بە گوێرەی هەوآڵێکی کۆڵبەرنیوز رۆژی چوارشەممە هێزە ئەمنییەکانی ورمێ بە ژمارەیەکی زۆر ئۆتۆمبێلەوە هەڵیانکوتاوەتە سەر گوندی عەبدی بەیگ سەر ناوچەی سۆمابرادۆستی ئەو شارە و دەستیان بە پشکنین، سکانی درگای ماڵەکان و تێکشکاندن و دەستبەسەرداگرتنی کەلوپەل و دارایی بەشێک لە دانیشتوانی گوندەکە کردووە.

هەر لە هێرشەدا پیاوێکی تەمەن ٦٠ ساڵ بە ناوی سەید زاهد موسەوی خەڵکی گوندی عەبدی بەیگ دەستبەسەر و گواستراوەتەوە بۆ شوێنێکی نادیار.

تائێستا هۆکار دەستبەسەرکردن و ئەو تۆمەتانەی رووبەڕووی ئەو هاوڵاتیە کراوەتەوە رانەگەیەندراوە.

هەمان رۆژ سەلاح سوڵتانی خەڵکی گوندی سەروکانی و ئەمیر فەقێ خەڵکی گوندی خورنجی سەر بە شاری پیرانشار لەلایەن هێزە ئەمنییەکانی ئەو شارەوە دەستبەسەر و گواستراونەتەوە بۆ شوێنێکی نادیار.

هێزە ئەمنییەکان بە بێ خستنەڕووی بریاری دادگا ئەو هاووڵاتیانەیان دەستبەسەرکردوە و تائێستا هۆکاری دەستگیرکردن، شوێنی راگرتن و ئەو تۆمەتانەی ئاراستەیان کراوە، نەزانراون.

لە مانگی ئاداری ئەمساڵەوە هەڵمەتی رەشبگیری چالاکوانان و هاوڵاتیانی رۆژهەڵاتی کوردستان چڕبووەتەوە و بە پێی ئامارێکی تۆڕی مافەکانی مرۆڤی کوردستانتەنیا لە نێوان ٢١ی ئادار تا ٢١ی نیسان (مانگی خاکەلێوە) لانیکەم ٣٦ چالاکوان و هاوڵاتی، لە نێوان ٢١ی نیسان و ٢١ی ئایار (مانگی بانەمەڕ) ٧٢ چالاکوان، هونەرمەند و هاوڵاتی لەلایەن هێزە ئەمنییەکانی دەوڵەتی ئێرانەوە دەستبەسەرکراون.

هـ . ب