شارەوانی گەورەی وان چەند ساڵێکە بە دەست قەیومەوە گیرۆدەیە، بەجۆرێک لە ئەنجامی گەندەڵی و خراپ ئیدارەدان سەرچاوە داراییەکانی وشکبوون، کە ناتوانێت قەرزەکانی بداتەوە و بە هۆی قەرزە کەڵەکەبووەکانیشی بە کۆمپانیایەک، دادگا بریاری دەستبەسەرداگرتنی خستووەتە سەر بینای سەرەکی شارەوانی وان.

بڕیاری دەستبەسەرداگرتن بەردەوامە و سەرباری هەوڵەکانی سآرەوانی بۆ لابردنی بڕیارەکە یاخود ئەوەی بینایەکی دیکەی شارەوانی بڕیاری دەستبەسەرداگرتنی بۆ دەربچێت، بەڵام کۆمپانیای خاوەن قەرزەکە دژی ئەو داوایە وەستاوەتەوە و دادگاش لە دژی شارەوانی بڕیاری داوە.

قەرزەکانی شارەوانی وان کە لە سەر دەستی قەیووم کەوتووەتە ژێریەوە بە چوار ملیار لیرە دەخەمڵێندرێت و بەهۆی ئەوەی نە بودجە و نە تەندەری لەبەردەستدا ماوە، قەیوم و ستافەکەی نازانن چۆن رووبەڕووی ئەو دۆخە ببنەوە.

بەگوێرەی یاسا خاوەن قەرزەکە دەتوانێت بڕیاری دەستبەسەرداگرتن (حجز) بخاتە سەر ئۆتۆمبێل، زەوی، بینا و ماڵ و موڵکەکانی لایەنی دووەم و لە ئەگەری نەگەڕاندنەوەی قەرزەکانیش دەتوانێت ئەو موڵک و کەلوپەلانەی بڕیاری دەستبەسەرداگرتنیان بۆ دەرچووە، بخاتە بەردەم فرۆشتن و قەرزەکەی خۆی لەو پارەیە هەڵبگرێتەوە.

لە ساڵی ٢٠١٦ەوە ئاکەپە دەستی بەسەر زۆرینەی شارەوانیەکانی باکووری کوردستاندا گرتووە و لە بری سەرۆک شارەوانیە هەڵبژێردراوەکان، کەسانێکی سەر بە دەوڵەتی بە ناوی قەیوم دادەنا و بە درێژایی ئەم چەند ساڵە چەندین دۆسیەی گەندەڵی، بەرتیل، خزمخزمێنە و دیاردەی مووچەخۆری بندیوار لەناو ئەو شارەوانیانەدا ئاشکرابوون.