فەرمانڎەو قەرارگەی ناوەنڎیی یەژاستاری ئەرەیاۋناش، "جە ٣١ەمین ساڵیاڎوو گەشمەرڎەبیەو هامڕېما بێریتانېنە (گوڵناز کاراتاش)ۍ کە ڕەمزەو بە سوپابیەی ژەنانە، ئێمە بە رێز و پنەزانایۊ یاڎش کەرمېوە و وەعد واوەی کەرمېوە کە لایەق بە یاڎوو ئاڎۍ بیمۍ. بە تاسە و وەشەویسیوە سڵام جە رابەرایەتیما کەرمۍ کە ئێمەش بە ئشناسنامەو ژەنۍ ئازاڎیی شکۆمەندی کۆکەرڎۊ و ٣١ەمین ساڵیاڎو بە سوپابیەیما پېسە بەهای ئازاڎیی هامبەشی کەرمۍ بە دیاری پۍ گرڎوو ژەنا ۋۍ ڕاگری. جارێوەتەر وەفاڎاری ۋېما پۍ گەشمەرڎا تشرینی یۋەمی بەربڕمۍ، کە مانگەو تشرینی یۋەمیشا کەرڎە بە مانگەو مدرامانوو ژەنا، ۋەروودەم و یاڎوو ئاڎیشانە بە رێزۊ بەژن و باڵاو ۋېما منامنمېرە، ئێمە وەعد و قەرارداری ۋېما وزمۍ ڕووە، ئاڵاو سەرکۊتەی کە گرەنتی و دەسەبەروو ئارڎەی دی ئامانجوو گەشمەرڎامانە، سەروو کەشە بەرزەکاوە شۊکنمۍ".

