دما و ئانەی پاکێجو ١٠هەمینو دادوەری جە لایەنو دەسەڵاتداری چێرو نامێ "ڕیفۆرمو دادوەری" بەرشی، نەبیی بە جواب و چەمەڕاییەکا، پارتو یەکسانی و دیموکراسی گەلا (دەم پارتی) چنی وەزیرو دادی یڵماز تونچ گلێرۆبییەیش ئەنجامدا.هامواتە واچوو کۆمسیۆنو یاسا و مافەکا مرۆڤی دەم پارتی ئۆزتورک تورکدۆغان شاندەکەنە یاگێش گێرتە.

تورکدۆغان پەیوەس بە وردەکارییەکا گلێرۆبییەکەی پەی ئاژانسوو هەواڵو فوراتی (ANF) قسێش کەردە و ئاماژەش پانەی دا جە گلێرۆبییەکەینە بابەتەکا پێسە و پێشێلکاری جە زینانەکا، دۆخو زینانیا نەوەشی و هەنگامە پەنەوازییەکا پەی ئا زینانیا کە بە شێوێ ئارەزوومەندانە ئازادێ مەکریا، تاوتوێ کریێنێ.

'دەسەڵاتو دادوەری و بیرۆکراسی پێسە و ئانەین پڕۆسێوە نەبۆنە مامەڵە مکەرا'

تورکدۆغان جە سەرەتاو قسەکاشەنە ئاماژەش پانەی دا چنی وەزیرو دادی باسو ئانەیشا کەردەن پڕۆسەکە بە سەختی ملۆڕاوە و هەر پاسە باسش چانەی کەرد پڕۆسەو پەیوەس بە زینانیا نەوەشا فرە بە خاوی ملۆڕاوە و واتش: "ئاماژەما پانەی دا کە ئینە ڕا وەردەموو زیاڏبییە و نەوەشییەکا مکەرووە. بە وەزیرو دادیما ئەرەیاونا کە پرۆسێوە تازە دەسش پنەکەردەن، کە دەسەڵاتو سیاسی پشتگیری ئی پرۆسەیە مکەرۆ، بەڵام هەم دەسەڵاتو دادوەری و هەم بیرۆکراسی دۆڵەتی پێسە و ئانەین هیچ پرۆسێوە تازە نەبۆنە مامەڵە مکەرا. وەزیرو دادی بەشداری قسەکا بی، ئاماژەش پانەی دا جگە چا بابەتا کە پەنەوازیشا بە فاڕییای یاسایی هەن، پەنەوازا ئا چێوێ کە کریانە جە چوارچێوێوە یاسایینە ئەنجام دریانە و ئارێش هورسەنگنای پەی ئی بابەتا واوەی بکەراوە."

'چێگە پەرسەی سەرەکیی نەبییە و گرەنتی یاسایین!'

واتیشش: "مەڵامەتوو سەختی مامەڵەکەردە و بیرۆکراسی دۆڵەتی ئانەن کە پرۆسەکە گەرەنتییێ یاساییش نییا. وەر ئانەی گرەنتی یاسایی مەرجا. ئەر گەرەنتی یاسایی پڕۆسەکەی بەدی بێنە، ئاکاتە بیرۆکراسی دۆڵەتی بە خێرای هەنگامە نیێ. ئی کەموکوڕییەما جە گلێرۆبییەکەینە بەربڕی. وەزیرو دادیش سەرنجش وست سەر و ئاکەپەی و ئاماژەش پانەی دا ئی بابەتی پارتە سیاسییەکاش پەیوەندیدار مکەرۆ. هەرپاسە بە ئەگەرێوە فرە تاوەکو ١٥و تەمموزی جە پەرلەمانەنە کۆمیسیۆنێوە وەش کریۆنە."

'کاتێ ئێمە واچمێ TMK گرڏ کەسێ گنۆنە دلێ یاسێکێ'

جە بەردەوامی قسەکاشەنە تورکدۆغان ئاماژەش پانەی دا کاتێ باسو ئازاد کەردە و زینانیا سیاسی مکەرا بابەت FETO مارۆنە ئاراوە و واتش: "کاتێ پەیوەس بە زینانیا سیاسی قسێ مکەرمێ دەموو دەس یاساو ئەوەکۆشای جە دژو تیرۆری (TMK) مارۆنە ئاراوە. ماچانە بە پاو  یاساو TMK تاوانەنە. تاوانەکێ جە چوارچێوەو TMK گرڏ کەسێ پەیوەندیدار مکەرۆ. ئێمە جەختما چانەی کەردەنۆ کە مشۆم جیاوازی بکەرا بەینو ئانێ پەناشا پەی توندوتیژی بەردەن و ئانێ پەناشا پەی توندوتیژی نەبەردەن. جە گلێرۆبییەکەیمانە بەتەمامەتی پەرسەکا جابەجێ کەردە و یاسێ. چونکە وەڵتەر باسما چا بابەتەی کەرد، بەڵام دەخەم مەشۆ نەیاوایمێ ئەنجام."

