شەوی سێ شەممە لە سەر چوارشەممە هاوکات لەگەڵ سێهەم ساڵیادی خۆپیشاندانە جەماوەرییەکانی تشرینی دووەمی ٢٠١٩ لە کە دژی بەرزبوونەوەی نرخی سوتەمەنی بەڕێوەچووبوون، لە زۆر شار پێکدادان هاتە ئاراوە.

لە تاران چالاکوانان بە شەو ئاگریان کردەوە و دروشمی "دەجەنگین! گیان بەخت دەکەین"یان دەوتەوە.

بە گوێرەی ئەو دیمەنانەی بڵاوکراونەتەوە هێزەکانی دەوڵەت لە وێستگەی مێترۆ تەقە لە هاووڵاتیان دەکەن. لە دیمەنەکاندا دەنگی هاوارکردن دەبیسترێت.

لە رۆژهەڵاتی کوردستان هێزەکانی دەوڵەت لە چەندین شار تەقەیان لە گەل کردووە. بە پێی زانیارییەکان لە سنە دوو کەس و لە کامیارانیش کەسێک ژیانی لەدەستداوە.

لەلایەکی ترەوە بە گوێرەی ئاژانسی فەرمی دەوڵەتی ئێران لە شارەکانی بۆکان و کامیارانی رۆژهەڵاتی کوردستان و لە شاری شیرازی باشوری ئێران ٢ پاسدار و ئەندامێکی بەسیج کوژراون.

بەگوێرەی رێکخراوی مافەکانی مرۆڤی ئێران لە ١٦ی ئەیلولەوە کە ژینا ئەمینی لەلایەن پۆلیسی ئاکارییەوە لە تاران کوژرا، تائێستا لانیکەم ٣٢٦ کەس کە ٤٣ کەسیان منداڵبوون، کوژراون. لانیکەم ١٢٣ لەوانە لە پارێزگای سیستان و بەلوچستان کوژراون.

رێکخراوەکە ئاماژەی بەوەشکردووە، کە ١٥ هەزار کەس دەستگیرکراون. کاربەدەستانی دەوڵەت بانگەشە دەکەن کە ئەو زانیارییە راست نییە. نەتەوەیەکگرتووەکان باسی لەوەکردووە کە ١٤ هەزار کەس کە منداڵیشیان تێدایە دەستگیرکراون، بەڵام هەندێک سەرچاوەی بەرهەڵستکار بانگەشەی ئەوە دەکەن کە زیاتر لە ٣٠ هەزار کەس زیندانی کراون.

بەگوێرەی رێکخراوەکانی مافی مرۆڤ زیندانیان ناتوانن چاویان بە پارێزەرانیان بکەوێت و بۆ ئەوەی بە زۆرەملێ دانپێدانان بکەن رووبەڕووی ئەشکەنجەی دەرونی و جەستەیی دەبنەوە.

لەم نێوەندەدا، دەسەڵاتی دادوەری ئێران سزای لەسێدارەدانی بەسەر سێ خۆپیشاندەری دیکەدا سەپاند. رۆژی یەکشەممەش دادگای تاران چەندین تۆمەتی دابووە پاڵ چالاکوانێک و سزای لەسێدارەدانی بەسەردا سەپاندبوو.

هـ . ب