ئەرەیاۋناکەو یەژا ستاری پی جۆرە بەردەواما: "ساڵەکا ١٩٩٠ ی پۍ گەلەکەیما و جمیەرەکەیما ساڵانێوە گرنگۍ بېنۍ. گەلەکەما چا ساڵانە بە سەرهۊردای جە دژوو فاشیزمی کۆلۆنیالیستی هەڵوێستێوە قورسش نیشانەدا و ئانەش وست ڕووە کە ژیۋای کۆیلایەتی قبوڵ مەکەرۊ. جمیەری ئازاڎیما کە بە سەرهۊرداکا یاوا بە بەرزتەرین ئاست، فرەتەرین کاریگەریش سەروو ژەنا نیارە. ژەنی چا ساڵانە سەرمەشقی پۍ سەرهۊرداکا کەرېنۍ، پۆل پۆل ڕووەشا کەرڎە کەشی و جە دژوو فاشیزمی بیۍ بە هێزێوە گرنگ. بەتایبەتی دەوڵەتوو تورکی فاشیزمی کە یۋەم قەرەقوڵ و بنکەو ئیمپریاڵیزمین، هێزە جەهانییەکېچ ئانەشا بە مەترسیېوە گۊرە پۍ سەروو ۋېشا زانا. ۋەروو ئانەی هێزە هەرێمایەتی و جەهانیەکۍ دماکەوتەیی کوردیشا وست پاڵوو ۋېشا و جە دژوو جمیەرەکەیما هەم جە دلېنە و هەم جە بەرۊ دەسشا بە ئۆپراسیۆنێوە پاکتاوکەرڎەی کەرڎ. پېسە کایە و مېڎانۍ کۆمەڵایەتی، جە مېڎانی سەروازیچەنە ژەنا کوردی جە کەسایەتی بێریتانېنە بەقوەتتەرین جوابشا پانەی داوە. بێریتانە بیە بە ڕېوگارەو ڕاو ئا ژەنە شکۆمەنڎا کوردی کە جیای ئانەی گنا دەسوو دوژمنی جە کەشەکاوە ۋېشا هوردا، جە ۋەران ۋەروو ئا هێزانەی کە وېدای دەسۊی سەپنېنۍ ، بە هۊرچنیەو ۋېش سەروو ئازاڎیی هەڵوێسی شکۆمەندانەش گېرتەنەۋەر. بێریتانە پا هەڵوێستەیشە هەم پاکتاوکەرڎەیش جە دلېنە و ھەمیچ جە بەرۊ بێکاریگەر کەرڎ و گورزەی بەقوەتەش جە هێزە جەهانییەکا و دماکەوتەیی کوردی دا. بێریتانە بیە بە ڕەمزوو ژەنا کوردی کە پەی ئازاڎیی خۊتان ئیراڎۍ بېنۍ، بیە بە ڕەمزوو ئانەی کە گلېرگە بە ئازاڎیی ژەنۍ، ئازاڎ بۊ. پەشتەو ئا ھەڵوێستە ڕەسەنەو بێریتانېوە کناچۍ ڕەسەنۍ دێرسیمی بیەیشا ھەن، کە پۍ ئانەی ۋېشا نەڎا دەسۊ جە کەشەکاوە ۋېشا فڕەمڎانۍ واری. ئا نەریتە مدرامانە ڕەسەنە، میراتوو گوڵبەهارۍ، ڕندەخانۍ و بەسێکانە. بێریتانە بیە بە ڕەمزەو جەوھەریتەرین میراتوو مدرامانی کە سارا، عەزیمە، بەسێ ئانوشە و خانم یاوەرکایاکا خوڵقناشا. بێریتانە نوێنەری هامبەش و ڕۆحە ئازاڎەکا ژەنا کوردی، کە پۍ ئانەی ۋېشا ڕادەسوو دوژمنی نەکەرا، جە کەشەکاوە ۋېشا هۊردارە واری و ۋېشا وست دڵۍ دەرەکا و نارنجۆکەشا ۋېشارە تەقناوە. بێریتانە بیە ڕەمزەو ئانەی کە ئانۍ جەنگ کەرا ئا وەختە جوانۍ با و بەرەو ژیۋایۍ شکۆمەندانەیش پۍ گرڎوو ژەنا کەرڎۊ. بێریتانە بە ھەڵوێستەکەیش بە شێۋېوە شکۆمەنڎانە تۆڵەو کناچا دێرسیمی و بەسێکانیش کەرڎۊ و بیە بە ئەڵقېوە ھەڵوێسی شکۆمەندانەو ژەنا کوردی".

ئاڎۍ شۊنەو پەیا بێریتانۍ کۊتۍ و باڵەکېشا پۍ ئازاڎیی ۋەڵاکەرڎۍ

جە بەیاننامەو فەرمانڎەیی قەرارگە و ناوەندی یەژاستارینە ئاماژە پی تایبەتمەنڎیا دریا:

