میدیا عەبدوڵا، چالاکەو بواروو ژەنا و مافوو مرۆڤی، جە بارەو ژەنا و گرنگیشا دلۍ گلێرگەینە واتش: "حەقەتینەنە ژەنی نەک نیمەو گلێرگەینۍ، بەڵکم ئاڕاسەکەرۍ گرڎوو گلێرگەینۍ و پەروەردەکارۍ جیلی ئایندەینۍ."
میدیا عەبدوڵا، چالاکەو بواروو ژەنا و مافوو مرۆڤی ، جە بارەو ئازاڎیی ژەناوە پۍ ئاژانسوو هەواڵوو فوراتی (ANF)ی قسێش کەردۍ و واتش: "ئازاڎیی ژەنا ئازاڎیی فکری و ویژدانی و مامەڵەین، نەک تەنیا ئازاڎیی جەسڎەی و پۊشتەی، ژەنی مشۊم گرنگی بە پەروەردەی هزری ۋێشا و هوشیاریشا بڎا، چونکی ژەنی تەنیا نیمەو گلێرگەی نیەنۍ، بەڵکم ئاڕاسەکارۍ گرڎوو گلێرگەینۍ و ئاڎێنۍ پەروەردەکارۍ جیلوو ئایندەی و پێکئاوەرۍ کلتووری."
حەرپاسە جە بارەو گرنگی ٨ و ئاداریوە ئاڎە پەیلووایش چانە بۍ کە ئی ڕووە یاڎکەردەیۆ چالاکی و خەباتوو ساڵێوە ژەنان و پلانە و تەسەوراتوو ساڵەی ئایندێن پۍ چالاکییەکا، باسش چانەی کەرد کە نەتەوە یۊگێرتەکۍ پۍ ئێساڵی گرنگیشا پانەی دان کە ژەنی وەبەرهێنێنۍ و ساحیبوو ئابووریێوە سەربەخۆو ۋێشا با و چی بارۆ ئەرەیاۋناش: "فرە گرنگا ژەنی ساحیب ئابووریێوە بەرهەمئاوەرانۍ و ۋێڕاوەبەرانەی با و گرنگی بە ۋەنای و ۋۍ پنە یاونای بڎا جە گرڎوو کایەکا ژەنانە، ئانەی پاسە کەرۆ ئێمە تا ئیسە ئازاڎۍ نەبیمۍ، ئانەنە کە ساحیب سیستمێوە ۋێڕاوەبەر نەبینمۍ و هەمیشە کولتووروو دژە کوردی زاڵبیەن سەرمارە و ڕاش ۋنە گێرتێنمۍ، تەنیا پا وەڵێکۊتەیە متاومۍ ڕووبەڕوو ئا کولتورە دژە کوردا بیمێوە."
ئا چالاکۍ باسش چانەیچ کەرد، کە بڕۍ وەخت بەتەنیا کێشە چانەینە نییا کە پیاکۍ پیا سالارێنۍ، بەڵکم بەشێوە جە ژەنایچ بەهەمان شێوە ویر کەراوە و پەروەردە کەرا و باسش چانەیچ کەرد کە چی قۆناغێنە ژەنی پەنەوازشا بە ئاخێزێوە فکری هەن.
میدیا عەبدوڵا ئانەیچش وست ڕووە، کە ئاخێزی هزری کاریگەریش سەروو بەشداری ژەنا هەن و واتش: "ژەنی تا ئیسە جە فرەو ئەرەمەرزیا و ئاخێزەکانە سەیەو پیایا بیێنۍ، پێویسا ئاڎۍ پێسە ئینسانی مامەڵە چنی ۋێشا و دەوروبەریشا کەرا، تاوەکو بتاوا بانۍ بە سەرمەشق و سەرکردۍ جە هەر بوارێنە کە گەرەکشا بۆ."
