ئێشكگیری جە دژو کودەتاو قەیومی ١٢ ڕوێن بەردەواما
وەڵێ شارەوانی ئاکدەنیزینە ئێشكگیری جە دژو کودەتاو قەیومی جە ڕۆو ١٢یەمینە بەردەواما. جە ئێشكگیرییەکەنە هرووژمە قڕکارییەکێ سەرو وەرنیشتی شەرمەزار کریێ.
چالاکی دژو کودەتاو قەیومی کە وەڵێ شارەوانی ئاکدەنیزو مێرسینە کە قەیوم سەرشەرە سەپیان ١٢ ڕوێن بەردەواما. چالاکییەکەنە چنین ئەندامێ و نوێنەرو پارت و ڕێکوزیێ مەدەنییێ بەشدارێ بێنێ و درووشمەکێ 'شارەوانی ئیرادەمانە'، 'بژیو پەشتیوانی گەلی' و 'مشۆم قەیومی دز شارەوانی جیابازۆنە' بەرزکریاوە.
جە چالاکییەکەنە ئەندامو ئەنجومەنو شارەوانی ئاکدەنیز، ئایدن کلچ قسێش کەردێ و جەختش جە بەردەوامی ئەوەکۆشایشا جە دژو سەپناو قەیومی کەردۆ.
هەر چالاکییەکەنە پەڕلەمانتاری مێرسینی دەم پارتی عەلی بۆزان قسێش کەردێ و سەرەڕاو شەرمەزار کەردەو سەپناو قەیومی و جەختکەردەیۆ جە بەدەسئاردەو ئیرادەو گەلی، سەرنجش وست سەرو مڏرامانو گەلو وەرنیشتی و واتش: "سڵام جە مڏرامانو گەلو وەرنیشتی مکەرمێ. گەل ئی هرووژما قەبوڵ مەکەرۆ. پەنەوازا سەرو تورکیای دەسبەردارو ئی هرووژمە ئەرەگیریا بۆنە."
ئێشکگیرییەکە بە چالاکی گلێرۆبییەی ئەرەنیشتەی بەردەواما.
