هێرشکارییەکانی پارتی دیموکراتی کوردستان (پەدەکە) و ناردنی هێزی سەربازی بۆ سەر هەرێمەکانی پاراستنی مەدیا ئاڵۆزی، کاردانەوە و ناڕەزایەتییان لێکەوتووەتەوە و گەلی کورد لە هەموو بەشەکانی کوردستان بەرامبەر بەو هێرشکارییە دەستیان بە جموجوڵ کردووە.

هاوکات لەگەڵ رێکخستنی کەمپەین و بانگەوازی رۆشنبیران، گەنجانی باشووری کوردستان خۆیان بۆ رێپێوانێکی درێژمەودا ئامادە دەکەن.

رێپێوانی گەنجانی باشووری کوردستان رۆژی هەینی ٢٠ی تشرینی دووەمی ٢٠٢٠ لە شارۆچکەى تەقتەی سەر بە قەزای کۆیە دەستپێدەکات و بڕیارە رێپێوانەکەیان تاوەکو گارە بەردەوامیی هەبێت.

رێپێانەکە لە ژێر دروشمی "نا بۆ شەڕ، بەڵێ بۆ یەکێتیی نەتەوەیی" بەڕێوەدەچێت.

کۆمیتەى ئامادەکاری رێپێوانەکە داوای لە هەموان کرد بەشداری رێپێوانەکە بن و رایانگەیاند، "بەشداریکردن لەو چالاکییەدا ئەرکێکی نەتەوەیی و نیشتمانییە".

داواشیان لە هەموان کردووە، کە لە دژی شەڕ بوەستنەوە.

بەپێی راگەیاندراوەکە کات و شوێنی رێپێوانەکە بەمشێوەیەی خوارەوەیە:

شوێن: ناو بازاڕی تەقتەق

کات: کاتژمێری ١٢ی نیوەڕی رۆژی هەینی – ٢٠/١١/٢٠٢٠

ژ.ت