پەرلەمانتارەو دەم پارتی ئۆزگوڵ ساکیە کە جە نزیکۆ شۊنیرەلوای پەی ئەزموونەکا ۋێڕاوەبەری و ئەوەکۊشایە سەرەمڕەکا ژەنا جە هەرێمە جیاجیاکا جەهانی، هەرپاسە درێژە بە چەمڎاریکەردەیەکا ۋێش ئەوەکۊشای ئاشتی کە جە تورکیانە بەردەواما، پەی ئاژانسو هەواڵو فوراتی هۊرسەنگنا.

'جە پڕۆسەو ئاشتیینە مشۊم پاگیری جە گرڎو پرسەکا بکریۆ'

ئۆزگوڵ ساکیە جە سەرەتاو قسەکاشەنە ئاماژەش بە گفتوگۆی و پڕۆسەو ئاشتی جە کۆڵمبیانە کەرد و واتش: "جە کۆلۆمبیا جە مابەینو حکومەت و ڕێکوستەی گەریلاو FARC (هێزە چەکڎارە شۆڕشگێڵنەکا کۆڵۆمبیا)ی جە ئاکامو ٥٢ ساڵا جەنگی و ملەملانێنە سەرەنجام ٤ ساڵۍ ئەرەنیشتەی ئاشتی تاوەکو ئەیلولو ٢٠٢٦ ئیمزا کریا. پرۆسەو ئاشتی بە ٦ سەرنامۍ ڕاوەبەر کریا: ڕیفۆرمو خاکی، بەشداربیە جە سیاسەتی، چەکنیایرەی، چارەسەرکەردەی کێشەو ماددە هۆشبەرە نایاساییەکا، مافو قوربانییەکا، جابەجێکەردەی ڕێککەوتەی ئاشتی.

چێنە گەرەکما واچو ئاشتی، ئەرەنیشتەی و چارەسەری پرسێوە نییا جە چن مانگێوەنە چارەسەر بکریا و گرنگتەرین چێو ئانەنە ئەر ڕێکوستەیە سەربەخۆکێما بەهێزۍ نەکریا ئانە دەسکەوتەکۍ ئیساتۍ دەسشا سەرەرە گیریۆ. ئەر جوابو پرسیارەو "مشۊم جە تورکیانە چێش بکەرمۍ' بڎەیمېوە، نمەبۆ ئاشتی تەنیا پەی دەسوەڵێوستەی دەسەڵاتدارا جیابازمۍ و مشۊم بەخێرایی ڕێکوستەبیەو ۋێما کە گرڎو بەشەکا گلېرگەی بەشداری پرۆسەکەی بکەرا بنیاڎ بنیەیمۍ."

'پاگیری ژەنا کوردی جە ئاشتی فرە گرنگا'

جە بەردەوامینە ئۆزگوڵ ساکیە ئاماژەش بە گرنگی پاگیری ژەنا کوردی کەرد جە پڕۆسەو ئاشتیینە و واتش: "ئا ژەنۍ پاگیری سەرو ئاشتی مکەرا، بە هۆشیاریی ئانەی کە ئی ڕۍ ئاسانە نییەنە، بەردەوامێنۍ جە ڕێکوستەی سەرو زەمینێوە کە پەنەوازی پەشتیووانی ئەنتەرناسیۆناڵیستیچ موینۆ."

جە دمادمایی قسەکاشەنە ئۆزگوڵ ساکیە ئاماژەش پانەی دا قەرارەکۍ دمایی ئاردەی پا هەرمانا بە نامۍ پەکەکەیۆ مەکریا و دمایئاردەی بە ئەوەکۊشای چەکڎاری جە ئەرەنیشتەو ئاشتیینە هەنگامېوە گرنگەنە و واتش: "تەڤگەرەکۍ ژەنا جە ۋەرا ۋەرو ئی کۊششانە هەنگامەشا دەسپنەکەردە. پەشتیووانی مېیاننەتەوەییچ پەی دمایی ئاردەی پا هەرمانا بە نامۍ پەکەکەیۆ مەکریا و 'بانگەوازو ئاشتی و گلېرگەی دیموکراتیک' زیاڎ بۆ. ئیساتۍ پەنەوازا ئەوەکۊشای جە مېڎانی سیاسی و گلېرگەینە فراوانتەر بکریۆ، جە ڕاو ئەوەکۊشای چینایەتی دلۍ تەڤگەرو جوانانە ڕێكوستەی بکریا. پېسە سەرەتایچ باسمکەرد ئاشتی هەرمانێوە جدییەنە، نمەبۆ پەی حکومەتی جیا مەنۆ. مشۊم بە پاو ئی جدیەتیە ڕێکوستەی، گفتوگۆی سیاسی و بنیاڎنیای ئەنجام بڎریۆ."