ئارۆ، نوعمان کورتولموش، سەرۆک پەرلەمانو تورکیای، بە یاوەری عەبدوڵا گولەری، سەرۆک فراکسیۆنو  ئاکەپەی و یاگەگیرەکێش لەیلا ئوستا، سەرشا ۋنەو فراکسیۆنو دەم پارتی دا، جەلایەنو تولای حاتیمۆغولاریۍ و تونجەر باقرخانی، هامسەرۆکاو گرڎیی و گوڵستان کلچ کۆچیگیتۍ و سەزای تەمەلی، هامسەرۆکا فراکسیۆنو دەم پارتی پێشوازیشا ۋنەکریا.

جە گلېرۊبیەکەنە کە سەبارەت بە ڕۆژەڤو هۊرچنیەی سەرۆکایەتی پەرلەمانی بۍ، هەرپاسە هۊرسەنگنای جە بارەو پرۆسەو ئاشتی و گلېرگەی دیموکراتیکی و دەورو پەرلەمانی و ئا هەنگاما کە مشۊم بنریا کریا، دماو گلېرۊبیەکەی کۆنگرێوە ڕۆنامەنوویسی هامبەش ئەنجام دریا.

جە کۆنگرە ڕۆنامەنووسییەکەنە، تولای حاتیمۆغولاریە، هامسەرۆکۊو گرڎیی دەم پارتی واتش: "ئی پرۆسەی کە ئینایمێش چنە، بانگەوازو ئاشتی و گلېرگەی دیموکراتیک و ڕووەدایەکا دماتەری ئەرک و ۋەرپرسیاری گۊرە بە پرۆسەکەی مڎۆ، ئارۆ چنی ئېژا سەرۆکو پەرلەمانی ئی مژارەما هۊرسەنگنا. بە دەرفەتما زانا کە پەی چارەسەرکەردەی ئی مژاریە و  بنیاڎ نیای پرۆسەو ئاشتی و دیموکراتیککەردەی تورکیای بە فراوانی هۊرسەنگنای سەرو دەور و ۋەرپرسیاری پەرلەمانی بکەرمۍ، ئېژا سەرۆکو پەرلەمانی پنەش ئەرەیاۋنایمۍ ئا کۆمسیۆنەی کە ئېژا باخچەلی باسش کەردەبۍ و باوەڕیما هەن کە بەشداریێوە گۊرە جە پرۆسەو چارەسەرینە مکەرۆ، دەس بە هەرمانەکاش مکەرۆ، ئێمە سەرۋنەداکەیشا بەرز نرخنمۍ و سوپاسشا مکەرمۍ، هیواو سەرکۊتەی پەی ئایندەیچ موازمۍ."

دماتەر سەرۆکو پەرلەمانی نوعمان کورتولموش ئاماژەش پانەیە دا، گفتوگۆشا سەرو ۋەرپرسیاریەکا پەرلەمانی پەی دڵنیاکەردەیۆ یۊبیەی و هامپەشتی و وەڵێوستەی پێوەرە دیموکراتیکەکا تورکیای کەردەن و واتش: "دماو پەیامەکەو ئیمراڵی و قەرارو چەکنایرەی، مژارەکە یاوا پەرلەمان کە مېیانو ئیرادەی نەتەوەییا و دڵو دیموکراسیی تورکیایا گفتوگۆش سەر بکەرۆ، قەناعەتما پاسەن، کە پەنەوازا گرڎو لایەنە سیاسییەکا بە شێوێوە بنیاڎنەرانە ئیسفاڎە چی دەرفەتە تاریخیە هۊرگێرا تا ئی پرۆسە بە خێرایی دمایش پنە بۍ و جە تورکیانە ئەجێندایۍ تازە دەسپنە بکریۆ، هیواڎارەنا ئا کۆمیسیۆنەی کە جە روانت ئایندەنە جە پەرلەمانەنە بنیاڎ منریا، بە شێوێوە عال هەرمانە بکەرۆ، سەبارەت بە شێوازو بنیاڎنیای کۆمیسیۆنی و کەڵک جە چ ڕێوە هەرمانکەردەی هۊرگێرۆ، ئێمە ئاماڎەکاریی سەرەتایی مکەرمۍ."