاتە وەڵکەوتەکانە کێشەو چند زوانیشا چارەسەر کەردٚەن و تاوانشا ئا تاپۊ و وەرپەنگا لابەرا. گردٚ کەس ئازادانە بە زوانی ئەدٚایی وێش قسۍ کەرۊ و... بۍ دەردیسەر بۊنەو ئەقڵیەتی کریاوەی و فەزاو دیموکراسینە، درێژە بە ژیوایش مدۊ.

یاگۍ داخێنە هێشتەر لاو ئێمە دەس بەردٚەی  پەی قەڵاو زوانی ئەدٚایی لاو ئەقڵیەت و ئاوەزی دوگمەوە بڤە دریۊ قەڵەم.

حەنناو بانگەوازی و نویستەی و قسە کەردٚەی و پەرەدای بە زوانوو هەورامی و... وشەو ناڕیک و سەقەتوو ناوچەگەرایی و خێڵەکی  و عەشیرە گەرایی زۊڵمۍ ناڕێک و نا‌ڕەوا پەیما تاشیان.

ئێمە پێسە کوردۍ ڕاستەقینەی، کوردەسانی پێسە وێش وینمۍ و باوەڕما پاسەن کوردەواری چند پازێڵۍ ڕەنگاوڕەنگا و مشۊم ئی  ئەمرەو واقێعیە لاماوە پەسەند و یاگۍ باوەڕی بۊ. ئی ڕەنگاڵەیە بە فرسەت زانمۍ، بوەو هەڕەشا جە دماخیما دوور وزمێوە. گۊزار جە دەورانوو نەریتی و قەبوڵوو عەقڵیەتی سەردەمی خاڵۍ ئەرینۍ و پۊزیتیڤە لەیکدەیمێوە.

  ئەنجومەنوو ڕۊجیاری پێسە مەکۊیە فەرهەنگی هەورامانی ئەوپەڕوو سەحیە و تەلاش کەرۊ پەی ترۊقی و گەشەدای بە فەرهەنگ و ئەدەبیاتوو هەورامانی. حیچ وەخت حەز و باوەڕما بە جیاوازی و پەرتەوازی و قڵیشیای زوانی و نەتەوەی، وەش کەردٚەی گولانەتەرین ئاژاوۍ و هەزینەدای چی ڕاسەوە نیا.

بەرەو گوفتمان و باسی بە کریاوەیی مازمێوە و باوەڕمەندێنمی دیالۊگ بەرزتەرین و سادەتەرین ڕاو پێوەرەیی، شێوەو ئەندێشەی و ویرین،

فەخر و شانازین تاومۍ چی وەزعە گێچەڵاویەنە ئەرکوو پارێزنای و پەرەدای بە کولتوور و فەرهەنگوو هەورامانی بەرمۍ ڕاوە.

گەشاوە و بەرز بۊ ئاڵاو لایەنگیری جە زوانوو ئەدٚایی.

ئەنجومەنوو فەرهەنگی – ئەدەبی ڕۊجیاری