کوردستانیان لە ویلایەتی راین ویستفالیای باکوور (NRW)ی ئەڵمانیا لەگەڵ دۆستەکانیان ئێوارە لە هیومارکێت کۆبوونەوە و بە وێنەیەکى گەورەی عەبدوڵا ئۆجالان رێبەری گەلی کورد دەستیان بە رێپێوان کرد.

لە کاتی چالاکییەکەدا لەلایەن پۆلیسەوە ئاگادارکردنەوەیەک بڵاوکرایەوە، کە وێنەی عەبدوڵا ئۆجالان رێبەری گەلی کورد قەدەغەیە و چالاکوانان بە چالاکیی دانیشتنی ١٠ خولەکی ئەو ئاگادارکردنەوەیەى پۆلیسیان ئیدانە کرد.

هاوکات لە دیوتز ویرفت میتینگێک رێکخرا. هاوسەرۆکی فیدراسیۆنى مەد (فەد مەد - Fed-Med) لە ئەڵمانیا ئەنگین سەڤەن، نوێنەری فیدراسیۆنى کرێکارانى کۆچبەر لە ئەڵمانیا (ئاگیف - AGÎF) شەفەق دەنیز و چالاکوانی رۆژهەڵاتی کوردستان روناک رۆژهەڵاتی وتەیان پێشکەشکرد.

ئەوانەى وتەیان پێشکەشکرد سەرنجیان خستەسەر بەرخودانی گەریلا لە حەفتانین و رایانگەیاند، گەریلا بۆ ئازادیی کوردستان تێدەکۆشێت و تا دوا هەناسە پشتیوانییان لێدەکەن.

چالاکییەکە بە وتنەوەى دروشم کۆتایی پێھات.

ژ.ت