یەرەکە زانیارییش بارەو دمایین دۊخوو کۊساڵانی و هجوومەکاو هێزەکاو دەوڵەتوو ئێرانی پەی سەروو ئا مەنتێقەیە ئاشکرا کەرد و ئەرەیاوناش، چند جارێوە دانشا پێوەرە، وەلۍ تا ئیساتۍ حیچ زەرەرێوە وەروو هێزەکاشا نەیاوان.
فەرماندەیی یەکینەکاو پارێزنای وەرکەوتوو کوردسانی (یەرەکە) جە ئەرەیاوناێوەنە ئاماژەش پانەیە کەرڎەن، "دەوڵەتی ئەرەگیروو ئێرانی، کە جە ١٢و حوزەیرانیوە دەسش بە هجوومی کەرڎەن پەی سەروو هەرێموو کۊساڵانی، تا ئیساتێچ درێژەش هەن".
واتەنیچش: "سەرباروو ئانەیە کە ئێمە ئینایمۍ قۊناغوو بێچالاکینە، هێزە ئەرەگیرەکاو ئێرانی بە سەدان سەروازۍ، بە دەیان سەیارۍ زرەپۊشۍ و جە ڕاو ئەرەیاونای قەدەغەو هاموشۊ مەدەنییەکاوە کۊساڵاننە هجووم کەرۊ سەروو هێزەکاما".
یەرەکە واتیچش، "دوژمن بە کاتیوشۍ، هاوەنۍ و دۊشکۍ ماوە ماوە بۊردومان و گولـلەواران کەرۊ. هێزەکاو دەوڵەتی ئەرەگیروو ئێرانی وەختێوە گەرەکشابۍ هجووم کەرا سەروو هێزەکاما، ١٣وو حوزەیرانی سەعات ١٥:٠٠ و ١٤و حوزەیرانی سەعات بەینوو ٠٥:٠٠وو سەرسەعبی تا ١٦:٠٠ چند پەنجەپێکایۍ ڕووەشا دا".
ئاشکرایچش کەرڎەن، "چا پەنجەپێکایانە هێزەکێما بە مەبەسوو وێپارێزنای وەرپەرچشا مداوە و دوژمن کوشیۍ و بریندارێچش هەنۍ، ئێمە هیچزەرەر وەروو هێزەکاما نەکەوتەن، وەلۍ سروشتوو کەشوو کۊساڵانی زەرەرێوە فرەش وەرکەوتەن و کاریگەریی نەرێییش سەروو ژیوای خەڵکوو هەورامانی وەش کەرڎەن".
س.ز