" بێریتانە جە کەشەکا خواکوڕکینە بالەکاش پېسە واشېوە جە یۊی دۍ و بە ئەرەگیرا و نۆکەرە هەرێمییەکاش نیشانەدا کە ژەنەو کوردی حیچ وەختۍ سەرشۆڕی و تەسلیمیەت قبوڵ مەکەرۊ. ئیسە بە هەزاران ژەنۍ دلۍ ڕیزەکا یەژا ستارینە مدرامان کەرا. جە بۆتان لەیلا سۆرخوینە و رۆژبین دەرسیمە، جە سەرحەد هەژار زۆزانە، جە ئامەڎ ئاخین موشە، جە مێردین گۆلبەهارە، مەڕجانە و دەستان بۆتانە، جە گارزان ئەردەم ئاراراتە، جە دەرسیم ئارژین ساریا، جە خواکورک ئاسیا کانی رەشە و دەیانی پېسە ئاڎیشا دژوو فاشیزمی کە تەسلیمبیەی سەپنۍ، بیۍ بە نموونېوە پېسە بێریتانۍ. جە ٣١ەمین ساڵیاڎوو بە سوپا بیەی ژەنانە حەریۊ چایشا بیۍ بە شۊنکەوتەو ڕاو بێریتانۍ و پەڕ و باڵېشا فراوان کەرڎۍ. ئاڎۍ جە چوار پارچەو کوردسانی و جە هەرێمەکا پارېزنای مەدیاینە بە سەرمەشقی و مدرامانوو یەژاستاری بیۍ بە هەنگام هورگیروو ڕاو بێریتانۍ کە گورزەی گۊرېش جە فاشیزمی ئەرەگیری دا. ئانۍ کە جە کۆبانێ، شەنگال و مەخمور ژەنیشا چېروو درنڎەیی داعشینە ڕزگار کەرڎۍ، چېروو فەرمانداری بێریتانېنە هەنگامە نیېنۍ. ئا قیمەتەی کە پۍ ئازاڎیی جە کۆبانێ، شەنگال، مەخمور و جە کەشەکانە بەدەس ئاما بە ۋنەو ژەنا خوڵقیا، ئارۊیچ ئینۍ چېروو هجومەکا فاشیزمی ئاکەپە-مەهەپەینە. ئامانجوو بۆردومانەکا سەروو یانەو و موڵکوو مەڎەنیەکا، کە ڕووانە بە دەیان کەڕەتۍ بۆردوما کریا، ئا ژیۋاینە کە بە سەرمەشقی ژەنا خوڵقیان، دژوو ئیراڎەو بێریتانۍ ئانۍ کە گەرەکشانە تەسلیمبیەی وەڵۍ وزا بە چەکی قەڎەغەکریا، تەکنەلۊجیاو سەردەمی و گازی کیمیاۋی تاوانەو جەنگی ئەنجام مڎا. بەلام ئێمە ئانەی مۋینمۍ کە ئانۍ بە سەرمەشقی بێریتانۍ هەنگامە منیا، پېسە سارۍ و رۆکەنۍ جواب و ئی ئەرەگیریە مڎاوە، ئینەیچ ئانەی سەلەمنا کە ئا ئیرادەیەی جە بێریتانېوە سەڕش هۊردان تەسلیم مەبۊ. بێریتانە نیشانۍ ئیراڎەی حېقمەو سوپاو ژەنامانە. بێریتانە کەرامەتوو ئا ژەنانە کە بەرەو ئازاڎیی هەنگامە منیا. ژیۋای بە شێوازێوە بێریتانی ژیۋایۍ بە کەرامەتا، جەنگ بە ڕێبازی بێریتانی نەخشەڕاو سەرکەوتەین.

چا ساڵانەی کە بێریتانە جەنگ کەرۍ، پۍ ئانەی ژەنېوە تاوۊنە چالاکی ئەنجام بڎۊ، پەنەواز بۍ جە فرەو چېوی ۋیەرۊ. دماو قوربانیدای و شیەینېوە فرە قورسی، ئارۊ ئێمە پېسە هێزوو یەژا ستاری یاۋېنمۍ پی ئاستەیە کە ڕووانە سەرمەشقی پۍ دەیان چالاکیا کەرمۍ. سوپاو ژەناما هەن کە خەریکا بەردەوام وەڵۍ گنۊ. ئێمە مافوو جەنگ کەرڎەیما جە بێریتانېوە بە میرات هۊرگېرتەن و ئارۊیچ سەروو ئامانجەکاش ملمۍ. ئێمە؛ ژەنا یەژاستاری ماچمۍ گرڎ ژەنێوە مافوو ۋېشا پۍ ژیۋایۍ شکۆمەندانەی بە ئازاڎی کۊشیای کەرۊ. پېسە بێریتانەکا ئی سەردەمیە، داوا جە گرڎوو ژەنا کەرمۍ بەشڎاری ئی جەنگە گەورەیە جەنگوو کەرامەتی کەرا. ماچمۍ؛ دژوو فاشیزمی کۆلۆنیالیستی کە گەرەکشا ملکەچوو مەردەیما کەرۊ، بێریتانە جە دڵمانە مڎۊوەنە، ئیراڎەمانە و جەنگ کەرۊ، باڵەکېما کە بەرەو ژیۋای فڕا. ئێمە هامشێوەو بێریتانۍ وەشەویسی کەرمۍ، بە شێوەو بێریتانۍ گورزە شانمۍ و بە شێوەو بێریتانۍ مژیومۍ.