'چی یاساو جابەجێ کەردە و ئا کەسا ٣٠ ساڵێن ئینێ زینانەنە مەناوە درێژ کریۆوە؟'

ئۆزتورک باسش چانەی کەرد سەر و بابەتو سۆتە و یاساو جابەجێ کەردەی مردێ و واتش: "پەی نمونەی بڕێ کە ٣٠ ساڵێن ئینێ زینانەنە، چی یاساو جابەجێ کەردە و ئا کەسا ٣٠ ساڵێن ئینێ زینانەنە مەناوە درێژ کریۆوە؟، ئا کەسێ کە ٣٠ ساڵێ وێشا تەمام کەردەن و ئینە یەرێ ساڵێن یاساو  جابەجێ کەردەی درێژ کریۆوە. چی گلێرۆبییەینە سەر و ئا بابەتا کە مشۆم جە پراکتیکەن چارەسەرێ کریانە قسێما کەردە. دما و ئی بابەتا چنی وەرپرسا وەزارەتی بە وەرفراوانی واوەی قسێ مکەرمێوە."

'دابین نەکەردە و دڵنیایی یاسایی ڕاوەشکەر بۆنە پەی خووە بیرۆکراسییەکا وەڵین و دۆڵەتی'

تورکدۆغان ئاماژەش پانەی کەرد، ئەر جە پەرلەمانەنە کۆمسیۆن ئەرەمەزیۆ زەمینەسازییێ سیاسی پێکمێ، بەلام سەبارەت بە پڕۆسەکەی هەڵای ئا یاسایێ بەرنەکریێنێ کە دڵنیایی یاسایی دانە. واتش:"دابیننەکەردە و دڵنیایی یاسایی ڕا پەی دۆڵەتی وەش مکەرۆ کە بە خووە بیرۆکراسییەکا وەڵین و وێش دۆنە. دابینکەردە و دڵنیایی یاسایی پەی وەڵکەوتە و پڕۆسەکەی و دیموکراسی بییەی تورکیای فرە گرنگا. ئیسە ڕەوشەکە خاس نییا و خەڵک فرە ڕەخنەش جە حکومەتی هەن. متمانەو گەلی تەنیا بە وەرفراوانکەردە و زەمینەو ئازادی بەدەسمێ. هەڵای فرە هەڤاڵی ئێمە ئینێ زینانەنە. ئێمە گرڏ و ئانیشاما وستێ ڕووە."

'بەدەر جە دیموکراسی هیچ ڕێوەتەرەما پەی دەسەڵاتی بییەیش نییا'

تورکدۆغان سەرنجش وست سەر و گرنگیی ئاشتی و پی جۆرە قسێش کەردێ: "ئێمە گرڏ پشتگیرییێ مرەیمێ پڕۆسەو ئاشتی، بەڵام چنی ئاشتی پەنەوازا دیموکراسی بارمێنە. ئەگەرنا پی جۆرە مەتاومێ متمانەو گەلی پەی پڕۆسەکەی بەدەس بارمێ. متمانەو خەڵکی هەڵای ئینا چێرو ٥٠٪ـی. مەڵامەتو ئینەی سیاسەتەکێ فشارو دەسەڵاتینێ. دەم پارتی هەمیشە جە دژو ئینەی مدرانۆ. وەر و ئینەی چنی بەدەسئاردە و ئاشتی هەوڵ مرەیمێ تورکیا وێش جە پاوانوازی ڕزگاربکەرۆ. جە ئیسەنە لایەنی کوردی ئانەی جێببەجێ مکەرۆ. ئێژا ئۆجەلان ئانەی مکەرۆ. دمایش بە گرڏ هەرمانێ و خەباتێوە چێرو نامێ پەکەکەینە ئارد و قەرارو  چکنیارەیش دا، چەکنیارەی بەتەمامەتی جابەجێ مکەرۆ تاوەکو دەسەڵات ئیتر نەتاوۆنە کەرۆنەش پاساوە. حەر پۆکەی بەدەر جە دیموکراسی هیچ ڕێوەتەرە نییەنە پەی دەسەڵاتی.

جە دماین و قسەکاشەنە ئاماژەش پانەی کەرد، "پەنەوازا ویرما نەشۆ، پێسە و دەم پارتی ئێمە هەم پارت و ئەوەکۆشای و هەمیش پارتو گفتوکۆینمێ."