پەروین بوڵدان هاوسەرۆکی پارتی دیموکراتی گەلان (هەدەپە) لە کۆبونەوەی پەرلەمانی تورکیا کە تایبەت بوو بە پڕۆژەیاسای بودجەی تورکیا بۆ ساڵی ٢٠٢٣ قسەی کرد. بوڵدان کاردانەوەی بەرامبەر بودجەی ئاکەپە-مەهەپە، دەربڕی کە دوورە لە دانوستان و رای لایەنەکانی دیکە و وتی: "ئەمە بودجەیەکە کە رەنجی ملیۆنان کەس دەخاتە خزمەتی دەسەڵاتەوە و  کێشە و چارەسەری ئەو بودجەیە ڕەتکردنەوە و ئینکارییە”.

بوڵدان ئاماژەی بەوەدا کە دەسەڵاتی ئاکەپە-مەهەپە ماوەیەکی کەمی ماوە و وتی: ئێوە بوونەتە هۆی ئەوەی وڵات ئیفلاس بکات. بوڵدان ئاماژەی بەوەشکرد، دەسەڵات زیانێکی زۆر بە ئاشتی کۆمەڵایەتی دەگەیەنێت. بوڵدان باسی لە پێشێلکردنی زیندانیانی و رۆژنامەنووسە دەستگیرکراوەکان کرد و ئاماژەی بە دوژمنایەتی دەسەڵاتداران بەرامبەر سروشت کرد.

پێویستە بە زوترین کات گۆشەگیری کۆتایی پێبهێنرێت

بوڵدان ئاماژەی بەوەدا کە دەسەڵاتی ئاکەپە-مەهەپە لەسەر لێواری رووخاندایە و وتی: "ئێوە دەڕوخێن! ئەمڕۆ ملیۆنان کەس داوای کۆتاییهێنان بە گۆشەگیری دەکەن. بۆیە ئێمە پێداگری لەسەر چارەسەری لە رێگەی گفتوگۆ و دانوستان دەکەین."

بوڵدان ڕایگەیاند، کاندیدەکەیان لە هەڵبژاردنی سەرۆکایەتیدا ژن دەبێت و لە درێژەی قسەکانیدا وتی: "مۆدێلی هاوسەرۆکایەتی دەستکەوتێکی مێژوویی دەبێت بۆ ژنان. ئێستاش کاتی فراوانکردنی ئامانجەکەیە. ئەگەر دەتانەوێت لە سەدەی دووەمی کۆماری تورکیادا ژنێک سەرۆککۆمار بێت، تاکە پارت کە دەتوانێت ئەوە جێبەجێ بکات، هەدەپە و هاوپەیمانی ژنانە."

ف.ق