ئێمە پێشوازی جە هەڵمەتەو ئازاڎیی پۍ سەرۆک ئاپۆی کەرمۍ

 بە مەبەسوو دمایی ئارڎەی بە گۆشەگیریی سەروو ڕابەریما کە ڕابەرێوە جەهانییا و مسۆگەرکەرڎەی ئازاڎیی جەستەیی ڕابەرایەتیما،  کەسایەتی بەڕێز، سەرمەشقا گلېرگەی، ژەنا و گەنجا جە گرڎوو جەهانیوە کوۍ بیېنێوە. ئێمە پېسە هێزەکا یەژا ستاری پێشوازی چا هەڵمەتەو ئازاڎییە کەرمۍ کە جە لایەن و گەلەکەیما و دۆسەکاماوە بە دروشمەو 'ئازاڎیی پۍ ڕابەر ئاپۆی، چارەسەری سیاسی پۍ پەرسوو کوردی' دەسش پنەکەرڎەن. ئێمە گەرەکمانە واچمۍ کە شانازی پی گلېرگەیۊ و دۆساماوە کەرمۍ کە دەوروو ڕابەرایەتیمانە کوۍ بیېنێوە. دڵنیېنمۍ ناداڎپەروەری ۋەران ۋەر بە ڕابەرایەتی، کۆکوشیی گەلەکەیما و ئا تاوانە جەنگییا ۋەران ۋەر بە جەنگەوانەکاما ئەنجام دریا، جە لایەن و مرۆڤایەتی وجەهانیۊ  ۋینیۊ. چونکی ئێمە جە ڕابەریماوە فێرۍ بیېنمۍ متمانە بە گەلی کەرمۍ، بەها دەیمۍ بە گەلی. ئی پارادایمەو ژیۋای ئازاڎیی ڕابەرایەتیما کە نامېش ژیۋای ئینسانیا، ڕووانە زیاتەر کاریگەری سەروو ئینسانەکاوە بۊ. ئینەیچ مژدانی ئانەی مڎۊ کە ئازاڎیی نزیکا. به جۆش و خرۆش و نزیکبیەیۊ ڕوانی ئازاڎییش مزانمۍ جە ۋەران ۋەروو هجومەکا سەروو گەلەکەیما، ژەنا و ڕابەرایەتیما، ئێمه بەقوەتېنمۍ و پی ئەنەیاوایە مدرامان کەرمۍ و بیمۍ بە تەرسەو دڵوو فاشیزمی. هامشێوەو هەڤاڵا فیداییما ڕۆژهات زیلان و ئەرداڵ شاهینی، بیمۍ بە گڕکان و جە دڵوو دوژمنینە تەقمېوە، تەرسی وزمۍ دڵوو فاشیزمی کە ۋۍ دایدەسۊی سەپنۊ. هەتا ئازاڎیی جەسڎەیی ڕابەرایەتیما مسۆگەر نەبۊ و ژیۋایۍ شکۆمەندانە پۍ گەلەکەیما دەسەبەر نەبۊ، مەمردمۍ. جە حەر یاگېنە جە حەر وەختېنە بەدیل مڎەیمۍ. جە ساڵەو ٣١ــەمینینە ژیۋایۍ ئازاڎ کە شۊنکەوتا بێریتانۍ مسۆگەرشا کەرڎەن، پېسە هێزەکا یەژا ستاری زیاتەر ۋېما بەقوەت کەرمۍ و شکس بە فاشیزمی ستەمکاری مارمۍ. سەرکەوتەی پۍ ئا ژەنە ئازاڎا بۊ کە هامشێوەو بێریتانۍ مدرامان کەرا”.